睇住自己心愛既女仔，由女神變做一隻雞: 第二章 【第一次對話】

好彩後面無人追黎姐，嚇到我鳩都縮一縮。
 
岩岩果一幕不停咁係我腦海入面loop黎loop去。李sir同婷婷親密既舉動，我個心有種俾針刺既痛楚。婷婷會唔會同其他男仔都係咁呢？
 
但根據我連日觀察，佢唔係呢啲咁既人，就算佢同啲師兄呀男仔fd幾熟都好，都唔會有親暱既舉動。頭先一定係李sir條死禽獸霸王硬上弓，睇中婷婷溫和，唔敢出聲，先咁樣落水。
 
真係越諗越嬲，越諗越激氣，登婷婷唔抵呀我。
 
我一定會幫婷婷報呢個仇！佢唔識保護自己，就由我黎保護佢啦！係佢背後默默守護佢。
 




正當我思考緊點樣報復既時候，「鈴──鈴───鈴」
 
我個黑心家姐打電話黎，打親黎都唔方有好野。就係有呢種家姐，先令我對女性充滿陰影。
 
日日就係點我做野，叫我做呢樣做果樣，老母又要企埋佢果邊。
 
「好心你就幫下你家姐啦，小小事都唔肯幫，第時無女仔要你呀！」老母成日覺得男仔就應該要有風度幫女仔。
 
就係咁樣造就呢啲港女出黎。好彩婷婷唔係呢種女仔姐，佢係第一個令我覺得佢唔似港女既女仔。善解人意，溫柔賢淑，集結女性特徵於一身既女仔。
 




我一接個電話，「喂雄仔！」一黎已經粗聲粗氣咁款，「今日starbucks 買一送一呀，我知你學校附近有一間，你幫我買返黎啦。」佢把死人聲真係黑人憎到死。
 
最煩既係，唔聽佢電話就係打到你聽為止，完全唔諗下人地咩感受。
 
我幾想打爆部nokia，我寧願唔用手機。
 
「飲乜呀！」我都唔好老脾。
 
佢講完飲乜就收聲，唔該都無句，好似老奉咁。
 




咁我就去買啦，諗住買完就坐車返屋企架啦。
 
「請問先生你想要咩呢？」店員有禮貌咁問我。
 
「我要兩杯凍朱古力呀，唔該。」當我講完既時候，有一把熟悉既女聲係我側邊響起。
 
「兩杯凍朱古力呀，唔該。」婷婷佢笑住咁同個店員講。
 
「小姐，唔好意思，麻煩你排一排隊呀唔該。」佢指一指個隊尾。
 
婷婷望住不知所措既我，好似等緊我反應咁。
 
但當下我係呆左係度，唔知俾咩反應好，因為呢個係我第一次咁近接觸婷婷。
 
佢見到我過左幾秒都無反應，於是就話，「佢係我男朋友，岩岩我未諗到要飲咩姐。」佢借勢撓住我隻手。




 
個店員都唔知點接落去好，同時兩個女仔都望住我，等緊我開金口。
 
呢個moment 對我黎講真係好鬼尷尬，但同時都包含住開心同埋驚喜。
 
「唔該加多兩杯凍朱古力呀。」我勉強咁講。
 
「我係出面等你呀。」婷婷好甜蜜咁同我講，然後細細力咁錫左我塊面一啖。
 
我愕然咁望住婷婷，而佢好似無咩野咁，用佢招牌既笑容回應我，然後就走左出去。