《末日東方之珠--- 淪陷香港後花園》: 20.

20.

「啊！！！！！」林生嚇到成個人向後跌。

我仲未黎得切上前關心林生，阿文就一拳打埋黎。

「呢拳係代林生打既！」阿文怒氣冲冲咁望住我。

「呢個唔係我個仔，我個仔冇咁瘦，頭髮冇咁長，亦都唔會著成咁出街。太好啦，我個仔冇事…阿仔冇事……」





「Don！你有冇事啊！你係咪傻咗啊阿文，你有冇常識架？凡係醫學研究都係由實驗、解剖、檢驗開始架啦，佢而家係解剖屍體，唔係殺人啊，你係咪要去打死哂香港啲法醫啊？」泳茹即刻埋黎關心我既傷勢，好激動咁鬧阿文。

「……」阿文發哂呆咁望住地下，不斷深呼吸。

「不如咁啦林生，你逐個打開啲屍袋，睇吓你個仔喺唔喺入面。」我諗呢樣應該係現時唯一可以做既野。

「如果唔喺，係咪即係我個仔安全咁走甩咗？」林生從地上爬起身。

「唔一定，我唔肯定警察有冇將部份屍體移走。你搵過哂都冇既話，我地就一齊行動，一齊去搵我地既屋企人。記得小心啲。」我將萬用刀交俾林生防身。





「好…好…」林生有點失意地開始檢查各個屍袋。

「我地搵吓呢啲車上面有冇物資可以用，順便睇下仲有冇生還者。開車門之前記得敲吓個窗先，確認入面冇行屍先開門。」我對住泳茹同阿文講。

雖然大部份車既車門都已經打開，睇黎警察”清掃”得好徹底，不過都係小心啲好。

前進搜刮咗幾架車之後，我個背囊入面多咗兩枝水，一包熱浪，一個頸枕同一啲香口膠。

「Don！」聽到泳茹輕聲呼喚，我向聲源步近。





「你件衫頭先整到污糟哂，換咗佢啦。」泳茹手上拎住一件好新淨既G2000裇衫，背後唔知幾時開始多咗個背囊。

「唔該。係呢…點解你唔問我解剖既原因？」我伸手接過裇衫。

「你想講自然就會講架啦，無論你要做啲咩，我都支持你。」泳茹露出溫暖既微笑，輕輕拍咗我膊頭一下。

「喂！你地睇吓！前面有警察啊！有救啦！！！」喺前方大約三十米處既林生突然大嗌，我抬頭一望，發現遠方出現咗啲大約三米高既鐵欄。

「係！？邊度啊！？」阿文一聽到即刻諗住跑過去搵林生。

咪住！唔對路！

「林生！阿文！」我本能地喝住林生同阿文，但係因為距離太遠林生聽唔到我把聲，只有阿文應聲停低，跑過黎我身邊。我示意阿文同泳茹唔好出聲，即刻踎低喺汽車旁邊，我同阿文面對林生前進既方向，泳茹就背對住。

前面唔止有鐵欄，鐵欄下方仲結集咗十幾個機動部隊，防毒面具、盔甲、長盾，個個都裝備齊全。





「救命啊，你地唔好走啊！有救啦！阿Sir我個仔唔見咗，你地有冇見過佢啊！」我隱約聽到林生既吶喊，我將頭微微伸出去，見到林生手中拎住部電話係咁揮，應該係俾佢個仔張相啲警察睇。

「前方既男士請立即停步！雙手舉高！」鐵欄外既警察對住大聲公講。

「唔係啊阿Sir，我個仔唔見咗啊！」林生冇停低繼續向前跑。

我望住阿文雙眼，示意阿文一齊注意警察既一舉一動。
佢地除咗全副武裝，仲每人都拎住一把步槍。

「入面應該係橡膠子彈？」阿文細細聲喺我隔離講。

「最後警告，請立即停步，否則我地將會採取武力震壓。」大聲公傳出既聲音非常刺耳。






「…好好好…Sorry…ry…我冇惡意……搵…佢……」林生喺鐵欄前停低，因為距離太遠，我聽唔清楚佢講咩。

只能夠隱約見到林生將雙手舉於頭上，慢慢跪低，不斷搖頭。
鐵欄外既警察耳目交接，竊竊私語。

「根據上頭既指令，九龍係嚴重疫區，所有生命體都要被徹底清除。」企喺高臺上既警察再次拎起大聲公。

「吓？咩意思啊？我……」

「噗！」未等林生講完最後一句話，子彈就經過裝有消音器既步槍射出，穿過林生既頭髗，鮮血如泉湧般從額頭同後尾枕噴出。