《末日東方之珠--- 淪陷香港後花園》: 19.

19.


「係…係咪有人聲啊？定係我聽錯啊？」泳茹聲震震咁問，可能係因為慌張，亦可能係因為知道原來仲有其他生還者而亢奮。

「你冇聽錯。」我打開車尾箱，竟然真係有個男人喺入面！

眼前既中年男人如獲新生般狼狽地自車尾箱爬出，身上既條紋裇衫早已濕透，頭髮所剩無幾的光頭上佈滿汗珠，連圓框的金絲眼鏡都覆上了一層霧氣。

「呼～爭啲就熱死，多謝…真係多謝哂你地啊後生仔。」中年男人跪喺地下，雙手合十，又拜又剩。





「唔洗客氣，先生你起身先。點解你會喺車尾箱入面既？」泳茹上前將男人扶起，等佢企直之後我先發現中年男人大概只有一百五十幾cm，難怪可以匿入個車尾箱度。

「係咁既，我老婆就喺機場番工既，琴日受咗傷送咗入醫院，我同個仔就即刻趕去睇佢啦，點知上到黎就塞車塞成咁，阿仔見好多人都落哂車，佢就都落車望吓啦，點知過咗一陣佢就急急腳走番黎，好緊張咁叫我即刻落車匿埋，咁呢度得條馬路邊度有地方匿啫，於是阿仔就塞咗我入車尾箱，話無論發生咩事都唔可以出黎，除非係佢放我出黎。我個仔好叻架，喺中大度讀醫，聰明仔黎架，所以我咩都聽哂佢講，拿拿聲匿入車尾箱。之後，我就不斷聽到尖叫聲、咆哮聲，然後又好似好多人嗌救命，過左個幾鐘之後，就冇哂求救聲，但係就持續有啲流浪狗喺度叫。我本身見都冇哂尖叫聲，應該冇事啦，就諗住出去睇下咩事啦，點知車尾箱竟然鎖住咗，我點嗌阿仔都唔理我，後尾我冇力就休息咗陣，到凌神三四點既時候，就俾槍聲嘈醒咗，我就好驚啦，香港好地地點會有槍聲？一定係有古惑仔喺出面開片，所以我就一路都唔敢出聲，直到頭先聽到你地把聲我先敢求救，好彩有你地咋，唔係我可能就要死喺個車尾箱入面。」中年男人一邊講一邊用佢既衫袖抹汗。

睇黎佢喺個車尾箱度匿埋咗咁耐，完全唔知發生緊咩事。
佢聽到既流浪狗應該就係行屍，亦即係瑪嘉烈爆發個幾鐘之後，西九龍公路就完全淪陷，上面既人唔係成功走甩就係已經被感染成行屍。至於佢聽到既槍聲應該就如我啱啱所猜測，警察喺夜晚既時候黎將行屍殺死。中年男人個仔，好有可能已經……

「阿生你貴姓，點稱呼啊？黎，飲啖水先。」阿文逕自喺我身後既背囊拎咗枝水俾中年男人。





「唔該唔該，我姓林，林志強。係呢，你地有冇電話啊？我部電話琴晚就冇哂電，我想搵我個仔啊。」林生好急、好快就飲哂枝水。

「林生，我諗你應該唔知呢兩日發生咗啲咩事。」我講完之後，林生一臉疑惑咁望住我。

於是，我地三個就好簡單咁交代咗呢兩日發生既事俾佢聽。

「……所以，你個仔好可能已經……」

「冇…冇可能…我個仔…我個仔好大隻架！佢一定冇事！我要打俾佢，我一定搵到佢架。」林生好激動咁講。





阿文將自己部NOKIA遞俾林生，林生熟練地輸入號碼。

「通啊！通啊！都話阿仔冇事架啦！」林生將電話放喺耳邊興奮地說。

嗯——嗯——嗯——
震動聲不斷傳出，泳茹突然走向我啱啱解剖過嗰條屍。

「林生，呢部電話……」泳茹彎腰執起部電話，原來係條屍格離部電話喺度震。

「啊！部電話係我個仔架！！你睇吓，係我地張全家福！阿仔…阿仔…」林生將電話搶過，打開螢幕，然後發現電話係喺屍體旁邊執到，唔通我啱啱解剖嗰條屍就係……

「你睇吓！你啱啱劏開咗人地個仔啊！你幾時變到咁冇人性架！」阿文激動到不斷揮舞手上既螺絲批。

「劏…劏…？」林生眼定定咁望住地下上面既屍袋，喃喃自語。





「林生，我頭先為咗觀察行屍既器官狀況而解剖咗呢具屍體，唔清楚佢係咪你個仔。不過喺我解剖之前佢已經變咗仲行屍，亦即係一早就死咗。」

林生既呼吸越黎越沉重，越黎越急速，佢擅抖既右手捉住屍袋既拉鍊，慢慢向下拉……