[校園鬼故事系列 2] [又係你呀陳生] 十不思議事件: （二十七）
我把剛才得到的資訊，有條有理的整理好，把我的想法全都告訴了在座的人。
「一開始阿詩提到，見到有個同黃強一模一樣嘅人，已經由張伯口中證實，應該係黃一明黎！臉相住宰命運，所以佢地個樣幾乎一樣並唔係無道理！因為佢地世世代代，都受到黃大一嘅詛咒！但問題黎啦，究竟張伯邊D係講真，邊D係講假呢？就算聰明如我，去佢間屋睇，都係睇唔出有咩破綻！」我這樣說完，隨即換來全場冷冷的目光。
「咳！咁你兩個有無偷偷咁試下扭開水喉，又或者開燈咁？」天賜問。
我臉色立刻一沉，答案當然是沒有。
「係啦，如果有人住，就算再慳憸嘅人，都一定會用到水同電，呀天才你唔係無留意呀？」Irene故意提高聲量問我。
「咦，你咁講起！我頭先係廁所洗手盤，見到係有水跡架！應該有人用過！」雷少這樣說，害得我更加無地自容！
「嗯，太好啦，咁至少已經證實左張伯一定有所隱暪！而且隱暪嘅，一定係同黃強有關嘅野！」天賜說。
「點解你咁肯定張伯淨係隱暪左黃強嘅野呢？」我問。
「其實好簡單者，你諗下，張伯如果要作故仔嘅話，佢無理由連埋本記事簿俾你！因為我地總有方法，可以證實入面嘅真偽！例如好似阿詩佢地咁，透過報紙，甚至乎用尋人方式，證明入面嘅內容！所以，基本上呢本簿係無野值得懷疑！換言之，我地最少知道晒十不思議事件嘅內容同埋坑口村詛咒嘅真相！甚至乎，我覺得張伯係有意俾你地知道呢D事！」天賜說。
「吓！呢層又點解呢？」我問。
「好簡單者，你諗下，你地一開始係屋出面徘徊，張伯居然係自己行出黎同你地講野！但如果係一般正常人，你見到鄰居出面有可疑人物，會唔會自己走出去阻止佢地？我估正常都係唔理，或者幫手報警！所以一開始張伯的行動已經好有問題！而我估計，你地順利拎到本簿，都係因為張伯有心俾你地！應該話，有人叫張伯俾你地！」天賜繼續分析。
「咪住先，名偵探，又點解會係有心俾我地呢？」我問。
「呢層其實我都係估估下，你諗返頭果幾單不思議事件，其實都係透過黃強把口講俾你地聽！假設張伯真係同黃強仲有聯繫，咁成件事就講得通啦！因為黃強仲未將所有不思議事件話晒俾你地知，所以想透過張伯，等我地知道埋剩低嘅不思議事件！而且，進一步推測，張伯除左想俾你地知道返成件事嘅真相之外，佢應該仲想引開你地，唔好去果間屋入面！你有無發現，當你地話要去間屋嘅時候，張伯有咩奇怪嘅舉動？」天賜問。
「我記得，當我地話想去間屋嘅時候，張伯臉色有少少奇怪，之後就入左房搵鎖匙，好似無咩異樣！」雷少答。
「咁佢有搵鎖匙果陣，有無閂門？」天賜續問。
「頂你，你跟住我地去架？佢真係有閂門喎！」我回答。
「其實都係少少推理者，正常身有屎嘅人，先會拎少少野都閂埋房門拎！我估佢當時係房入面做緊D野，可能係通知緊黃強間屋入面嘅人，話佢知你地要去果間屋，叫佢盡快走！」天賜說。
「者係話，根本一開始，間屋就有人係入面？佢唔想我地發現，所以叫張伯引開我地！咁，入面果個會係咩人？」雷少說。
「入面果個，好大機會係黃強！你諗下，唯一一個，唔可以俾你地見到嘅人，就係聲稱休學嘅黃強！如果你地見到佢，好可能會即場捉住佢，咁可能會影響左佢嘅計劃！」天賜說。
「計劃？會係咩計劃呀？」我問，然後所有人用期待的眼神看著天賜。
「嗯……復活黃大一卦！」天賜把我們心中最不想知道的答案說了出來。
「始終依家資料太少，我仲未可以完全確定！但仲可以推測嘅係，張伯引開你地，之後再俾你地入間屋，證明間屋係無特別！咁樣反而引起我嘅疑心，我覺得黃強係收埋左甚至消滅左屋內嘅某D野，等你地就算去搵，都無辨法搵到任何野！但如果係咁，我地之前推測黃大一呢個邪靈嘅轉變，就會錯左！」天賜補充。
「無錯，之前我地懷疑，黃大一之所以襲擊身為本區嘅雷少同冰冰，係因為佢俾人控制！但依家，感覺反而係黃大一控制左黃強去幫佢手！關鍵嘅黃強，我地始終都搵唔到！可惡！」我說。
「不過，我覺得有D野我地可以做！就係再去多果間屋一次！」天賜說。
「仲去？你唔係話黃強應該消滅晒所有重要嘅野咩？」我問。
「係！不過諗深一層，如果D野係重要嘅話，好有可能只係收埋左！而且，係咁急嘅情況下，佢要整走晒D野，肯定會有線索留低！如果好彩嘅話，其實我地可能搵到D重要線索都未定！」天賜說。
「無錯，你講得好岩！我地應該再去搵下D線索！雷少，行啦！」我拉著雷少準備離開。
「你地去邊呀？」天賜制止他們。
「吓，又係你話嘅，要去搵線索嘛，梗係愈快愈好啦！」我說。
「依家都夜晚啦！如果你突然間又去搵張伯，佢肯定會懷疑你地去搵線索！到時佢可能大條道理唔俾你地去果間屋！之後佢會再徹底消滅屋入面嘅證據，咁就真係乜都無啦！都係襯依家搵個好嘅理由，聽日再去搵佢，咁會自然好多！同埋，你地拎返黎本記事簿，我地都未研究清楚！仲有剩低嘅十不思議事件！我地今日都係專注係呢邊先啦，聽日先再去搵張伯！」天賜解釋。
「好啦，你話點就點啦！」天賜果然是值得我信賴的好兄弟，總能在緊要關頭幫助我！
「我都好想繼續討論！不過……我好肚餓，可以食完野再傾嘛？」冰冰捂著她的肚子說。
「好啦，咁一於食完野返黎，再慢慢研究埋本記事簿啦！」我提議。
此時我還不知道，我們之後，會為放棄立即去找張伯這個舉動，感到後悔！