Welcome To Knot ~ Season1: #76. 靖

與其坐係度齋諗，而唔會得到任何答案，我有時覺得行動先係最實際。
問題係，Taz去咗邊呢？
 
Send咗個whatsapp俾Sky同啫喱，我需要佢哋嘅幫忙：「今晚有冇見過Taz？我有嘢要同佢講！」
Sky好快就覆咗我個whatsapp，話冇見過Taz。
而啫喱所回覆我嘅，就有啲奇怪：「Quick！」
 
Quick？！咩意思？
係叫我快啲講？
定係啫喱叫我快啲同佢講咗先？ 


又一或係…啫喱想叫我快啲去佢到？
唔通…Taz宜家真係喺啫喱到？
 
我一枝箭衝咗去小寶到，叫佢拎個冰袋入幾枝啤酒入去，再嗱嗱淋拎咗上車，踩行油，向海邊出發。
平日40分鐘嘅車程，今晚我20分鐘就到。
拎住個冰袋，走咗去啫喱間舖嘅後門。
企咗係出面，我先打咗個電話俾啫喱，等佢接通咗一陣，我就收咗線。
 
過咗無耐，後門嘅門打開咗。
啫喱攝手攝腳行咗出嚟，將條鎖匙放咗係我手到：「佢貓貓地，係上面wing緊。今晚我過Sky到借間房瞓，你哋慢慢傾掂佢。呢條後備匙，如果走就鎖門。我聽朝五點要返嚟開爐，不過我就唔上去架喇。自己睇住啦！」


 
「佢有冇講啲咩？」我試探式咁問。
啫喱摸摸後腦：「嗯~佢一嚟到就拎晒我櫃入面啲酒出嚟，唔㩒住佢，真係會同我飲晒！佢一邊飲一邊就係咁問我點算，又話咩分得好開，又話咩兩個人其實都一擔擔…唉~其實我都唔知佢講咩！」
 
「明白啦！唔該晒你。既然佢係上面都飲咗唔少，嗱！呢袋啤酒益你，咪灌醉Sky呀！」我將冰袋遞給啫喱，就轉身入咗啫喱嘅舖頭。
「咪痴線！我點會俾Sky飲！」面紅紅嘅啫喱退出門口，再朝住Knot嘅方向出發。
 
如果話啫喱當Taz係妹咁關心同照顧，咁我對Sky嘅情感都係一樣。
我都希望Sky可以幸福！