睇住自己心愛既女仔，由女神變做一隻雞: 第十一章【Status】

我add左佢之後，等緊佢接受我既交友邀請。
 
沖完涼出黎，就已經成功加左佢，第一時間就係睇佢個status，睇下佢心情。
 
佢個狀態度係寫住：pps.海派甜心
 
我知道係度睇緊劇，但唔排除佢係掛機既。
 
呢套劇好紅呀，四處都聽到首曲，〈雨愛〉呀嘛。
 




但我平時都唔會點追劇既，要我追劇，不如我用呢啲時間打機仲好過啦。
 
但佢依家睇緊片，應唔應該搵佢呢？
 
同女神傾偈都係一場心理既攻防戰，要主動出擊呀，定留守大本營？
 
經過一輪天使與惡魔既打鬥過後，最終係天使贏左；所以都係等多一陣先，係呢段期間我就打多鋪機先。
 
我玩緊既係跑跑卡丁車，係OK見到個碟好似幾過癮咁，點知裝黎玩完之後就上曬癮。每日不停係度鑽研入面既技術，日日都樂之不彼。
 




隔左個幾鐘之後，我再開返MSN黎睇，發現佢由上線中變成忙碌中，而婷婷亦都無再睇海派甜心。
 
我都唔知自己邊度黎既勇氣，去點開同佢既視窗，留左一句「hi」。
 
過左幾秒，佢立即由忙碌中變為上線中；再過多幾秒，又由綠色變為橙色。
 
做咩事要咁呀？on左都唔覆人。
 
我全副心機擺落MSN度，我MSN朋友列入面，只有寥寥可數幾個人。
 




我開住半視窗係度玩跑跑卡丁車，女神婷婷就覆左我一句，「Hi」。
 
係電腦既右下角，彈出一個視窗，婷婷傳黎一句，「Hi」。 

我已經無心情再跑落去，依家我心如鹿撞，唔知點樣覆好。 

幾秒間，我只係諗到一啲老土既開場白，「你好」，「我係雄仔」之類既白痴野。 
記得牙 同迪迪仔好fd果個牙麻xd 
下?乜你吾知嫁? 

頓時間覺得好瘀，呢啲好似應該知既野，我竟然毫不知情，緊貼唔到呢個潮流既走向。 
你試下將XD打橫睇 系咪好似一個笑樣呀？ 

係喔，佢咁講又好似係喎，原來係咁解。 




仲有架 好似 :) =] T_T 之類既表情符號 好得意好好玩架haha 

原來溝女都要咁有學問，我真係學藝未精啦。
 
果一晚，我同女神傾左好多關於表情符號既野，佢亦都幾鐘意同我傾偈咁。 

第一次同女仔傾偈係咁暢快，覺得好輕鬆，小小明所講既野，更加俾我拋誅腦後。 

「幫手開飯呀﹗」老母係出面大嗌。 

有我係度，佢就永遠都唔會叫家姐幫手。 

雖然心入面一萬個不情願，但都係出去。 
好呀xd 





我熄左我同婷婷既視窗，見到佢MSN入面既狀態寫住﹕ 

由這一分鐘開始計起春風秋雨間，限我對你以半年時間慢慢的心淡 

------------ 

食完飯過後，再睇返MSN，佢已經唔係線上。 

而佢既狀態亦變左另一句歌詞﹕ 

誰人曾照顧過我的感受，待我溫柔吻過我傷口 

MSN既狀態就好似猜謎咁，估下對方既心情係點。 

咩事會令你心淡？ 





邊個無理你感受？ 

因為咩事而受傷？ 

中文好差既我，難以猜測婷婷既心情...