〈是咁的，我是一個童貞魔法師〉: <初敗>

快樂既時光好快過，轉眼間又黎到夜晚，係我同一眾囡囡食完Simply Life之後再複習一陣之後，就黎到分別既時候。

「Wing同學，明天也請你多多指教啊！」艾薇跟我臉對臉，一手搭著我的肩膊說。

「沒問題，明天大家再一起加油！」我已經感覺到自己血氣上湧。

「哎唷唷，可別忘了我們啊！」艾琳亦不甘示弱地走在我身旁，差點整個人挨在我身上。

女人啊女人，好勝心真強。不過我照單全收，嘻！





就係佢地走咗之後﹐我一個去搭地鐵返屋企﹐準備定聽日最後一次溫書用既筆記。點知係我仲沉醉緊係被眾女團團圍住既餘韻之時，突然間有個黑魔法師沖到我面前，仲成功咁將我拉入結界。

金翅仆街鳥…

「你條死毒撚學人溝咁多囡？哼！唔教訓下你都唔得！攻擊！」個梳住個比比鳥頭﹑架住一副幼圓框眼鏡懶文青既黑魔法師忽然發難。

痴線既咩…

只見佢交叉舉起雙手，之後背後升起既黑氣沿住佢雙手卷動，最後係雙手中形成兩把手槍。







唉！我唔唔擅長玩FPS同動作遊戲，唯有夾硬頂。「防守」呢兩個字係腦海中浮起，之後大量冰晶係空氣中浮現，再係我面前結集成一幅冰牆。

對方一邊咀角上揚，一面不屑地望住我，之後雙手好似打機咁不斷扣下板機，黑色的子彈一顆接一顆地激射而出，有如一場黑色的暴雨迎面而來。

子彈密密麻麻地打在冰牆上，一點一點地把它確實地削弱，而我只有繼續驅動著魔力，用更多的冰晶去填補被破壞既地方。但係對方彷似從容不迫咁，開始增加佢既射速。

頂，點解今日好似力不從心咁既？唔通我真係唔舒服？宜家唔止提取魔力時覺得斷斷續續好似痾尿無力咁，我仲覺得，魔力比平日快見底咁。





對方好似留意到我吃力既樣咁，開始一邊大笑一邊加緊射擊。漸漸地冰牆既修復速度開始跟唔上，冰牆不旦變得越來越薄，仲開始出現幾條清晰可見既裂痕，無幾耐幾條裂痕開始合成幾條更大既裂痕，睇怕就快撐唔住。

望住對方一副得戚既樣，我實在唔想輸畀佢。而且，我仲要留返精力聽日陪囡囡架嘛！一念及止，魔力隨住我既意志力一下子湧出黎，剎那間大量冰晶憑空出現係彈幕同冰牆中間﹐就好似高達中既浮諍遊炮咁﹐主動去抵擋住子彈既攻擊。

正當我以為可以好似之前幾次驚險既戰鬥一樣可以反敗為勝時，比比鳥頭突然拋出一句：

「你以為以你咁微弱既魔力可以撐到底咩？」

緊接著佢雙手開始運圈，子彈劃出兩條如蛇的軌道飛舞著，破壞力亦跟隨著有增無減，將分隔開我地既冰晶慢慢全部粉碎，之後霹靂啪嘞咁打落冰牆上面，眼看著就要粉碎。

我個心入面大叫著：「唔好呀！」

但係已經無力回天，我既魔力已經見底，再支持唔到幅冰牆…

隨著震耳欲聾既「啪嘞」一聲，冰牆如雪花般被轟至粉碎飛散。對方黑色子彈拉出的黑蛇而直接擊中我身體，宣告著以我的落敗而結束這場戰鬥。





一返到現實世界，我即時覺得天旋地轉同渾身乏力，連企都企唔穩咁滯。而比比鳥頭只係落井下石咁講多句：

「咁虧，就唔好學人溝女啦！」之後佢就轉身走人。

我果下好嬲，但係轉眼間開始覺得好驚，好多值得擔心既問題一個接一個咁湧出黎：

「死啦！我咁樣會唔會病架？仲有幾日就考試？」

「今晚仲要準備聽日既筆記架？頂唔頂得順呀？」

「聽日仲應承咗見艾薇佢地架，唔可以令佢地失望架嘛！」

係我終於清醒少少既時候，我特然醒起一個人：阿賤。佢一定知道點做既。於是我馬上whatsapp佢，將岩岩既情況話佢知。





果然轉個頭佢就覆咗一大段野畀我，而我亦少有咁跟足佢意見做。因為今次，佢先係專家。

首先我第一時間趕返屋企﹐確保十二點後唔會再比人追擊；跟住係途中既便利店買咗幾枝保健飲品，有助我回復精力；最後一樣，係聯盟入面個「白色」whatsapp群組入面，報告未來幾日直到考試當日既行程，等佢地安排保鑣，因為呢個都係會員福利之一。

果然係返到屋企之後，有毒氣雙子個群組又彈出咗未讀訊息。

Aaron：「又係我呀！」

Leon：「乜咁唔小心呀？打飛機打到腳軟黎呀？」

Aaron：「放心啦，我地會保你到考試果日架喇！反正你學校果頭我地都咁熟。」

Leon：「放心啦，戒下j，食多幾隻雞蛋同飲下雞精補下身啦！」

屌，我真係唔想理佢地囉。明明咁多女冧我，我邊使自己打j？痴線！