[校園鬼故事系列 2] [又係你呀陳生] 十不思議事件: （四十三）大結局！
雖然身體的力氣被完全奪走了，但我還是勉強張開我的雙眼，我可要見證著這臭邪靈，被封印的一刻！
「阿詩，來吧！快點把這該死的黃大一困起來吧！」我心想。
然後，我見有一個人慢慢走向操場中央，太好了！
但.…..怎麼感覺，阿詩的腿粗了這麼多？
還有，阿詩是穿著牛仔褲來的嗎？
我慢慢往上看，不對！這不是阿詩，這個人是正被通縙的黃強！
他好像注意到我看著他，他慢慢的轉過身，向我走了過來！
「傻仔！都話左你架啦！人係應該為左自己架嘛！你咁蠢走黎呢度，今次係咪又想害死佢地三個呀？不過唔緊要啦，我已經厭倦左再解釋俾你知，人性有幾惡劣！就等黃大一示範你睇，人可以有幾惡劣啦！不過，佢出返黎，唔知你仲有無機會睇呢？」黃強特意走到我的面前恥笑我的天真。
「唔好呀！依家可以收拾佢架！」我勉強發出聲音，但這瘋子根本不打算聽我的說話。
然後，只見他慢慢的把操場正中央的地方挖了起來，然後把那個埋在中央的公仔拿了出來！
「就係呢隻爛鬼野困住左黃大一？咁黃大一都唔係好勁者！等我解放你啦！」黃強邊說，邊把公仔上的時辰八字和符咒都拔了下來！
只見那個公仔四周，冒出了許多的黑氣出來，再次集結成剛才那熟悉的黑影！
「哈哈哈哈！陳子鋒，你估我真係咩都無準備就黎搶你個身體咩？我一早預左你會有後著，所以我一早已經叫黃強埋伏係學校，等到有意外嘅時候，就可以幫我！咁樣你無辨法同我對抗啦！」黃大一恥笑著我。
可惡，竟然忘記了黃強這個瘋子！這下子是徹底的輸了！
「陳子鋒，依家感覺係咪好慘呢？你明白人性嘅醜惡未呀？未嘅話，等黃大一拎左你嘅身體，你到時親睇睇住自己嘅軀殼，去殺你身邊人嘅時候，你就會體會得更深架啦！黃大一，郁手啦！快D入侵陳子鋒身體啦！」黃強像瘋了般叫喊著。
「痴線佬！你已經無利用價值啦！受死啦！」只見黑影揮了揮手，不知從哪裏飛來了一支樹枝，筆直插入黃強的身體裏！
「點解？我明明仲可以繼續幫你？」黃強按著樹枝附近，痛苦的坐了下來！
「點解？你唔記得你阿爺係點對我地條村咩？就係佢，先會造成屠村嘅慘劇，你死一萬次都唔會足夠！」黃大一說。
「哼！你唔好唔記得，我有你D骨灰，你搵唔到嘅話，對你黎講都唔係一件好事！」看來雖然受了傷，但並不致命的。
「呢層唔駛你擔心，我已經知道你收埋左係學校嘅入口，陣間我就會回收返，你可以去死啦！」
「點解你會知......」黃強還來不及說完整句說話，他便慘叫了一聲，然後倒了在地上！
「白痴！你呢D賤人死一萬次都唔夠！好啦，跟住落黎就到你啦，陳子鋒！」黃大一慢慢的走向我。
可恨的是，我連反抗的力氣都沒有，只能眼巴巴的看著他走過來！
「好！我鍾意你嘅眼神！其實你唔駛咁嬲咁望住我架喎！你死左之後，無人會知架，只要你D朋友唔好黎坑口村搵你，我就唔會殺佢地！我夠好人啦卦！好啦，我就好人做到底，最後呢個時刻，你有無咩說話想同某D人講？我可以幫你轉達架，不過當我見到佢嘅時候，代價就係佢嘅死亡，哈哈哈哈！」黃大一說著，把頭靠近了我。
「仆......仆街啦你！」我用盡所有力氣，作出最後的控訴！
「講粗口係唔岩架，不過呢個係嘅遺言，我就唔同你計較啦！你放心，入侵你之後，我唔會趕走你嘅靈魂，我只會將你所有嘅靈魂，削弱九成嘅力量！咁你就可以係無辨法抵抗之下，永遠睇住我點樣殺D村外人，一世內咎咁生活落去啦！我黎啦！」
黃大一說完後，我再一次感到無數的負面力量湧入我的體內！
對不起了大家，看來我的計劃失敗了，還連累了這麼多人，我真是沒有用處！
然後，我感到自己不是失去意識這麼簡單，而是靈魂的力量逐漸脫離自己的身體，這應該就是死亡的感覺吧！
我要死了，對不起，對不......
「死人鋒！你係度做咩呀？」一把熟悉的聲音向我傳來，是一名開朗的女士。
「我係邊個？你又係邊個？呢度又係邊度？」我對於自己身處在這片全白的空間裏，完全沒有感到恐怖，只是感到非常奇怪，我是誰？
「咩邊個，咩邊度呀！你同我醒下呀！」這美女用雙手夾著我臉頰，我感到一股暖流從她的手掌，傳遍我的全身！
當我感受到這種溫暖後，意識竟然清醒了點！
「咦？你係......小詠？」我總算辨認出眼前這開朗的人是誰了。
「係呀，白痴鋒！你又亂黎啦係咪呀？」她用責怪的語氣對我說。
「吓？亂黎？咦，係喎，頭先我對付緊黃大一架喎！我黎到呢度，者係話......我死左啦係咪？」我有點感傷地說。
「我咪叫左你唔好理呢件事囉，點解你一定要插手呀？凶相唔係講笑架！」小詠帶點怒氣的道。
「我只係唔想有後悔咁生活者，自從跟左天命叔學野之後，我就對呢D怪事無辨法視而不見！不過最遺憾係，連累埋天賜佢地！又見唔到屋企人同天命叔最後一面！」對，死亡我並不害怕，反而連累別人的感覺更令我感到失落。
「你呀，記住呀，唔好再亂黎啦，知唔知呀！」小詠抓著我的手說，我又感到一股暖流在身體流動著。
「仲記鬼記馬咩，我人都死左囉！不過死左都有個好處，就係可以陪下你啦，哈哈！同埋總算可以掂到你啦！」我笑說。
「你係咪傻架？死左仲掛住陪我？你咁樣會搞到我好唔捨得架！」小詠眼內仿佛閃著一點淚光。
「咁唔好咩？其實自從同你意識連接埋一齊，我地就好似好好好好嘅朋友一樣！依家有大把時間比我地好好相處！不過，唔知天命叔肯唔肯收我呢個鬼魂做徒弟呢，哈哈！」我說。
然後，我和小詠互相抓著對方的手，在這一片空白的環境下聊天，好不高興！
不知道是否錯覺，時間愈久，小詠好像愈來愈沒有精神似的！
「小詠，你無野呀嘛？點解你好似愈黎愈凍，愈黎愈無精神咁嘅？」我關心的問。
「無，我無野呀！你呢，仲有無覺得有野唔記得或者唔精神咁呀？」小詠問。
「咦？你咁講又真係奇怪喎，我好似愈黎愈精神咁！係咪我已經適應左做鬼嘅感覺啦？」我問。
「可......可能係啦！係呢，你仲記唔記得，對上一次我係你個夢入面，最後同你講左D咩呀？」小詠好像非常疲累，閉上了眼睛詢問我。
「我記得，你話你唔想我死嘛！對唔住囉，我無辨法做到啦！不過我可以應承你，我唔會再死啦！」我笑說。
「白痴！我都估到你唔記得架啦！我最後一句係話，我已經當左你係我親人，當左你係我個白痴細佬咁啦！」小詠說，怎麼聲音好像愈來愈小似的。
「係咩？你唔講我都唔記得，你年紀大過我添！我仲以為你當左我係你男朋友，原來係細佬，好彩者！」我裝作安心的道。
「咩呀，有我做你女朋友嘅話，你執到啦！你唔係嫌棄呀？」小詠說。
「係係係，你最好啦得未！我地跟住落黎仲有排見架，慢慢咁好好相處啦！」我說。
「我有D凍，可唔可以抱實我？」小詠說。
「哦，好，好呀！」我把小詠抱緊，又感到一股暖流傳遍身體，小詠應該也會溫暖起來吧！
不知道過了多少時間，我突然想起，我要問她為何又再次切斷了聯繫！
當我放開我的雙手，準備問她時，我竟發現她的身體正在消失！
「小詠！小詠！點解會咁架？發生咩事呀？」我急得快要流下淚來。
「無......無事，呢個......係我嘅決定，你要繼續......好好咁生存落去！」小詠說。
「你講咩呀？我唔明呀？我唔想你消失呀！」我說。
「無用架......我拜託天命叔，將我嘅力量傳俾你！我會消失架啦，記住......以後......要好好......好好照顧......照顧自己啦！佢地等緊你返去，你......唔好......唔好自責，係......係我自選擇嘅！」小詠說。
此時的我，已經淚如雨下，泣不成聲！
「抱......抱我，我想再次感受，你嘅心跳聲！」小詠說。
我點了點頭，然後抱緊了她！
我感到小詠已近乎徹底消失，我想也不想，把嘴唇湊了上去，深深的吻了她一下。
然後，她......就在我面前消失了！
在我面前，出現了一條透著白色光芒的道路！
我沿著道路，離開了那全白色的世界！
「子鋒！子鋒！」我聽到了熟悉的聲音，慢慢的張開了雙眼。
「咦，Irene？其他人呢？」我說完後，慢慢的環視四周，發現了數個熟悉的身影。
「天命叔！冰冰！雷少！仲有呢位係？」我問。
「佢係我師傅，黃立仁！」Irene回答。
「黃大一呢？仲有黃強呢？佢地點呀？」我問。
「放心啦，黃大一俾我同師兄一齊收拾左啦！等我睇過，放心啦，凶相消失左啦！」天命叔來到我身旁跟我說。
「究竟頭先發生咩事？」我問。
「等我講啦！」天命叔說。
－－－－－－－－－天命叔視角－－－－－－－－－
我和師兄連夜乘車回到香港！
原本是直接回家的，但我心裏就是有一股不安感，於是決定先來學校一趟。
來到學校門前，我和師兄感到一股非常強大的靈力！
「師兄，呢股力量好似好勁喎！」我說。
「超，有幾勁者？勁得過我同你？快D入去救人就真！」立仁說。
我倆跑入學校，發現Irene，天賜和阿詩全部暈倒在地上，只有一個人慢慢站了起來。
「哇哈哈哈！呢個身體唔錯，靈力高，夠年輕！雖然要D時間適應，但等我試下殺返一兩個人，應該就可以適應到啦！殺邊個好呢？」那人站在操場中央瘋狂大叫著，但我看清楚後，才發現這人竟然是陳子鋒，卻又不是陳子鋒！
「大膽妖孽，你究竟係咩人？點解咁夠膽奪取活人嘅身體？」無錯，面前的已經不是那小子，而是身體被邪惡靈體佔據的活死人，我......還是來遲了嗎？
「我係咩人？你地兩個先係咩人？咁大膽闖入我條村！」偽子鋒雙手一揮，整個操場瞬間風雷大作，氣溫驟降！而強風更帶有方向性的，向我和師兄襲來！
「哼，雕蟲小技！」我拿出桃木劍，刺穿了五道符咒，劍身立時光芒四射，更有電光附身！
然後我向前一刺，把襲來的強風硬生生給劈開！
「哇，好燥喎師弟！咩事呀？唔通果個細路，就係你成日提起果個？」立仁說。
我微微點頭，看著眼前的偽子鋒，竟感到不知如何下手！
「臭道士！有D本事呀！哼，同我出黎！」只見偽子鋒話音剛落，整個操場出現了無數靈體！
「等佢地同你玩下啦，等我完全操控呢個身體之後，我會再黎搵你地報仇！哈哈哈哈！」偽子鋒在和我們交手的一瞬間，感到實力不如我們，所以召喚其它靈體，只為爭取足夠的時間，把藏在入口處的骨灰拿走並且逃離這裏！
「師弟，隻野想逃走！」立仁邊說邊把那些襲向Irene、天賜和阿詩驅走！
我沒有理會師兄的說話，只是慢慢走向一個我不認識的小鬼身旁。
因為我看見有一個信封跌了在他身旁，那是我出發前，交給子鋒的信封！
「估唔到呢個信封最後連用都無用，結果都係保唔住你！」我略帶悲傷的看著眼前的信封。
「哈哈哈哈！臭道士，我走啦，我一定返黎搵你地報仇！咦！好痛！」偽子鋒來到校門位置，當他正想踏出校門時，發現像撞上一道厚實的牆般，被阻擋下來！
「你以為我真係會放過你咩？憑你係唔會離開到呢個結界！擁有呢個身體嘅細路，係擁有無限可能性，生性率直嘅人，唔係你呢種邪靈可以擁有！我只俾一次機會你，你離開呢個細路，我仲可以放你一條生路，淨化你嘅靈魂！」我雖然感到怒火中燒，但內心比任何時間還來得平靜，只是體內的靈力像洪水般翻滾著，隨時要破體而出！指向的目標，當然是眼前這可惡的邪靈！
「哈哈哈哈，臭道士！我唔會離開呢副身體嘅，同埋我已經吞噬晒呢個細路嘅靈魂，就算你殺左我，呢個細路一樣唔會復活！」偽子鋒這樣說著，這些話語實在不適合你。
「好，敬酒唔飲呀嘛？」我打開了信封，取出了內裏的九字護身符咒。
「細路，九字護身符咒，比你想像中嘅威力會大得多！原本呢道符，係可以引發你體內九成嘅靈力，去驅趕邪靈！但你依家用唔著，就等我黎用一次俾你睇啦！九字護身法！」我拿出符咒，以自身靈力展示出九字護身法，溫暖的金光在我設置的結界不斷重覆閃耀著，子鋒，這就當是我獻給你的餞別禮吧！
所有沐浴在這片光芒的邪靈，不是被驅走，不是被淨化！而是完完全全的消失在這個世界上！
「臭道士，你以為......我會輸咩？」偽子鋒狀甚痛苦的鬼叫著。
「哼！如果你無上佢身，或者可以同我地鬥下嘅！你以為真係可以咁快適應到活人嘅身體咩？你上佢身果一刻，輸，已經係注定嘅事實！」我看著偽子鋒說。
「無可能！無可能！」說完這句說話後，子鋒倒下了，失去了所有生氣。
所有事情就這樣完結了？不！
「哼，臭道士！夠膽整傷我！無辨法，只有先離開呢度，只要我嘅骨灰一日存在，一日都可以東山再起！」原來黃大一只是離開了子鋒的身體，隱藏在校內的某個地方，等待機會離開學校。
「天命叔，我地搵到啦，應該係呢個鐵箱啦！」只見兩人從外面進入到學校，是雷少和冰冰！
「唔該晒你地！好在有你地幫手係出面搵呢樣野，我先可以同師兄專心入黎對付呢隻野！」我說，然後把鐵盒交了給師兄。
「呢盒係咩黎架？點解咁重要？」冰冰問。
「呢盒？就係隻邪靈嘅遺物！等我睇下，原來係佢嘅骨灰！」立仁打開鐵盒說。
「師兄，交俾你處理啦，我靈力消耗得太大啦！」我說。
「好！」立仁拿出數道符咒，口中唸唸有詞，然後點著符咒，把它們放到鐵盒內。
「你地想做咩呀？俾返D骨灰我呀！」只見一道黑影從操場的正中央飄了出來，撲向立仁。
可惜已經太遲了，我伸出中指對著這邪靈，臉上露出恥笑的神情。
當點燃的符咒接觸到黃大一的骨灰，那團黑影發出痛苦的叫聲，並燃燒起來。
直到鐵盒內火勢完結，那黑影亦完全消散於虛空之中。
－－－－－－－－－天命叔視角結束，切換回陳子鋒視角－－－－－－－－－
「成件事就係咁啦！」天命叔對我說。
「吓，咁......咁你又話我死左嘅？點解我依家仲好地地咁係度？」我問。
「小詠佢......無話你知點解咩？你無見到佢？」天命叔說。
「小詠？係喎！小詠呢？我頭先真係有夢到佢，究竟發生咩事，佢係我個夢入面變到好虛弱，最後仲消失埋！究竟點解會咁？」我激動地說。
「小詠佢乜都無同你講？唉，佢真係......」天命叔抓了抓自己的頭，無奈地說。
「者係點呀？吓？你快D答我啦！」我激動地說。
「子鋒，小詠為左救你，佢已經消失左！」天賜走了過來，搭著我的肩膊說。
「消失左？者係點呀？佢又死多次呀？點解呀？點解呀？點解呀......嗚嗚嗚嗚！」我整個人像崩潰了般，哭了出來。
「子鋒！你聽我講！呢個係佢嘅選擇，你重視佢嘅，就唔該你以後更加珍惜自己！唔好再亂黎啦！」天命叔在我身上施展了降伏心魔指印，助我穩定心神！
「我......我......我應該點做？」雖然眼淚仍是不斷流下，但心情的確是鎮定了不少！
「應承我，唔好再咁衝動！遇到危險就唔好亂黎，你未有咁嘅能力！如果你唔想再好似今次咁，好想有足夠嘅能力！我收你做徒弟！我會將所有野教晒俾你！你依家嗌我一聲師傅，以後我就會好好訓練你！等你可以保護到想保護嘅人！」天命叔義正辭嚴的對我說著，令我感到很有說服力。
「跟你學野，就可以保護到所有人？」淚水慢慢停止了，我呆滯的看著天命叔。
天命叔重重的點了一下頭，給了我無限的信心！
「師......」可能是天意吧，明明下一秒，我便把餘下的「傅」字說了出來！突然間，雖然感覺很微弱，但一種很熟悉，很親切的感覺，在我心中散播開來！
「小......小詠？」我不自覺的說了出口。
「子鋒你講咩呀？咩小詠呀？小詠佢消失左啦！你快D嗌師傅先啦！」天命叔變得有點著急地說。
不對！感覺有點不太對勁！天命叔沒有理由會再次強調小詠消失左！
而且，他的神情為甚麼這樣緊張？
我看了看其他人！天賜他們的神情沒有太大的變化！
我唯有尋找著他們當中，最喜怒形於色的冰冰！
她怎麼像在忍笑般？
還有，現場的感覺好像不怎麼悲傷？
我本能地感覺到，有些地方很奇怪，要試探一下嗎？
「天命叔！我感覺到小詠呀！你快D救佢啦，佢仲存在呀，無消失到呀！」我說。
「你講咩呀？係咪神志仲係唔清醒呀？消失左就係消失左，點會係度呀？你快D嗌我師傅先啦！」天命叔緊張的說。
這感覺，果然有古怪！我警戒著的向後退，眼睛環視著四周，嘗試尋找著小詠的身影！雖然感覺微弱，但我肯定她仍然存在！
「算啦師弟，你呢招引人拜師嘅技倆失敗左啦！」立仁說。
「痴線，無可能，點會咁架？頂，我知啦！又係小詠壞我好事！」天命叔不忿地說，然後其他人也爆笑了出來。
「者係點呀，你地好講囉喎，小詠點解可以救到我？佢又點解會無事？」我對著他們說，只見天賜想回答，卻被天命叔阻止了。
「你地全部人聽住，唔準同呢個細路講個原因，邊個講出黎者係同我過唔去！新抱仔你都唔好一時心軟講俾呢個衰仔聽！明白嘅就答我啦！」天命叔說完後，向我露出一副陰險的笑容！然後眾人都即場答應了天命叔！
「喂！你地唔係聽呢個維園阿叔講野呀？快D講俾我知啦！」愈是不想我知道的，我就愈有興趣！
「蠢仔！佢地應承左我，你唔係以為會講俾你聽呀？黎啦，你拜我為師就話你知！」天命叔一臉淫笑地說。
「無可能，我唔會屈服係你嘅淫威之下！我自己去問小詠！」我說。
「唔得，你估佢救你唔駛付出代價架？佢唔會咁快可以同你溝通到架啦！拜我為師啦，呢個係最快嘅方法！」天命叔說。
原本，我也打算事情完結，拜天命叔為師，但這種威逼的手法，我是不會屈服的！
然後，在一片吵鬧聲中，事情總算落幕了！
黃強被送到醫院，經醫生診斷後，發現他精神失常，之前他犯下的案件，全因這樣撤銷了！但換來的，便是漫長的精神病院治療了！
也許，這樣對他來說，已是最好的結局了。
而我和雷少，也重新投入考生的生活中，每天也與Past Paper為伴！
之後，我當然有纏著其他人，詢問小詠的情況，但眾人也三緘其口，我甚麼也問不出來，後來，我只好答應了天命叔的某樣條件，以換取當日的情報！
最後，這學校稍後，也經常傳出不同的傳聞！
當然，傳聞只是傳聞，不會成為下一個不思議事件的了！
我，陳子鋒在這所學校的怪異事情，總算正式完結了！
其實，還有一些後記，尤其是小詠的部分，之後再詳談吧，接下來，我要好好享受餘下半年的學生生活了！
完