[校園鬼故事系列 2] [又係你呀陳生] 十不思議事件: （三十九）
我把事情都告訴他們後，便離開了醫院，一起乘車到了天命叔的道壇。
「哇，我好耐無黎過呢個道壇啦！」Irene說。
「咦，你以前成日黎架？」阿詩問。
「係呀，我師傅同天命叔係師兄弟，以前成日帶我過黎呢度玩架！果陣天賜唔太同人講野架！」Irene邊看邊說。
「好啦好啦！回憶果D野之後再講啦，依家最緊要諗辨法做低黃大一！」我跟他們說。
「老實講，得返一個星期時間，真係準備唔到D咩！Irene你應該經驗最多，有無咩諗法？」天賜問。
「老實講，我都唔係好諗到點做！因為以前都係跟師傅去除靈，就算係我自己除靈，師傅都會係我身邊幫我！而且佢連我嘅結界都破壞到，我暫時諗唔到D咩辨法......」Irene無奈的說。
「你地同我定喎，我已經諗到點對付佢啦！」我說。
「吓？你？」他們三人同時說。
「咩呀？未見過天才呀？話晒我都係你地之中最強靈力嘅人，你地唔係唔信我呀？」我說。
Irene用看著瘋子的眼神看著我，天賜則一副認為我傻了的樣子！
就連阿詩，都以懷疑的眼神看我。
「或者......阿鋒真係有辨法呢，係咪？聽下佢講......都無壞者......」雖然阿詩是這樣說，但那極度不信任的語氣，和那舉止，我是有多不被信任啊？
「你地幾個真係，點會懷疑我呢個天才架？我同天命叔去過咁多地方除靈，有咩未見過先得架？」我說。
「咁呀天才，你諗住點救你自己呢？依家人地擺到命要你條命，仲要拎埋你個核核突突嘅軀殼！老豆隻公仔未必幫你頂到架！」天賜說。
「痴線，咩核突，都不知幾型！不過呢個唔係重點！重點係，條友仔懶醒咁話左俾我知，佢嘅目標係咩野，呢個係佢最大嘅敗筆！既然佢嘅目標係我嘅身體，者係佢一定唔會用武力黎對付我，佢只可以透過精神力量黎直接入侵我！如果佢之前話我飲左佢D骨灰呢單野係真，咁佢唔需要再得到我同意就入侵我！成件事就變得非常簡單，我就俾佢入黎我個身體入面！」我說。
「咪住，你係咪唔記得左，佢之前出現係你個夢，已經降伏左你大部份嘅靈魂！佢一入侵你身體，就可以將你大部份嘅靈力趕走甚至消滅！到時就算制服到你之後消滅佢，你都會因為無左大部份靈魂而死架！你唔會唔記得堅嬸嘅情況架啦！」天賜說。
「你冷靜D先，呢個計劃係建基於，果個貼有我時辰八字嘅公仔上面架！」我說。
「哦，你係想佢入侵你嘅時候，個身體會成為你嘅替身，等黃大一依附係個公仔上面！」Irene說。
「無錯啦，呢位同學答得非常之好！靈體麻煩嘅地方，在於佢地係能量體，無辨法輕易隔絕或者打散佢地！所以大部份時間，對付一D比較強大嘅靈體，天命叔都會整定D結界黎削弱佢地嘅力量！但如果佢一旦附身係某D事物上面，就好對付得多啦！天命叔呢個開左光嘅太極袋，到時我地將個公仔放入黎，再用紅繩封口！就可以慢慢折磨佢啦！哇哈哈哈！」我拿出天命叔那個捉鬼用的布袋對他們說。
「聽落又好似好合理，的確，靈體力量再大都好，佢地依附左係某樣野度之後，要捉起上黎就易好多！只要我地貼定幾道符落隻公仔度，黃大一轉移過去嘅時候，一定會力量受損，就算消滅唔到佢，困住佢十日八日應該無問題！」Irene邊思考著邊說。
「嗱！係咪呀，既然天命叔就返到黎，咁肯定無事啦！」我笑說。
「聽落又好似幾可行咁！但如果你太順攤，黃大一可能會察覺到你嘅計劃！」天賜說。
「呢層我都諗定架啦，我地到時照帶定D野過去，扮同佢鬥過，到時黃大一肯定會對付我地嘅幾個，我地輸贏都唔緊要，輸左嘅話，黃大一會照計劃轉移到果隻公仔度！到時阿詩就係側邊埋伏，一見到我暈低埋，你就衝出黎幫手，將隻公仔放入袋度，再用條繩綁實個袋就搞掂！」我說。
「問題係，我地點知黃大一幾時會出現？同埋我同天賜點入去學校？」阿詩一語中的。
「呢層就......嗯......我諗，總會有辨法嘅！」我完全忘了這件事。
「仲話咩天才，咁嘅問題都無諗過！放心，要帶天賜同阿詩入學校一D都唔難，呢層我有計！但係黃大一嘅出現時間先係重點！依家學校已經無結界保護，我相信黎緊學校會不斷出現果D不思議事件，我地只可以靠不思議事件出現嘅時間去推測黃大一幾時會完全復活！」Irene說。
「吓，你唔打算重設結界？咁咪會有其他學生受害囉？」我說。
「呢層又未必！我估會遇到呢D不思議事件嘅，只有你身邊嘅朋友同幫你嘅人！者係好可能雷少佢地同我會遇到！至於其他學生，只可以賭下運氣，希望無野搞佢地！如果唔咁做，我地連估計黃大一出現嘅時間都無埋，到時就真係大鑊！」Irene說。
「咁樣......者係都要賭一鋪，點好呢？」我說。
「其實有個方法可以保護埋D學生嘅，不過呢個要同學校合作先得，唔係咁易做到！」天賜說。
「係咩方法？」我問。
「通告！將有保護作用嘅符咒，用隱形墨水畫係通告上面！然後派俾D學生，佢地只要帶住呢張通告，就可以起到保護作用！但係，要學校配合就真係困難D！」天賜說。
「呢層......交俾我同冰冰啦，我地可以同林副校商量下，畢竟林副校都算係受害者之一，佢應該會幫我地手！應該無問題嘅！」Irene說。
「咁就交俾你地搞啦，依家萬事俱備，我地只要等黃大一出現就得啦！今次真係可以埋佢單啦！」我高興的說。
「唔好扮晒野，你都要一齊畫符呀！同埋，我地都要準備定D符咒，呢次唔係玩玩下架，老豆講過你呢一劫好大鑊，唔好放鬆落黎！」天賜說。
「放心啦！我已經係陳子鋒加強版，唔會再俾佢搞到失晒常！我點都會頂到天命叔返黎嘅！」我說。
「加你個死人頭！快D執埋D道具啦！我地呢個星期有排忙，雖然通告可能有效，但以防萬一，我地要暗中保護其他學生架！」Irene說。
於是，我們盡情的搜掠天命叔的道壇！
然後，我看到天命叔第一次教我畫符的道具，看到這個道具，不禁回憶起和天命叔學道的情況！
「如果今次有命返黎，我就同你學......」我手上拿著那硃砂筆，心中準備立下決心，卻被天賜的聲音打斷了我的思緒。
「行得未呀死仔？」天賜說。
那些想法，還是讓我活著回來後，才好好考慮吧！
但不知怎的，感覺好像有一些東西忘記了的！
這東西更可能把整個計劃給打亂！
算了，不多想了，我一定會無事的！