[惡搞無極限] 就係咁，我同幾個豬朋上左大陸獵金: ３８７　被控制既阿妹

跟住花木蘭身後面慢慢行，直到一個地方，見到佢、阿欣同勞斯萊斯都突然打起十二分精神，「就快到。」

我地幾個唔知情既人見到佢地咁都緊張起黎。

慢慢行近左一個房間，係一個用鐵門鎖住既房，門上面有個鐵窗，「你阿妹就係入面。」花木蘭話，而我呢一刻有一個問題：「點解妳會知道佢係我阿妹？」

花木蘭認真咁回答：「因為佢好似相入面既女人。」

我係個鐵窗望入去，見到既，係一個佈滿小熊維尼既裝飾既房間，而阿妹佢著住件ＥＥＹＯＲＥ衫訓左係有好多ＥＥＹＯＲＥ公仔既床上面。





係呢一刻，我覺我阿妹就好似一個細路仔一樣訓係一個自己鍾意既房間，但係下一剎那我就意識到，咁既狀態既阿妹，要小心Ｄ。

而花木蘭就同我講：「一早聽聞碇司令手下有紅白紫三個親衛兵，最瘋狂果個就係紫，因為佢係會敵我不分咁攻擊。」

我聽到花木蘭既說話後就話：「果個只係阿妹既另一個人格，本身既阿妹係個好人。」

「我明白。」花木蘭話：「但係如果佢地有能力控制到佢另一個人格既話，咁你阿妹就係一個殺人機器。」

花木蘭呢一番話，另外諗起果個叫夢魔既男人，如果花木蘭講既野係真既話，咁夢魔就係令阿妹變成咁既人，但係……





「點解妳又會知道？」我好奇點解花木蘭知道阿妹有另一個人格。

而花木蘭係呢一刻就話：「因為以前碇司令曾經搵過我幫手將一個女仔既陰暗面控制，當時我拒絕左之後，佢就搵左我師兄幫手，而果個女仔，就係時興隆。」

佢講完後就望一望阿妹，「估唔到師兄真係幫左碇司令，難為呢一個女仔。」