[惡搞無極限] 就係咁，我同幾個豬朋上左大陸獵金: ２７７　再戰火焰山

遇到咁奇怪既事，我都唔知應該點做，扶我起身既阿欣平時咁大膽咩都敢玩都有驚既感覺，更何況係我。

「咁點答啊？」阿欣問我，我真係唔知應該點做，我無奈咁望住眼前果間火焰山，心中搵阿爸果五封遺書既希望開始減少。

「唔會既，可能係咁岩個大叔紋左鐵扇公望姐，唔會係大寶想搵既人。」我心諗，無講出黎。

無力感繼續放大，直到我同阿欣講：「我地只好返去先。」呢個係而家我同佢可以做到既事。

毫無收穫咁返去，只見到阿妹一見到佢就興高采烈向我衝過黎，「阿哥，外公講左Ｄ野我合，可能對件事有幫助架。」





聽到阿妹咁講，我同阿欣都係失望中有返少少鬥志，而我問佢：「係Ｄ咩？」

阿妹佢拎左一個地址出黎，「我同外公佢講左，舅父叫我去搵五個女人先可以搵到阿爸留比我地既五封遺書，當佢聽到我話其中一個女人係鐵扇公主果陣，外公就比左呢個地址我，佢話呢個人以前同舅父行得都好埋，好似話係好好朋友，而且，佢有一個鐵扇公主既紋身。」

當我聽到阿妹咁講後，心諗老前輩講果個人，會唔會就係剛剛只要手一揮就可以括起怪風吹走我地既果個大叔。

我接個左阿妹比我既地址，望一望上面所寫既街號，我既諗法係無錯，真係果個大叔。

「外公話舅父個朋友開左間紋身店叫左火焰山啊，不如我地去睇下好唔好啊？」阿妹問，而阿欣好快就答左佢：「我地頭先都去過果度，只不過比個店主吹左出黎。」





「吹出黎？」阿妹不解地問，而我就將我同阿欣去搵大叔既過程話左佢知，阿妹佢聽完都露出左一個難以置信既表情話：「竟然有Ｄ咁既事發生？」

我同阿欣都向佢點左點頭。

「不過，如果今次我都一齊去，再話佢知我地識舅父既話，會唔會有幫助？」阿妹真係一言驚醒夢中人，呢個方法可能可行。

「阿賢，咁試唔試下？」阿欣問。

「都可以試多次，好過我地係度等阿俊。」我答佢，所以我地又決定去多次火焰山。