[惡搞無極限] 就係咁，我同幾個豬朋上左大陸獵金: ３９７　衣櫃

我既睡意唔知係邊度出黎，我亦都唔知呢度係咩野地方，只係知道，眼前既黑暗慢慢變成一團好暖既光，吸左我去一個我未見過既地方。

一個好空擴既空間，眼前只有一個衣櫃，而衣櫃內發出左好微弱既聲音，好似有個細路女好努力壓制住自己唔好喊唔好叫既聲音。

我慢慢接近個衣櫃，而衣櫃入面發出既聲音慢慢加大，甚至，係開始微震，我摸住衣櫃上面既木紋，衣櫃入面既細路女終於忍唔住喊左出黎。

究竟入面有Ｄ咩野人呢？其實呢一刻我好驚，我好驚打開左個衣櫃彈出黎既係個怪物，但係，我唔知係邊度聽到一把聲音，「係我數三聲之後，你就會用你既左手去打開呢個櫃門，三、二、一……」

我好似聽從指令咁打開左個櫃，見到既，係一個女仔好用力咁攬住一個ＥＥＹＯＲＥ公仔，以及一條鏈，佢好似嘗試緊好用力咁緊閉住口，好似驚發出半點聲咁。





直到，佢見到我開左個衣櫃門，直到，佢見到我，直到，佢望住我張開緊閉既眼睛後，佢話：「我好驚啊。」

總覺得，呢個女仔同我有密切既關係，雖然呢個衣櫃唔大，但我都可以坐係佢既身邊，然後話：「做咩咁驚？」

「我媽媽叫我直到安全之前，都唔可以走出個衣櫃度，然後佢就出左去，我好驚啊，因為我知道我以後都唔會再見到媽媽，我又唔知點搵爸爸同爺爺，我好驚我以後得返我自己一個人咋。」個女仔話。

我摸一摸呢個女仔既頭，第一下摸，個女仔有少少驚所以身體微震，但接落黎第二下佢就好似接受左，而我問佢：「妳叫咩名？」

「我叫可兒。」佢答。





「可兒，咁呢個公仔係？」「係我爸爸送比我架，佢叫ＥＥＹＯＲＥ，佢頭先話會保護我，然後佢就出左去殺晒所有壞人，仲有果個殺左媽媽既女人。」呢一刻，我心涼左一涼，試問一個咁細既小朋友，點解要係佢咁細既時候就要佢面對呢Ｄ事。

我心疼，又憐憫，然而，我又再問：「但係而家已經安全，點解妳仲……」「未安全架！未安全架！ＥＥＹＯＲＥ仲係出面好努力咁殺晒Ｄ壞人！佢未返黎就代表唔未殺晒！所以唔安全架！而且！而且……」個女仔慢慢咁低下頭，抱住隻ＥＥＹＯＲＥ喊住講：「ＥＥＹＯＲＥ而家係我為一既親人黎架……除左佢，我已經無任何親人拿……」

我聽到佢咁講，好用力咁攬住佢，「傻瓜，妳仲有個阿哥架。」

「我有個……阿哥？」個女仔問，然後，佢注意到我心口既果條鏈，「點解你又會有呢條鏈既？」

我微笑住答佢：「係我爸爸送比我架，我爸爸，亦即係妳爸爸。」我將果條鏈除左出黎，放到個女仔既手心，然後，佢都除左條鏈出黎，放係自己既手心，兩條一樣既鏈，佢望住係度傻笑，「係真架？」





「係啊，係真架。」然後，我將兩條鏈打開，女仔條鏈入面放左既係佢地既全家福，而我果條鏈放住既，係佢地所住既地址，「我認得呢Ｄ字，呢Ｄ字係爺爺教我，叫我一定要記住，因為呢個係我屋企既地址，而且……而且呢Ｄ氣爺爺既字黎架……」

個女仔好開心咁笑左出黎，「原來，我仲有一個哥哥架。」

我望住眼前呢一個女仔，微笑話：「係啊，阿妹，對唔住啊，阿哥而家先黎接妳。」

係呢一刻，我明白當年阿爺叫我上黎，唔單止係叫我為左拎批金，而佢既主要目的，係想我搵返阿妹。