[校園鬼故事系列 2] [又係你呀陳生] 十不思議事件: （一）

2004年，會學放榜日。
「喂，天賜，你考幾分呀？」同學Ａ。
「等我睇過，哇，痴線架，30分！」同學Ｂ。
「喂，你睇真D先啦，50分都有呀，佢考10A呀！」同學Ｃ。
在一片吵鬧聲中，一位高挑的美女走向天賜。
 
「天賜，你諗住原校升定點呀？」這位美女用甜美的聲音詢問。
「阿詩，我應該原校升，我仲想享受多一陣中學生活，你呢？」天賜捉著這位美女的右手回答。
「我？你去邊我咪去邊囉。」阿詩甜美的笑著回答。
 




就在這一片的歡樂氣氛中，課室的一角，充滿著沉重的氣氛。
「喂，你考成點呀？」同學Ｚ。
「我？十三分囉，唔知升唔升到中六呢？」同學Ｙ。
「唉，我得十二分Ja，都唔知點算好，學校收唔收我重讀呢？」同學Ｘ。
 
在這樣的一片對話中，有一個人特別灰暗！特別沉重！
就連同學Ｘ，Ｙ，Ｚ都不敢跟他說話！
怎料，卻有一個人不怕死的走了過來。
 
「喂！死仔，點呀你，死得未呀！」說話的正是天賜。




只見那人臉如死灰，以帶有一點怨恨的眼神，狠狠地看著天賜，沒有回話。
 
「點呀，阿鋒，你無野呀嘛？」阿詩也走了過來，對著那個臉如死灰的人說話，對，這個臉如死灰的人就是我了。
 
「點？咪死得囉！點算呀，我得十分Ja，重讀都唔知得唔得呀！」我哭著對阿詩說。
 
「抵你死架，之前又唔讀書！」天賜恥笑著我。
 
「咩唔讀呀，咁我要去照顧堅嬸架嘛，又要成日去搵你個麻煩老豆！點解你唔分一半嘅聰明才智俾我呀！50分減一半，你都仲有25分呀！嗚嗚！」我閉上眼，嘗試擠出一點眼淚。
 




「你咪咁多藉口啦，又唔見我同阿詩考得差！不如話你係度諗埋D屎橋，諗住叫小詠幫你偷睇答案，唔溫書，咪搞成咁囉！」天賜毫不留情的踐踏著我，連在一旁的阿詩也在偷笑。
 
「你兩公婆無人性架，我咁慘仲咁對我！小詠原本都諗住幫我架，最衰你老豆，帶左小詠去中山唔知搞咩！打亂我個如意算盤！我搞成咁，你老豆係最大完兇！你係佢個仔，你都係殺人兇手黎！嗚嗚！」媽的，怎麼就是擠不出眼淚。
 
「哇，你姓屈架？等我仲好心幫你問左校長，有無得俾你重讀添！」天賜看著我說。
 
「吓？堅架？真係有得重讀？」我開心的詢問天賜。
 
「佢話十二分嘅話，學校會著情俾學生重讀。你幾多分啫？」天賜詢問。
 
「天賜，你講真架？YES！我地衰極都有得重讀！」同學Ｘ和同學Ｙ起哄著，而我則面如死灰，怨恨的看著他們，同學Ｘ和同學Ｙ立刻退場，消失於班房裏。
 
「我……我得十分JA！」天啊，想不到連原校重讀也辨不到。
 
「點算呀依家！」我終於咆哮了出來，幾乎全班也給我嚇到跳了起來。




 
「仲點算，出去搵學校啦！」天賜和阿詩馬上替我執拾東西，然後推我出了校門。
 
「你諗住重讀定升中六呀？」天賜問。
 
「吓，我咁都升到咩？」我疑惑地問。
 
「如果想升中六，都未必唔得架。我知道有D「出名」嘅學校有機會收架。」阿詩稍為想了一下，然後對我說了頗多的中學名稱。
 
「哇，你講果D，都真係幾「出名」喎。」我邊說邊抹了一下冷汗，因為阿詩提到的，比起學校，看起來較像是格鬥場，拜託，我可不是想進行武術訓練啊。
 
「喂，係咪玩野先，阿詩好心幫你諗，你仲咁嘅衰樣。睇落，有D都唔係好差者，反正去到邊都係靠自己架啦，不如去試下啦！」天賜看著剛列出來的學校，慫恿著我。
 
「唉，是旦啦，咁即管去試下啦！」
 




就是這樣，我跟他們在觀塘區到處亂逛著。
 
「唔好意思呀，我地中六收十二分架！一係你考慮下重讀啦！」
「其實我地可以收你架，不過中六你只可以讀一個AL加兩個AS，你介唔介意呀？」
「你個分數，如果轉去讀文科，我地都可以收你架，不過會辛苦D！」
「我地可以俾你試升嘅，不過你要補考會考，至少考返十四分，同埋中六嘅測驗考試，全部都唔可以唔及格！你試唔試呀？」
 
「我屌，估唔到呢D學校都玩鳩我！又要我讀文科又要唔俾我修兩個AL，者係想我升唔到大學者，最尾果個仲離譜，一唔及格就踢我出校，咁食屎啦，我讀到一半佢先踢，到時重讀又唔係，升又無人要！天呀，唔通連你都唔鍾意我？」我在馬路上大叫著。
 
「其實試升都好呀，測驗考試合格好易者，搏得過喎！」天賜對我說。
「大佬，你估我係你咩？我呢D係臨考試前先讀書架，你要我成年都咁辛苦，咪即係想我死者！我唔得架！」我死也不相信自己能堅持一整個學年。
「嗱，呢間最後一間啦，都唔得你好考慮重讀啦！如果唔係到時你入去離島讀書唔關我地事呀！」天賜這樣說著。
 
於是，我踏進這間位處油塘，頗具「盛名」的學校。
「陳同學，你個分，我地絕對可以收你讀中六，你仲可以自己揀科添！」負責老師說。




「真係架？太好啦！」我高興的說。
「不過呢，你都係諗清楚先比較好！」負責老師提醒我，我還以為他擔心我讀不來，我正打算展現我的決心給他看，他續說。
「我見你中文有C英文有D，入黎我地學校有D浪費者，我可以俾D時間你考慮清楚。如果你仲係想讀中六，你聽日拎埋張Cert過黎，我再收你啦！」他語重心長的告訴我。
 
甚麼？這算甚麼？是新的退敵方式嗎？
竟然有學校會勸學生不要進來讀中六，他是看我好欺負嗎？
就在我疑惑之際，我看到操場已經有一群學生打起上來，有的在拿著些東西，是棒球棍麼？
然後，在隔壁的課室，忽然傳來一陣吵鬧，然後我看見有椅子從課室裏飛到走廊上！這是甚麼樣的情況，靈異事件嗎？
 
然後負責老師把我安全的送到校門，便以帶有一點哀傷的眼看了看我，然後回去了。
 
「走！我地即走！阿詩你係度好危險！我地快D離開呢度！」我拖著天賜，並吩咐阿詩馬上逃走，然後把我看見的都告訴他們。
 
「你有無咁誇張呀？監獄風雲咩？」天賜取笑我道。
 




「總之我決定左啦，我要重讀，係果D學校讀書，我唔死都偷笑啦！」我這樣告訴他們。
 
然後他們陪著我走了不同地方找重讀的地方，結果，阿詩提議我到坑口某間保良局中學碰碰運氣，還真的有重讀的位置，於是，我便交了表格，正式加入這所學校，成為中五重讀的學生了。
 
現在回想起來，全賴阿詩這麼積極推介我來這裏讀書，才讓我有機會經歷了之後這麼多的詭異事情！要不然，這故事也不能存在了！