[校園鬼故事系列 2] [又係你呀陳生] 十不思議事件: （二十六）

「張伯，好多謝你講左咁多野俾我地知！但係呢，我想問下，可唔可以帶我地去阿強以前住果間屋呀？」我問。
 
「點……點解你地想過去睇？」張伯臉上閃過一絲奇怪的神色。
 
「哦，因為你講過黃強已經搬走左幾年！但雷少明明兩年前曾經去過佢屋企，我想上去睇下，究竟有無留低D咩線索者！」我說。
 
「咁……都無問題嘅！不過你等我一陣，我入房拎埋條鎖匙再同你地去！」張伯說完，便走入了房間中。
 
「雷少，張伯好似有D野隱暪！」我小聲的跟雷少說。
 




「嗯，你頭先話想去果間屋果陣，佢明顯有D奇怪，但其他野佢又唔似講緊大話！」雷少小聲的回應我。
 
「好啦，我搵到鎖匙啦，我地依家過去啦！」張伯隔了一會兒，然後由房間走出來。
 
之後，我們一行三人來到黃強的屋子前面。
「雷少，點呀，有無咩特別發現？」我跟雷少說。
「無，同我記憶中差唔多，都係D舊傢私咁！」雷少說。
 
只見張伯一直站在其中一個房門前。
「張伯，唔好意思，我想入去望下！」我指著房門說。




 
只見張伯看了看我，然後慢慢的把房門打開了。
「雷少，你入黎望下！」
 
我和雷少大約花了差不多三十分鐘在屋裏檢查，但甚麼也發現不了，是我想錯了嗎？
 
「張伯，唔該晒你呀，咁我地走先啦！」我對張伯說。
「你地自己小心D啦，有野想知你地再返黎搵我啦！」張伯對我們說。
 
就在我倆走後，張伯對著屋子說：「阿強，我已經幫你將以前坑口村發生嘅事，同埋詛咒嘅真相講左俾佢地知……其實……你唔真係唔需要為黃大一做到呢個地步！」




 
黃強：「張伯……黃大一係俾我爺爺害死！我無辨法唔幫佢，即使……佢係要我殺人，我都會照做！」
 
張伯搖了搖頭，回到了自己的家中。
 
我和雷少離開了坑口村後，在途中開始討論整件事。
「子鋒，點解頭先你要去黃強間屋？」雷少問。
 
「因為我懷疑張伯隱暪嘅野，收埋係間屋度！」我回答。
 
「雖然張伯嘅態度有D古怪，但點解你會懷疑間屋有古怪？」雷少問。
 
「其實係去到好後期我先發現有問題，你記唔記得我地原本係間屋出面行緊嘅時候，間屋咪落晒窗簾嘅？」我問，雷少點頭示意。
 
「但你咪講過，你上過去間屋，當時係睇到出面架嘛！同埋，張伯話佢兩年幾無去過間屋！咁即係話，間屋唔係一開始就落晒窗簾，至少，你去搵果個黃強嘅時候，間屋D窗簾係打開嘅！」我說。




 
「咁……可能只係黃強佢偷偷地入左間屋者。」雷少說。
 
「當然有可能，但你諗下，你果次上去嘅時候，除左傢俬舊啲之外，有無好多蜘蛛網或者昆蟲之類？」我再問。
 
「咁……咁又無喎！」雷少說。
 
「即係話，間屋無人住嘅說法，係唔成立！咁好啦，如果間屋係有人住，兩年黎唔俾張伯發現嘅機會率又有幾高呢？而頭先，當我地去到間屋果陣，隨左D舊傢俬，其實全間屋都好乾淨！而且，頭先係間屋入面嘅時候，張伯淨係望住我地，俾著係你，一個對自己都叫有價值嘅地方，多多少少都會想周圍望下啦，但張伯完全無咁做！而係最後，我同張伯講要入間房望下，佢好自然咁拎鎖匙出黎，但呢個行為好古怪囉！」我說。
 
「吓，有咩咁古怪？」雷少問。
 
「你諗下，你會唔會下下出門口果陣都鎖房門？正常都唔會啦！而且入到去，張床係特別整齊同乾淨，擺到明係有人訓架啦！」我說，只見雷少傻傻的看著我。
 
「估唔到……子鋒你……原來比睇起上黎聰明！」他發自內心的道。
 




「痴線，我不嬲都醒！」這說話，我怎麼好像在哪兒聽過似的。
 
「所以，我懷疑緊幾樣野！第一，張伯應該知道黃強未死，佢頭先只係作D理由呃我地！」我說。
 
「吓，頭先張伯講果D理由，我聽落無咩問題喎！」雷少說。
 
「梗係唔係啦！佢話送左黃強去外國讀書，之後有人通知佢黃強死左！首先，張伯點睇都唔似識英文！而且，如果黃強真係死左，點解張伯間屋，淨係得黃立成嘅神主牌，而無黃強嘅神主牌？」我說，雷少對我點頭示意我說得對。
 
「第二，間屋應該係有人住嘅，但究竟係邊個住呢？假設黃強真係未死，我估佢其實一路都住係果間屋！而且張伯亦都應該係知道嘅！第三，亦係我最唔明嘅地方，如果張伯真係隱暪緊，點解仲要俾咁多野我地知呢？」我說。
 
「我都係無諗到咁多！不過唔緊要，我地拎埋D資料上去Irene屋企！天賜同阿詩應該幫到手諗！」雷少提議。
 
「咩呀？依家者係話我唔夠天賜醒者？」我看著雷少，但這小子卻避開了我的視線！
 
「你講清楚先好上去呀，唔好扮晒野唔答我呀！」我追著雷少進了Irene住的大樓。




 
「叮噹」，我按了按門鈴，然後Irene讓我和雷少進了屋子裏。
只見天賜和其他人，已經都聚集在一起討論著。
 
「喂，你兩個搞咩黎，去左幾個鐘？」天賜問。
 
「我地已經知道左淨低嘅十不思議事件，同埋呢件事發生嘅原因啦！但睇黎你地已經搞掂晒，不如你地講下依家個情況先！」我說。
 
「咁等我講先啦！我同冰冰去左圖書館搵返D資料，證實左黃強講嘅野係真嘅！陳太，李生佢地真係入左去精神病院！而且，我地仲發現左D野，呢幾張相，係日佔時期嘅一D新聞黎，原本我地係想證實一下，係咪真係有一批日本人死左係坑口村！但我地無意間發現，呢度居然發現左同黃強一模一樣嘅人！我地岩岩討論左一陣，估計係黃強嘅爺爺，但實在太似，似到令人難以相信！」阿詩說。
 
「嗯，呢點我地頭先已經係坑口村證實左！呢個應該就係黃強嘅爺爺，黃一明！佢地嘅樣咁似，可能同詛咒有關，不過陣間再詳細同你地講，仲有無其他發現？」我說。
 
「其他都係一D零零碎碎嘅資料，作用唔算大！仲有呢篇城市傳聞囉，擺左係副刊！話D村民發埋同一個夢，係關於一D詛咒嘅野黎！」阿詩補充，我和雷少對望，又多一樣東西被證實了，看來張伯的資料還是正確的！
 
「而我就返左去道壇，拎晒老豆D道具過黎，我已經分好左六份，大家最好隨身帶住，始終唔知幾時會有事發生！」天賜說。




 
「咦，呢袋又係咩黎架？」我指著一個黑色的密封袋子。
 
「哦……呢袋係我自己D道具黎，用黎辟邪！」天賜這樣解釋，但其實這袋裝著的是子鋒的時辰八字。
那麼，天賜為甚麼要隱暪呢？
因為天命叔早已吩咐天賜不要告訴子鋒！
 
「衰仔，呢一袋野，可以話係子鋒嘅救命符黎，你唔想佢死嘅話，就好好記住我跟住落黎講嘅野！首先，入面有一件道袍，一個稻草公仔，另外有D符同埋子鋒嘅生辰八字！你要做嘅野，就係唔俾其他人知嘅情況下，將個公仔用道袍包起黎，之後用符施法，最後將時辰八字溶入公仔入面！之後你將個公仔擺係學校至陰嘅位置，咁樣呢個公仔，就可以代替子鋒受一劫！而絕對唔可以俾其他人知，因為愈多人知，隻邪靈察覺呢隻公仔機會就愈高！到時隻公仔就會無效架啦！明唔明？」天命叔曾這樣對天賜說。
 
「同埋，我同Irene已經研究好有咩結界可以用！之前雷少嘅叔叔連同差唔多十位佛教中人，都無辨法完全封印隻邪靈，憑我地幾個嘅力量，根本好難同佢對抗！所以我地決定用一個消極嘅方法，就係整個時空結界，令到結界入面嘅時間，流動得好慢，拖到我老豆同Irene師傅返黎再算！」天賜說。
 
「無錯，我之前用黎鎮壓隻邪靈嘅結界，有效時間愈黎愈短！證明佢嘅力量比我強好多！所以只好利用拖延時間呢招！我地星期一返到學校，就要施展呢個結界，希望捱得到師傅返黎！」Irene附和說。
 
大家匯報完後，都把視線看著我和雷少。
好吧，讓我把發現的事情都告訴大家，看看天賜他們會否有新的想法吧！