Welcome To Knot ~ Season1: #76. 啫喱

我知我嘅生活，其實真係幾悶。
冇計，朝朝早4:30am就要起身，5:00am就開爐，咁先可以有新鮮出爐嘅麵包係6:00am左右供應俾啲舖頭。
 
其實我已經自己唔做零售麵包，叫可以冇咁辛苦架喇。
反而做下啲高級少少嘅蛋糕同西式甜品重好。
唔係因為Sky要每日都訂麵包，我諗我真係唔會再好似學徒嗰時咁，要咁辛苦自己。
 
就因為要早起身，所以基本上每日我都好早上床休息。
當然，早嘅定義因人而異，但我好肯定係我大部份朋友之中，佢哋都會覺得10:00pm係一個好早嘅時間。
除咗…Knot有party，或者成班人落Silence嗰啲日子，我先會陪到我要守護嘅人到最後，先再去休息。


 
所以當9:30pm有人㩒我後門門鐘時，我真係嚇咗一跳。
我當時真係以為Sky有事。
點知一開門，就見到係個六神無主嘅傻妹Taz。
佢一手推開咗我，自行就咗入去我個工房，好熟手咁係個櫃到(又)拎晒我所有用嚟整甜品嘅酒出嚟。
 
老實講，我真係唔想個衰妹整亂我個工房，尤其當我有一大盤麵團係到發緊酵嘅時候。
我嗱嗱淋拎住晒所有酒：「喂，要飲都上去我到飲，你貪呢到麵粉香呀？」
 
成功引咗個大少姐上樓上，佢已經急不及待咁由我手中搶咗啲酒。都唔理係咩嚟，就開始狂隊。


就係呢個時候我收到靖個whatsapp，係冇辦法仔細打字嘅情況下，我只係覆咗個「Quick」字，希望佢可以快啲到啦。
 
「其實你係冧之前，係咪都應該話我知咩事，等我覺得我呢批新酒『去』得有啲價值呢？」Taz個傻妹，永遠都係軟功唔work架。
「嗯…Oppa你真係好，呢到成日都有咁多酒俾我飲。我…我以後都唔落Silence喇…唔落Silence…」Taz連隊咗4杯唔同嘅烈酒，先肯開口同我講嘢，但好明顯，佢已經貓咗6成。
「傻妹…你講咩呀？點解唔落Silence？…你同靖拗交呀？」
「靖…哈！…Oppa我同你講…嗯…根本上佢哋兩個人其實都一擔擔，都係呃人架…嗯…佢哋都專呃人架…」Taz又連飲兩杯，㩒都㩒唔切。
「喂！好喇，咪飲咁多！咩專呃人呀？邊兩個呀？你俾人呃咩？」
「…嗯嗯…其實我真係分得好開架喎…我都知佢哋係唔同人…咁…所以做朋友…嗯…冇事架~」
 
就喺呢個時候，我個電話開始震。


望一望來電顥示：「靖」。
我九秒九拎起條後備匙，再確保Taz嘅安全，就落樓開門俾我嗰救兵。