睇住自己心愛既女仔，由女神變做一隻雞: 第十二章【等待】

唔知大家有無試過，等待自己鐘意既人上線。 

坐係電腦面前，一面做自己野，然後周不時禁入去MSN入面睇，睇下佢有無在線上。 

我一直都在等...等佢留意我，在意我。 

自從嗰一次對話之後，我地無再傾過計。時不時點入MSN個對話視窗入面，望住以前灰色左既對話，我既心情都變成灰色。 

苦苦既守侯，卻換唔到啲咩返黎。因為你既用心，佢根本睇唔到。 





終於，你等到啦。你覺得原來苦等係有回報，心上人只係上個線，已經能夠令你心花怒放。 

原來鐘意一個人係咁樣既感受，依家先明白。 

但係問題黎啦，佢上線左，你揾唔揾佢好呢?用咩藉口揾佢呢? 

你一開頭打左句Hi...但係之後要接咩呢? 

然後你又把句「Hi」硬生生咁襟落Backspace個制度，又再改其他開場白，又再刪除，如此重複又重複。 





直至你睇住對方offline，你...又再等下一次既機會。 

你亦會好想知道，究竟你既心上人，係同緊邊個男仔傾偈。 

佢既一舉一動，佢既status轉左你會知，佢既上線顏色轉左你又會知，佢聽緊咩歌，睇緊咩片你都會知。 

嗰種感覺就好似佢成日係你身邊一樣。
 
呢幾日返學既時候，有時都會撞到婷婷，同佢打個照面。 





與其話我「撞到」婷婷，倒不如話我去搵婷婷 

佢每日都會係小息既5分鐘後去廁所，我之所以會咁留意，係因為我之前都有撞過佢。 

然後我都會係呢個時候去廁所，只係為左見婷婷一眼。 

今日我如常去「撞」婷婷，我一出班房，如我所料，一出黎就見到婷婷。 

「Hi」我面帶笑容咁，應該都幾燦爛。 

但相反婷婷好似愁尾苦臉咁，無精打彩咁。但佢見到我後，都勉強擠出一個笑容，「Hi」，然後便收起笑容。 

見到佢咁樣，我都覺得心痛，佢楚楚可憐既神情，究竟發生咩事呢？ 

跟住佢就係面前直行直過，我睇住佢係我眼前經過，但我咩都做唔到。 





我望住佢落寞既背影慢慢離我而去，自然心生去關心佢既衝動。 

問下，無事既？ 

難怪佢要打啲咁傷心既野啦，再加上佢岩岩既表情，一定係發生左啲咩事。 

唔通係李Sir條Hi Hi...！？