[惡搞無極限] 就係咁，我同幾個豬朋上左大陸獵金: ３６５　跟我行（補返更新）

飛伯直接咁係我地面前著陸，而佢一著陸，花木蘭就話：「好耐無見拿，老頭子。」

飛伯只係對花木蘭笑左幾聲後，就望住我同阿欣話：「估唔到咁快就見返你地兩個，點解，搵你阿爸既遺書順利嘛？」

聽到佢咁講後，我搖一搖頭。

「有麻煩事係好既，如果無呢Ｄ磨練，你地Ｄ後生仔又點可以成才呢。」飛伯語重心長講完後，就問我地：「你地黎呢度，所謂何事？」

花木蘭向我打左個眼色，示意叫我同飛伯講出我地既來意，而我就同佢講：「我黎，係想搵返我阿妹。」





「搵你阿妹？你地唔係一早已經相認左咩？」飛伯問，而我就答佢：「係一早相認左，但係呢一兩日阿妹佢失左蹤，我唔知佢係比人捉左，定係……」我唔知應唔應該講阿妹會暴走既事比飛伯聽，又或者係我唔知點樣話比飛伯聽阿妹佢係一個會暴走既人。

飛伯聽完我講後，行到我面前，單手捧起掛住我頸上面果條鏈話：「呢一條鏈本是一對，已經重逢但又遇到分開既命運，可惜……可惜。」飛伯突然一下將我條鏈扯左落黎，比佢突如其來既動作，我嚇左一跳，本能反應既我出手搶返條鏈，但當我捉住飛伯隻手之際，飛伯就話：「想知你阿妹係邊，你地就乖乖地聽我講。」

唔知點解，飛借散發出一股氣勢，果種會令到所有人都會聽佢話既果種氣勢。

我鬆開左手後，佢就講：「跟我行。」