如果比多次機會我 我一定唔會攞小丑黎開玩笑: (二)

" 痴撚線！咪撚追住我！" 我一路走一路叫。係我身後有兩個著住一黑一白色衫嘅小丑各揸住把斧頭一路係後邊追住我，同時又一路發出詭秘嘅笑聲。我依家身處於Sogo個條大馬路，一路走緊去銅地方向。平時車水馬龍，人來人往嘅銅鑼灣依家變得格外冷清，唔好話人，連一舊垃圾呀係條街度都見唔到。究竟發生緊乜撚嘢事，但係而家唔係諗其他嘢嘅時候，因為後邊個兩隻嘢越離越近。我二話不說走上銅地條樓梯，銅地有三層，我一嘢就走到上三樓，你以為我係超級大儍仔，走上三樓咪無路走，錯啦我襯個兩個小丑未追到上嚟，我即刻嚟個回馬槍搭返電梯落地面，玩到你班契弟陀陀擰。

" 3樓~2樓~地下 "
"叮 " 
當𨋢門正要打開嘅事後，其實我真係好撚驚個兩個小丑就企係出便等緊我，你知啦依啲情況電影周時都會發生。𨋢門打開，好彩得條冷清到一個點嘅街道之外就乜嘢都無。我估個兩隻嘢應該仲係上邊搵緊我。
我唔怕同你講由我讀中學開始，我差唔多日日放學就係蒲銅鑼灣，銅鑼灣有幾多巷仔我都知得一清二楚。我一出𨋢，就立刻走到對面街個名店坊，名店坊左邊有對大鐵門，而大鐵門後邊係條小巷道，條巷仔一條直路再dup過靚彎就係百德新街。就正當我轉彎嘅事後，"仆你個街吖！"依一句粗俗嘅說話，我由心而發咁從口中好有中氣地講咗出嚟。個黑色衫小丑原來以經企定定咁擺晒甫士咁等緊我，好似一早知我會走嚟依度咁，我二話不說就轉身走返頭先入嚟個方向，拜拜你條尾。亦正當係依九秒九之間我一路向前走，一路諗緊應該走去邊嘅時後，"我頂你個肺呀！"一句粗俗嘅說話我又從心而發咁講咗出嚟！因為另外個白色衫小丑已經企係對大鐵門到等緊我！
天啊！咁大整蠱呀。唔通頭先係我自己係度玩自己，又走上走落咁。我先係超級大傻仔。佢地兩隻嘢一步一步咁行近我身邊，我就大叫 "你哋係邊撚個呀，你哋想點撚樣呀?! " 

當然個兩隻嘢冇答我啦，佢地繼續淨係發出嗰啲詭秘嘅笑聲，我極度懷疑佢地一係啞嘅，一係就係唔撚識聽中文！慢慢佢地已經行到我身邊，我知你地一定係到諗點解我唔同佢地打過咁岸鳩！我100%肯定咁同你講，如果係你，你依一刻肯定同我一鳩樣，而經嚇到雙腿發麻。佢地舉起手上嘅斧頭，正準備要手起刀落嘅事後，突然間





 "做人擔得起，問誰不歡喜，談情到老那只嬉戲，難道靠你~ "

咦，依個咪係我電話鈴聲！我如夢初醒一樣，抹大眼。嘩，好撚彩係發夢啫。無理由要我依啲有為青年英年早逝架嘛！至少都等我括別青頭一族先啦，係咪先。我睇下個電話，睇下係邊位英雄，係危急關頭拯救咗我先，佢嘅大恩大德，他日我一定會以身相許。

噢，原來係阿庭。