[校園鬼故事系列 2] [又係你呀陳生] 十不思議事件: （三十二）
「搞到咁大件事，應該好多人知先岩架？但係我同冰冰去搵新聞嘅時候，完全搵唔到呢單報導！」阿詩問。
「呢層，我阿叔有講過，因為當時在場嘅人，係事後接受調查嘅時候，全部都無左果段記憶！佢地只係記得周太講左一句野，佢地就暈晒！阿叔當然無同D差佬講個真相啦，反正都唔會有人信！」雷少說。
「咁之後點解又會請你叔叔去除靈？」阿詩問。
「其實係我阿叔主動搵佢朋友，即係保良局其中一位董事，同佢講返當日禮堂嘅真相！果個董事雖然信我阿叔，但因為成件事要其他董事都同意先可以進行，所以果位董事就要求阿叔將失去左意識嘅委員救返醒，咁佢就有多D籌碼去說服其他董事！」雷少回答。
「救返醒佢地？點救呀，你阿叔又唔係醫生？」我問。
「其實……果幾個人其實同死左係無分別！因為佢地嘅靈魂有九成都俾黃大一吸收左，所以......阿叔佢就搵左其他教派嘅人幫手，去做左D野，令到果幾個委員可以去說服D董事。之後嘅除靈，之前都有講過，我就唔重覆啦。」雷少說的時候有些不自在。
「做多D野，你指嘅……唔通係招魂？」天賜問。
「唔係，天命叔曾經講過，如果係幫活人進行招返佢自己嘅魂魄，前提係佢地嘅靈魂仲存在係呢個世上！我估……果幾個委員，唔係招魂，而係被某D師傅，用左D靈體上佢地身，再去說服D委員！但係……呢種做法，原本D委員嘅靈魂，就剩返好少部分，只係可以維持住身體生存嘅最低基能！如果有其他靈魂入侵嘅話，好有可能，令到剩低嘅靈魂……都消失埋！之後當靈體離開之後，身體會因為失去埋最後嘅靈魂，因此而死亡！」我看著雷少，用沉重的語氣說。
「咁……咁者係殺人者？用完佢地嘅身體，之後……佢地會……咁佢地嘅屋企人會點？」阿詩說。
「唔咁樣做，你估董事會班人會咁易俾佢地去法事咩？果陣，黃大一嘅力量一日比一日大，佢地當時做左幾多野，去同佢地屋企人溝通，等佢地明白果幾個昏迷左嘅委員嘅情況！而且，阿叔同佢位董事朋友，已經盡力去幫佢地嘅屋企人！董事會撥左一筆錢俾佢地，等佢地嘅屋企人，至少唔駛為錢而煩！你估我阿叔好想咁做咩？佢係佛教徒，佢好相信因果報應！做D咁嘅事，你估又好會好過咩？」雷少稍為激動地說。
眾人聽完後，都沉默了！
當時的情況如何，難道我們能這麼輕易的去判斷嗎？
要是我們身處當時的情況，我們能保證能找到更好的方法嗎？
「好啦！過去點樣都好，都已經成為事實，我地不如諗下，黎緊點做好啦！比起黃大一，我始終比較在意黃強！假如黃強真係幫緊黃大一，點解要俾本記事簿我地？俾我地知道咁多野！」我改變了話題，向眾人提問。
「會唔會諗住俾我地睇完之後，希望我地驚左唔再插手呀？」冰冰天真的問。
「肯定唔會！會唔會，佢地根本唔介意我地知道所有野，因為對佢地根本無影響！」雷少問。
「我反而覺得，本簿會唔會係張伯，自作主張咁俾我地？」我說。
「點解你會咁諗？」天賜問。
「頭先你俾本簿我嘅時候，我發現本簿嘅封底，有一張紙係另外貼上去！有一個『幫』字寫左係上面！」我展示剛剛發現的紙張！
「但係，一個咁嘅字，其實證明唔到D咩！而且，可能係想引我地去幫手，再對付我地！」Irene說。
「Irene講得無錯！其實無論收到D咩字，我估大家都無諗過唔插手呢件事架啦？」天賜問，並轉過來望向我。
「哼！緊係啦！隻野由我入學搞到我依家！遇到咩我都唔會放棄架啦！反而係你地，好明顯由始至終，黃大一嘅目標都係我！我唔知佢睇中我靚仔定有型啦，但你地其實可以唔駛繼續參與！你地都聽到，果D不思議事件，真係有機會死人！我建議你地認真考慮下退出，阿詩，雷少，冰冰！」我認真的說。
他們都只是堅定的看著我，完全沒有退縮的打算！
「喂！你做咩唔叫我退出呀？我都係一個柔弱嘅女仔黎架喎！」Irene目露兇光的看著我。
「大姐，我邊敢叫你退出呀！果日叫你係學校暫時撤退，你都想殺左我咁！今次我叫你退出，你仲唔係黃大一殺我之前做低我！」我說。
「死仔，唔好亂講啦！呢次無論有幾大鑊都好，我都唔會俾你死，你放心！」天賜拍了拍我肩膊，示意我安心就好！
「咁好啦，大家都唔好講咁多啦！聽日我地再係度集合啦，集合完之後一齊去搵張伯，多個人多對眼，應該可以搵到D線索嘅！之後我都有野要同你講，係關於封印嘅，後日，星期一返到學校，我要你地幫手去佈置果個封印！如果成功嘅話，可能根本唔需要理佢D咩陰謀，直接等師傅返黎再收伏佢就好啦！」Irene說。
這晚，我們都各自回家，但就在我們熟睡的情況下，坑口村發生了一件事。
───────────坑口村，張伯視角───────────
今天，在那兩名青年來到黃強家外時，黃強通知我，讓我把他們引開。
本來一切也很順利，也按照黃強的指示，把筆記簿交給他們。
但想不到，他們竟然還想進入黃強的家中，我只好先躲在房間，並跟黃強聯絡！
只是，我還沒有告訴黃強詳情，已收到他的訊息，告訴我他已處理好屋中的東西，若那兩名青年想去他的家中調查，讓他們過去就好！
所以，我把他們都帶到那間屋中！
在進到屋中的時候，感覺十分懷念，因為黃強在這數年間，也不願意我進入他的屋子！
害我有些時間想緬懷一下我的好兄弟也沒有辨法！
自從他跟我說，他知道他爺爺和詛咒的事情，再加上我和立成的約定，我便決定盡量不去管束他，只希望他能活得開心！
「立成！我唔知咁樣算唔算遵守左承諾，但我已經盡量去幫你個仔！佢好似幫緊黃大一，希望佢咁樣做，可以真正地擺脫黃大一對你地嘅詛咒啦！」我拿著當年和立成的合照概歎著，希望我這樣真的是幫到黃強吧！
晚上十時，在我準備睡覺時，我竟收到黃強的電話。
「喂！阿強！咩話？好啦，咁我過黎啦，你等我一陣！」我把電話掛上後，馬上跑到黃強家裏。
「阿強，咁夜搵我做咩呀？」我推了門進去，只感到被人掩著鼻和口，然後失去了意識！
「點解咁熱嘅？」不知道過了多少時間，我感到四周好像非常熱。
我勉強睜開雙眼，發現我正身處在一片火海之中！
然後，我透過窗子，勉強看到，黃強正站在屋外看著我！
「點解呀？阿強！我已經盡量幫你，點解你都要咁對我？」我在屋內這樣大喊著。
我當然得不到任何回答，只見整間房子都是熊熊烈火，看來黃強是非殺死我不可了！
看來，上次看到黃強在埋藏那個東西時，他已經不希望我繼續留在世上了！
對，只有死人才能保守秘密。
我走到電視機前，打開了電視機下的櫃子，果然，那東西已不見了！
「立成，我終於可以黎探你啦！希望你會原諒我，我始終無辨法幫你照顧黃強到最後！」
接著，我被濃煙嗆得再次昏倒過去，我應該是死定了！
在暈倒後，我好像看到立成在我面前出現，看來，他是來接我了！
然後，我便被這片熊熊烈火給淹沒了！
─────────────張伯視角結束─────────────