Welcome To Knot ~ Season1: #71. Taz

嗱，我份人就言出必行！
琴日應承咗Scarlett話今晚同佢飲嘢，我實會守諾言架！
更何況，我又有藉口可以走出嚟唔駛返酒樓！
 
4：30pm我已經「偷走」過咗Knot，坐返係我個「你睇我唔到」嘅專座。
Sky 將大大杯嘅cappuccino 放咗係我面前。
「喂！Scarlett做成點呀？」我明顯係真關心，費事俾人話我好亂介紹人嚟做。呢啲上身嘢，其實真係少做為妙好！
「佢？OK呀！」Sky俾咗一個大大嘅笑容我，咁都令我安心啲！
 
「不過Taz姐，你朋友都幾得意架喎。」楊言放底件cheesecake 時講咗呢句。


「得意？點得意法？」OK！ You have turned my 八卦 mode on！
「頭先Sky姐同佢brief我哋Knot玩繩結嘅規矩，佢好似好有興趣，重要自己拎咗其中一個結係咁解。」楊言同我真係夾，大家嘅八卦mode係同channel架「重差啲俾佢解到呀。」
 
「咁都唔係好得意啫。我第一次知嘅時候，都好有興趣架，不過後尾解極都解唔到，先唔玩咋嘛。」
「問題係，佢一路解，一路自言自語，話咩『咁樣綁都ok喎』、『可以返去試下』、『咁樣應該幾high』。」
「High？！」我唔知點解愈聽，愈有啲驚。
「係囉，high喎~」楊言加重兩錢肉緊咁講。
 
「咪聽佢講啦。」Sky突然插咀「佢有同我傾過，佢只不過對繩結都有啲研究啫。」
「唔係喎Sky，你都係小心啲、睇定啲好。」楊言走開，又輪到Kwan仔上場「頭先啫喱送蛋糕嚟，嗰個Scarlett成個『烏蠅嬲蜜糖』咁嘅樣，係咁埋啫喱身。你都係睇緊啲啫喱，唔係第二時啫喱水都冇呀。」


「係咪痴線？！」Sky笑住咁回應「咩啫喱水啫！ 做嘢啦，有人order落呀。」
 
嗯~ Scarlett同Willson一樣，呢兩個人，相當有嫌疑。
搞咩呢排海邊多咗咁多事咁嘅呢？
好~等我今晚chok下佢先。