[校園鬼故事系列 2] [又係你呀陳生] 十不思議事件: （六）
回到家中後，天賜這小子致電給我。
「喂，死仔，新學校點呀？慣唔慣呀？」天賜問。
「有咩慣唔慣呀，咪又係咁。」我猶豫著應否把我的遭遇告訴天賜，但又不想把他牽扯進來。
「係咩？你把聲好攰咁喎？唔係有事呀？」天賜問。
「無......無事，可能呢兩日開學，我又掛住溫書，咪攰D囉！」這小子還是這麼察言觀色。
「溫書？開學得果兩日你會溫書？咪扮野啦你！」天賜提高了聲量說。
「咩者，我依家發奮呀，唔俾咩？我無事呀。」算了，天賜和阿詩現在正打得火熱，還是別把天賜扯進這事件好了。
「唉，你唔講就算啦！總之，如果你真係有事嘅，記得搵我！有我撐你呀！」天賜這樣說時，我還真的有點感動。
「得啦！如果我真係有野搞唔掂，會搵你架啦！」
之後，我便掛斷了電話，而我亦對天賜致電找我這事感到有點奇怪。
「算啦，總之學雷少話齋，我唔再掂應該無事嘅，唔理，訓覺！」我心想，然後便睡著了。
整個晚上，我也不是睡得太好。
好像不斷的在發夢，在夢中被甚麼追趕著，感覺很不好受。
當我起來時，發現才早上六點多。
「哇，搞咩呀我，咁早醒嘅，繼續訓！」
雖然我感覺非常疲勞，卻完全睡不著。
所以我決定洗澡提神，並早點回學校，免得又再遲到。
當我來到學校門前，那股怪異視線又來了！
「你老味，我頂唔住啦，返三日你搞足我三日！出黎見我！」我對著坑口村的牌坊大喊，然後跑了過去。
就在我穿過牌坊的時候，我感到一種違和感。
那感覺就像是，你跳入水裏的感覺，我感到自己像是穿透了一些東西，然後到了另一個空間。
果然，就在我感到穿透了某些東西後，我進入了另一個坑口村，我之所以這樣形容，因為我又再次來到，周遭都是暗暗沉沉的坑口村。
這次，應該是我第一次，憑自己的意志闖進來這裏！
「呢......呢度就係雷少講嘅，另一個坑口村！」我說著。
不知道是否因為憑自己的意志進來，我感到我現在的意識是清醒的。
我在這個黑漆漆的坑口村逛著，卻感受不了那種詭異的目光。
「頂呀，無啦啦衝左入黎，但又咩都搵唔到！呀，仆街啦，咁我陣間點出返去！」
就在我思考期間，我隱約看見，學校那邊有一個人影出現。
於是，我埋伏在牌坊後，想看一下這個人影是誰！
「咦？咁熟口面，咁靚仔嘅？」我疑惑著，不敢相信眼前的事實。
因為，這個人影，正正是我自己！
「搞咩呀？點解又係我黎？」我躲在牌坊後思考著。
只見那個「我」像發現了甚麼似的，忽然向牌坊這邊跑了過來！
「我，你，我，唉，是旦啦，衝過黎做乜鳩呀，陣間會唔會嚇Q死自己架？咁呢個『我』死左，咁我係咪都會死架？」我只感到一片混亂，也不知道自己在想甚麼，總之先逃跑就是了。
離開了牌坊後，我躲在一棵大樹後面，觀看著那個「我」。
然後，那個「我」忽然大叫：「頂，又俾佢走甩左，究竟係咩人？夠膽跟踪我！」
我心頭一震，這不就是昨天，我進入了這個坑口村的情況嗎？
我再探頭窺看那個「我」，只見那個昨天的「我」，身影慢慢變淡，然後我看見了一個令我震驚的畫面。
那個「我」消失後，只見雷少慢慢的從學校走了出來，然後走到了牌坊前面，口中唸唸有詞，我看見，四周的黑暗整在消失，開始恢復光芒。
就在黑暗開始消失時，我馬上從樹後衝出來，想把他抓著，就在我快要碰到他的一刻，四周回復了正常！
以我正以一個非常滑稽的姿勢，像是要抓著牌坊似的！
「仆街，居然信錯佢，雷少究竟係咩人？點解要搞我？」我心中想著。
然後我正在沉思之際，我忽然發現有一兩位身穿和我同樣校服的學生，正匆忙地跑向學校。
「唔駛咁急呀，岩岩先七點！」我邊想邊慢慢的走回學校。
只見在校門前，正有一批同學聚集著，然後我又看見那副校。
「仆街，八點七？我又遲到！」我看著牆上的時鐘，心裏已是粗口橫飛！
「陳同學！你又遲到？尋日你仲實牙實齒話唔會再遲到！睇黎我都要好好咁教導你，跟我黎！」林副校指示我走到一旁，然後向我訓話了大慨十分鐘，此刻真有渡日如年的感覺。
好不容易回到班房，才發現雷少不在這裏！
「喂，阿諾，雷少呢？」我拍了拍坐我旁邊的阿諾，向他詢問。
「唔知呀，可能病左卦。」阿諾回應我。
「雷少有古怪，今朝見完D奇怪野，佢就唔見左！究竟佢隱暪左D咩？」我整天也在思考著這事情，結果直到放學，問了雷少的女朋友，她也說不清楚。
「算，下星期再問佢，我唔信佢可以避我一世！」我心想著。
然後，很快的來到了星期一，只是，雷少仍然沒有出現！
「喂，阿諾，知唔知雷少咩事呀？」我又詢問阿諾。
「唔知喎，應該無野嘅，班主任都無講D乜。」阿諾仍是平靜的回答我。
我留意到，班上出現一個奇怪的情況，重考生們都認為是很普通的事情。
想想也是，才請假兩天，以前讀書時也會遇到。
但很明顯，那些原校生，臉上都霝出了一種古怪不安的神情，像是在害怕甚麼似的。
而老師們，雖然表面沒有異樣，但在背後好像偷偷的在討論甚麼似的。
到了放學，我在教員室外碰到冰冰，不，是聽到冰冰的聲音，在教員室裏傳出。
「點解？點解你地唔報警呀？依家有個學生唔見左呀！」冰冰的聲音聽起來有點古怪，是正在哭泣嗎？
「冷靜D呀冰冰！雷少屋企人幫雷少請左一個禮拜假，佢地有晒文件，我地唔可以報警架！同埋，都無辨法證明雷少真係唔見左架嘛！」這聲音，聽起來有點像林副校。
「咩無辨法呀！你知架，以前有學生唔見左，個個返到黎之後都變得奇奇怪怪，好似失晒神咁！之前都係靠雷少先搵得返個同學，佢都唔知係咪咁得罪左D村民，所以依家到佢失蹤啦！」冰冰用嘶啞的聲音說著。
「冰冰，你冷靜D！果D咩村民呀咩第二個坑口村，係傳聞黎，係假架！你都唔好再亂講啦！就算係真都好，你應該都記得，村民係唔會搞呢區嘅人架嘛，係咪？雷少可能同佢屋企人有D野要處理，先無返學者！你記住呀，唔好亂講，唔好亂黎！知唔知道！」
「我......我......」
然後只聽到「碰」的一聲，像是有甚麼跌在地上的聲音。
「喂，冰冰！冰冰！你無野呀嘛？我即刻扶你去醫療室！」只見教員室的門突然被推開，林副校正狼狽地扶著冰冰，然後發現了我正在看著他們。
我不知道應說甚麼來解釋（說實話，現在想起來，實在沒有解釋的必要，我又沒有做錯甚麼）。
「陳同學，又係你呀，岩啦，黎幫手扶呢位女同學去醫療室先！」林副校對我說。
我倆合力，把冰冰和她的隨身物品都運到醫療室。
「佢無野嘅，應該係激動得滯暈左者，抖一陣無野架啦！副校，我仲要去聽Seminar，要走先啦，咁呢度有條鎖匙，麻煩你陣間鎖好門先走。
」
那女老師離開後，房內便剩下副校、冰冰和我了，氣氛有點尷尬，我還是離開好了。
正當我想跟副校道別的時候，林副校先開口了。
「你......頭先係咪聽到晒？」
「吓？咩話？聽到D咩呀，哈哈！」我想裝作不明白，嘗試敷衍了事。
「唔駛扮野啦，都話我教左書咁耐，有咩遇過。頭先我一早見到有個人影係教員室出面，一打開門就見到你啦，仲唔認？」林副校慢慢說著，看來沒有責怪我的意思。
反正也被悉破了，而且應該沒有比這情況更尷尬吧，於是我大著膽子告訴副校，並把上星期自己也進入了第二個坑口村的事件！
只見他歎了口氣：「唉，估唔到，隔左幾年都無事，我地仲以為以後都會無事，點知......又有學生失踪！」
「陳同學，其實依家你無事，都已經係不幸中之大幸，勸你都係唔好咁多事啦，我地等下啦，以往都係等等下，D學生就會出現返。」副校無奈的說。
「等？唔係卦，有學生失踪喎，你就咁咩都唔做，萬一真係搞出人命咁點算？」我驚訝的看著副校。
「唔係咁樣可以點？你估咁多年，我地咩都無試過咩？但每次，到最後都只能夠等學生自然出現返！或者，呢間學校根本唔應該開校！開校前發生過嘅事，根本就係一個訊息，警告我地唔應該開校！」副校像在回憶甚麼似的，完全沒有理會我。
「咩開校前？咩警告呀？我唔明你講咩嘅？」我望著副校。
「陳同學，之前我講嘅野，你聽唔聽，明唔明都好啦！總之你唔會再掂呢件事啦！如果唔係，會發生D咩事，我都無辨法保證！」說完後，副校便要我離開醫療室，他自己照著冰冰。
被半趕出房間後，我實在感到不忿氣，又不是我自願碰上這些事情的，為甚麼我還要受這樣的氣。
「屌，我夠想唔理啦，明明都唔關我事！好呀，依家扯左我入局，又唔受我玩！我陳子鋒唔係咁好恰，你叫我過黎就過黎，叫我走就走！我死都要知道發生咩事！下次再俾我入到去，我唔會咁易出返黎。」我心裏這樣想著。
當晚，我致電了天賜，始終這小子的頭腦比我好，還是詢問一下他的意見吧。
「喂，天賜，有野要你幫手！」我也顧不得甚麼會不會拖他下水了，我現在只想盡快知道究竟發生了甚麼事！
然後，我在電話裏，詳細地把這數天的遭遇告訴了天賜。
「天賜，你點睇呀？」我期待著他的回答。
「阿鋒，你仲記唔記得，以前去捉小敏嘅時候，我地幫老豆手貼符，施展嘅一個結界？」天賜沒有直接回答我。
「記得，梗係記得啦，如果唔係果個結界，分分鐘我地都奱晒做小敏D手下啦！」我怎會忘記那次的經歷。
「我懷疑，你入左果個，所謂第二個坑口村，係結界入面嘅坑口村黎！我細個聽過老豆講，結界有好多種用途，當然鎮壓怨靈係其中一種用途，但最重要係，入面嘅時間可以保留！」天賜解釋著。
「時間？保留？咩意思呀？」我不解的問。
「簡單講，結界入面除左鎮壓靈力，有D仲可以停止時間。『山中方七日，世上已千年』你唔好以為只係一句諺語咁簡單，其實如果一個人入左結界，絕對有可能發生。」
「你講乜春野諺語呀？我都聽唔明你講乜！講重點啦，我連果句咩山咩七係咩都未聽過！」我愈聽愈混亂。
「叫你條仆街仔讀多D書架啦！屌，等我諗下先！呀，有啦，總之，成件事就係！好似叮噹咁，用左個乜叉時間停止器，停撚晒D時間，得你一個郁到咁！但個地球就繼續郁緊！咁果個好黑嘅坑口村，D時間就係停撚晒。但原本個世界仲運作緊！明唔撚明呀？」天賜怒道。
「屌，一早咁講咪明囉，又親切D！喂，咁都解釋唔到係坑口村入面見到另一個我架？」我再問。
「咁好簡單者，黑暗坑口村時間係停止嘅，但停止嘅時間點究竟係邊一刻呢？老豆就話，可以係任何一刻，視乎幾時有野入左去。再簡單講，就係入面嘅時間係重疊嘅，無論過去現在同未來都係重疊嘅，睇到D咩就純綷睇你運氣，可能次次唔同都唔一定，你明唔明？」
「明......明卦！總之我就入左結界，結界入面可以存在好多個，曾經入左去嘅我！而睇到邊個時間點，就係睇運氣，係咪？」我嘗試去理解他說的話。
「就係咁啦！不過，一般黎講，結界入面嘅時間唔應該咁混亂，而且無理由一般人會入到去，成件事嘅關鍵，應該係雷少身上。但依家佢唔見左，你要查嘅話，就要諗辨法入去結界，或者破壞個結界！」天賜這樣對我說。
「點入呀大佬，我幾次都係無啦啦入左去！都搞唔清點入！」我實在想不到如何進入結界。
「唔駛急，你話你見到雷少係學校出黎，然後又係牌坊講左一輪，你就覺得結界無左。我估個關鍵係校門同牌坊，你可以試下係呢兩個地方入去。講到尾，結界都係一種能量，你試下將劍指施展係呢兩個地方，睇下會唔會入到去啦。」
「好啦，咁我試下啦，唔該晒，拜拜！」我知道方法後，興奮得直接掛斷電話，然後馬上睡覺，期待明天的到來。