《將軍澳迴旋處上的時空裂縫》: 第二章第三回：未來人和她未婚夫的相識

 
第二章第三回：
未來人和她未婚夫的相識
 
我的未婚夫，名字叫做黎曉波，我通常都叫他曉波。
 
我在2086年出生，即是中華邦聯成立前兩年。
而曉波，則是2085年出生，比我大一年。
我倆都是在香港出生的。
 




我們是在「黑洞」上面那條橋上認識的。
 
2103年，當時我大學 year 1，曉波是我同系的師兄(環境管理系)。

我主修的是生態修復，
他主修的是廢物處理。

那時「第二代等離子氣化廢物技術」研究中心剛剛落成，大學安排了一個實地考察。
我和曉波都參加了那次實地考察，結果就促成了初次的邂逅。
 




那天，我們參觀了新落成的「黑洞」研究中心。研究中心主管侯博士帶領同學了解研究中心的每一部分。
 
「好喇，各位同學。我而家帶你哋去睇依個研究中心最重要嘅主角──黑洞！」
 
侯博士帶我們一個一個走到「黑洞」上面的那條橋上。
 
「大家小心呀，依度好高架，慢慢行呀。」
 
我沿著橋上路一步一步往橋中心走去。這條橋其實就好像一般行車的天橋那麼闊，所以只要在路中心走，根本不用怕會掉下去。
 




「好喇，大家企好啦嗎？我哋而家就正式開動「黑洞」喇。想到橋兩邊睇清楚「黑洞」嘅同學，記得捉實橋兩邊嘅圍欄呀。如果唔係跌咗落去，我都救你唔到架啦。」侯博士用開玩笑的口吻說，然後示意助手到控制室開動「黑洞」。
 
等了一會兒，「黑洞」的圓環開始發出機械運作的聲音，聽得出有部件在圓環之中繞著它高速旋轉。聲音由慢至快，而且有一個特別的節奏，加上那裡的回音，就好像在演奏廳內欣賞著一首音樂。
 
突然，「黑洞」中出現了一道紫色的電光，由圓環的一端直射到圓環的另一端。我們在橋上聽到電光劃破空氣的聲音。慢慢地，「黑洞」變成了一個由千百條紫色電光交織成的網。
 
見到這麼壯觀華麗的景像，大家都爭相取出相機把眼前一幕拍攝低。
但當我往手袋搜尋我的微型相機時，卻不小心把原本手上拿著的筆記本和原子筆撞到，正要掉到圍欄之外。
 
 
「小心呀，同學！」
這就是曉波對我說的第一句。
 
曉波敏捷地一手抓住了我的筆記本，但卻捉不住我的原子筆。
 




原子筆掉出了橋的圍欄，直墮向開動了的「黑洞」中心。
 
「啊！！！」眾人一同望向「黑洞」。
 
但見那支原子筆掉到「黑洞」時，發出了一小點火光，然後就不見了。
 
「大家都睇到啦？支原子筆就咁被「黑洞」氣化了。『jarr』一聲，化為一縷輕煙，消失了。第時所有廢物都可以咁樣處理，簡單方便快捷，倒落去就搞掂。」侯博士自豪地宣佈。
 
「哇！」眾人一同讚嘆。
 
我驚魂甫定，未來得及作出反應。
這時曉波走過來，笑著對我說：

「支筆我就救唔返啦，俾返本筆記薄你。」
 




 
＊＊＊＊＊＊＊＊＊＊
 
我印象中第一次與曉波的真正對話，是這樣的一個晚上。
 
那一晚，全校所有的女孩子都異常興奮。

「喂，陣間有明星黎學校唱歌呀！」
 
「係咩，邊個呀？」
 
「吳智朗呀！湖南衛視愛國歌曲歌唱比賽個冠軍呀！我全家都好支持佢架！」
 
「吳智朗？你講真架？即係連中華邦聯主席都公開表示鐘意聽佢唱愛國歌曲嗰個？超級靚仔黎架喎！聽講電視台節目揾過醫生驗過佢嘅血，結果話佢擁有最純正的漢人基因架！」
 




「係呀！好想親眼見到佢呀！佢爸爸媽媽都係「香港共和黨」高層，識好多有錢佬同邦聯啲高官架，聽講佢遲啲都會入黨做返一官半職，真係又靚仔又有錢又有權又識唱歌，人生嘅大贏家。」
 
「係呀！！！」
 
「咦？劉霞係嗰邊喎。喂，呀霞！去唔去睇吳智朗唱歌呀，一齊呀？」
 
「吓，唔去啦，我今晚要趕 paper 呀，你哋去啦。」
 
當晚我自己一個到大學圖書館寫論文。圖書館比平時冷清得多，肯定是因為所有學生都去了一睹那個什麼唱愛國歌的歌手的風采。
 
「好少見有女仔會唔去睇吳智朗唱歌，留係度咁勤力温書喎。」
 
我抬頭，見到曉波，當時的我不是太認得他。
 
「對唔住，你係…...？」




 
「上個星期係黑洞條橋上面，幫你救返本筆記簿嗰個呀。」
 
我想了一回，終於記起了。
 
「啊！記得記得！真係唔該晒你呀嗰次。」
我對曉波報以一個微笑。

那時我才看清楚他的樣子，斯文書生型男孩子一名，略帶一點冷漠。
 
 
「你研究蝴蝶架？」曉波指著我鋪滿桌上的參考書本。
 
「係呀，我同 professor 講，我想統計下香港仲剩返幾多種蝴蝶。」
 
我把研究相片拿給曉波看。

「香港以前好多蝴蝶架，可惜而家都絕晒種啦。
最主要原因係海平面上升，導致香港失去咗好多土地。
為咗令市民有地方居住，政府決定大幅削減郊野公園面積。
咁樣做，的確係無可厚非，但就令好多蝴蝶品種從此係香港絕跡。
而家唯有睇返以前蝴蝶圖鑑啲紀錄，睇下有無邊啲品種有機會仲可以係香港本地揾到。」
 
「好靚啊！」
曉波揭著一本100年前出版(2003)的香港本地蝴蝶圖鑑。
 
「你有無聽過《梁祝》依個故事呀？」曉波突然又問。
我這時開始發現到他的思想都頗為「跳躍」，經常講了一兩句就已經轉了話題。
 
「《梁祝》…… 係咪《紅樓夢》《水滸傳》嗰類老土故事？啊，唔應該話老土，對唔住，只係我唔係文科人，唔係太熟悉啲文學作品。」
 
「個故事好耐歷史架啦，係中華古代家傳戶嘵嘅愛情故事。
我最近聽到一首100年前嘅歌呀，當時係我哋香港仲有本地人創作音樂嘅年代，有一位歌手叫做何韻詩，唱過一首歌叫《化蝶》，就係關於《梁祝》依個故事架。我開俾你聽呀，我覺得幾好聽架。」
 
曉波一手就塞了一邊耳筒進我耳朵，自己聽另一邊耳筒，然後播歌。
 
我心想：
依個人咁怪嘅，才剛剛認識，就俾首100年前嘅歌人哋聽？仲好似同我好熟咁。
 
我聽著耳筒內播放的《化蝶》，發覺100年前的歌一點都不老土，反而比當時(2103年)的流行歌更動聽
(當然，2103年的流行歌，就只剩下普通話唱的愛國歌曲，我最討厭的)。
 
「首歌幾好聽喎，但係咁悲嘅。」
 
「唔覺得老土啦咩？所以話經典就係經典，永遠唔會過時架。
『情感』依家野點會過時，點會『老土』呢，係咪？等我播俾你睇一套《梁祝》電影啦。」
 
 
就這樣，我和剛相識的曉波在沒有人的大學圖書館，
話題由我的蝴蝶研究，無啦啦就扯到了《梁祝》化蝶這個古老但淒美的愛情故事。
 
 
(待續)