[校園鬼故事系列 2] [又係你呀陳生] 十不思議事件: （十一）
「咦，呢度係邊度？」我環視四周，只見白濛濛一片，甚麼也沒有。
突然，我感到背後傳來一股很強的壓逼力！
我往後一看，只見一道非常巨大的黑影，從高處凝望著我。
那隻射出綠光的眼睛，我好像在哪裏看過！
對了，上次在學校，給林副校訓話時，我忽然感到有陣強風掠過，最後我便見到眼前的這個黑影！
只是，相比第一次，這傢伙卻要比那時大得多！
「你究竟係咩人？唔係，你究竟係咩鬼野？我明明仲係個結界入面，係咪你帶我入黎呢度？」我指著那黑影大叫。
那黑影沒有回應，只見它的嘴部，其實我也不知應否稱那個為嘴！
但明顯的，它給我的感覺，就是對著我笑了笑！
然後，它的手以很快的速度拍向我！
「仆街，聲都唔出就拍落黎，呢次死緊啦！搏一搏啦，劍指！」我心想，反正也是死，怎樣也要賭一把，我把劍指刺向它。
這畫面若在電影出現，想必非常滑稽！
試想像一部高達，正以高速用它的鐵拳打向你身上！
而你卻只拿著一隻鐵叉刺向它，這不是瘋了嗎？
就在我的劍指快要碰到它的時候，我忽然感到，有一種世界崩壞了的感覺！
不，這不單是一種感覺，我看見這白濛濛的世界，開始出現一道又一道的裂痕！
而那黑影明顯也發現了，只見它也停了下來，默默看著這些裂痕出現！
一瞬間，所有東西消失了，四周變成漆黑一片，我亦暈死過去。
「喂，仆街仔！醒呀！喂，醒呀你！」我忽然聽到一把熟悉的聲音呼喚我。
我微微睜開雙眼，只見有兩個非常熟悉的身影出現。
我還沒有來得及分辨出這兩人是誰，臉頰忽然傳來又熱又痛的感覺！
「哇，屌，點解我塊面咁撚痛架！」我勉強用雙手摸了摸自己的臉頰，感覺像腫了一些。
「哇，校園暴力呀，咁靚仔都打面，無人性架！咦！天賜，阿詩，你地係度做咩呀？」我感覺意識清醒了許多，才發現眼前這兩人是我的好朋友，這該不會又是夢吧？
「做咩？好在我醒水，驚你條死仔包有事，所以一早係阿詩屋企等你，見你十二點都無搵我，我咪即刻同阿詩衝過黎搵你囉！」天賜說。
甚麼，十二點？已經過了這麼久嗎？天賜又是怎樣能救我的？
慢著，好像有甚麼東西遺留了似的？
「阿詩，你幾時搬左黎坑口架？你唔係住觀塘嘅咩？」我問。
「我兩年前同屋企人搬左黎坑口啦，如果唔係我點識叫你黎呢度重讀喎。同埋我諗住可以隨時幫你補習呀嘛。」阿詩對我說。
原來如此，但我想確定的才不是這件事。
我站起來，拍了拍天賜的肩膊，用認真的眼神看著他。
「做咩呀？你唔係想講多謝果D咁老套嘅野呀？」天賜看著我，而我則搖了搖頭。
「恭喜你！你終於同阿詩同居啦！」我認真地對他說，然後我的肚子吃了重重的一拳，怎麼感覺這麼熟悉？
「搞錯呀！我傷者黎架，仲打我！話時話，我塊面鬼死咁痛，唔係又係你做架？」我掩著肚子說。
「仲好講，黎到搞左我一大輪，之後見到你死左咁，咪大巴大巴摑醒你囉！」天賜對著我說。
「陳同學，你可唔可以講下呢兩位係咩人？同埋點解我地會出返黎？」林副校向我詢問，原來其他人都是清醒的，看來只有我是暈倒了的。
「哦，佢兩個係我以前D同學兼死黨，天賜同阿詩！至於點解會出得返黎，要問下呢位10A嘅張天賜同學啦！不過，係天賜講返佢英勇嘅事積之前，我想知道，究竟頭先我暈左之後，發生左D咩事？」我望向林副校眾人，希望能有誰先說明一下剛才的情況。
「等我講啦，頭先你幫我地開路果陣，你嘅神志愈黎愈唔清醒，去到最後，岩岩開到路入去學校嘅時候，你就突然間暈左。好在我一路跟係你隔離，即刻扶起你，然後同其他人一齊走去操場中間。果陣D黑影仲離我地好遠，所以冰冰就負責照顧你同叫醒你，其他人嘗試破壞結界！但遺憾嘅係，我地無辨法撕爛張符咒！我同我阿爸阿媽諗左好耐，都記得阿叔講過，係結界入面，要破壞結界就一定要用靈力去破壞，當初佢只教左我地用香去燒著呢D符，去破壞結界。所以我地試到最後，D黑影愈黎愈近我地，我地會部都已經抱住放棄嘅心態！點知突然間，我地見到符咒位置，開始出現裂痕，而且個裂痕愈黎愈大！之後，我地感覺好似俾一股強大力量吸走咁，跟住就成功返黎現實世界啦！」雷少負責解釋。
待雷少解釋後，我望向天賜。
「我尋晚咪同你講左，十二點前無收到你電話，就會黎搵你！我同阿詩係屋企等你電話，去到十一點左右都仲未等到你電話，同阿詩商量完之後，就決定早少少黎到學校！黎到嘅時候，原本都唔知應該點樣幫你，就去左你提過嘅牌坊檢查下。跟住我地發現，牌坊入面有道符，不過已經爛左，無晒靈力！果刻我地都好擔心你，又唔知點算。但係突然間，我見到學校有一道金光出現，我地兩個即刻衝去學校。發現校門居然無鎖，同埋個校工唔知係暈左定訓左，所以我同阿詩就諗住入去！但發現居然有一道無形嘅牆，好在我帶左老豆D符同埋銅錢劍過黎，總算入到學校。之後就見到球場中間，有一個地方發出好微弱嘅金光，去到見到有道符係度。本來都諗緊點算，都唔知應唔應該破壞道符，但我地地係道符度，隱約見到你地俾D黑影襲擊緊，無辨法之下唯有撕爛道符，只後你地就出現返晒啦！」天賜解釋著。
「哇，你條友仔，咁無把握嘅野都做，我死左咁邊個做你同阿詩結婚嘅伴郎呀？」我拍了他一下，然後擋著他打向我肚子的拳頭，但頭部卻捱了他一掌！
「早知唔過黎救你，講咁多廢話！」天賜這樣說著，阿詩則臉紅紅的站在一旁，天啊，我何時才能找到這種溫婉的女朋友！
「咁……依家我地係咪者係無事啦？」冰冰小心翼翼的詢問。
「係，無左結界，以後都唔會再發生D唔見人嘅事啦！」雷少攬著冰冰說。
在場的各人都攬著自己的伴侶，場面好不溫馨，只餘下我和林副校，唉，毒撚的命運！
然後，只見林副校慢慢走向我，該不會他也想攬著我吧？
「嗱，呀林副校，我唔岩呢D野架，同埋我知你結左婚，你都係返屋企慢慢攬你老婆啦！」我不自覺向後退了一步，然後雙手向推並左右搖動，表示拒絕他的擁抱。
「陳同學你講咩呀？咁岩呢D唔岩呢D呀？你係咪仲係神志不清緊？」林副校以奇怪的眼神望著我。
「呀，無，可能岩岩清醒，所以仲係暈暈地，所以亂講野者，無事嘅，哈哈！」看來他並不是想擁抱我，我馬上編了些藉口敷衍他。
「我係想同你講聲對唔住，之前係醫療室叫你唔好多事，估唔到最後唔單止連累埋你，仲要你幫手先無事！好對唔住！」林副校向我鞠躬，表示歉意。
「哇，副校你唔好搞D咁嘅野！我最怕呢D咁尷尬情況架啦！不如你唔好計我之前D遲到算啦！」我趁火打劫的說。
只見林副校向我笑了笑，然後說：「對唔住陳同學，呢樣我幫唔到你。不過，取而代之，經過今次件事，我知道你都係一個認真嘅好學生，之後你再係學校出問題，我一定會好好咁教導你！你放心！」
「仆街啦呢鑊！黎緊仲有咁長時間，佢日日捉我講耶蘇咪大檸樂！」我心想，然後天賜就用手肘撞了我一下。
「你就好啦，有個咁好嘅學習機會！」他陰險的笑了笑，媽的，這小子非要這樣對我不可。
「你唔好扮野呀，我未問完你架！你同阿詩頭先係咪兩個人一齊，肯定做左好多野啦！你……」我追擊著天賜和阿詩。
之後，我們稍為互相介紹了一下，再由副校跟校工交待了幾句後，我們總算離開學校，結束了漫長的一夜了。
然後，整個坑口村黑夜事件，就正式落幕了！
大團圓結局，可喜可賀！
此Post已完！
當然，若事情能就此完結，我當然會非常高興！
可惜的是，事情並非這樣簡單！
而此刻，我仍然沒有察覺，破壞結界，實在是一個非常愚蠢的行為！
我們，將會為破壞了結界，付出沉痛的代價！
甚至，這更可能直接影響到，我的性命！