Welcome To Knot ~ Season1: #40. Taz

我認呀！
我係專登要玩下靖架！
 
佢憑乜嘢話做我守護人，我就要佢知難而退。
 
靖同佢一樣，一定係咁。
個個開頭都扮好人，最後…都係同一個樣。
有時有啲嘢，一次就夠，我唔會蠢到衰多次囉！
 
靖整個個簡單嘅light meal，食完都差唔多可以出動。


我用靖嘅化妝品，同自己化咗個女性化啲嘅妝。
今晚本小姐要有收穫。
 
為咗唔想俾太多人認得靖，我哋最後決定捨棄山林道，改為由老蘭開始殺落去老銅。
 
去到老蘭，大部份時間都係啲鬼佬同啲所謂專業人士嚟搭訕。
成班麻甩佬，算吧啦！
 
不過咁，要搵女，又唔係冇嘅。
一個眼神交流，有時已經代替咗好多說話。


 
呢！就好似眼前呢個叫貓貓嘅。
由門口入嚟嗰刻，我已經sense到佢係。
大家對望下，就好自然咁就過嚟飲下嘢，flirt下。
咁幾好呀，無壓力，輕輕鬆鬆。
 
靖？！佢由我同貓貓傾計開始，就木無表情。後尾重話有事走先喎。
 
「你女友走咗喎，唔追？」眼前嘅貓貓，雖然一身中環OL look，不過眉頭眼角流露出嚟個種騷，已經足以蓋過一切。
 


「女友？佢係friend嚟啫。反而係你啵~ 你搞到我個friend走咗。宜家冇人車我返屋企喇，有家歸不得。你打算點處理我先？」Flirt嘅嘢，你明的！
「哈哈哈…咁可憐呀！」貓貓摸摸我塊面，佢隻手真係軟。「咁今晚你唯有跟姐姐返屋企囉~」