[惡搞無極限] 就係咁，我同幾個豬朋上左大陸獵金: ２４９　一封又一封既遺書

我唔知呢個大寶點解會出現，但以我出黎行左咁耐既直覺話我知，識呢個人，對我以後有幫助。我好相信我呢一種直覺，因為呢種直覺幫我闖過好多難關。

希望，今次都可以，雖然，直覺話我知我會無命……

估唔到呢個大寶都幾多野講，最勁既佢可以講成兩個幾鐘都無停過，而且仲唔駛飲野，佢唔乾架咩？

佢所講既野我無理度，我只係不停係度沉思緊，同老方傾完少少野，之後既野點算，我係大陸既所有野，係未係時候處理下，留比阿仔同阿女？

我又應該叫ｄ咩野人照顧佢地呢？





問題不停咁彈出黎，我真係未試過有咁樣既一日，我望住我面前杯茶，茶入面既自己，係苦惱，係無助，呢個自己，我好陌生。

「吃東西，腦袋好駛一點。」平叔放低左個大包，再望一望大寶，搖一搖頭就走左。

「佢咩事？」我問佢。

「甭理他，他對我總是這個樣子。」大寶答我。

「為甚麼？」我又問。





「不知道，剛才我說到……對了，我們的小姐１７７號，身材真的是……」我繼續無視大寶，望向平叔果度，見到佢慢步既背影，唔知點解，呢一剎那大左一ｄ唏噓同嘆息。

咬完個包，再聽大寶廢ｕｐ左一輪後就返左房，返房前我問平返拎左ｄ信字同筆，佢就問：「寫遺書嗎？我認識一個人專門負責幫人寫遺書的。」

我笑一笑搖一搖頭：「唔駛拿，我想親手寫得ｄ野比自己既家人。」估唔到平叔咁直接問我係未寫遺書，我竟然一ｄ憤怒既感覺都無，可能，我自己都接受左今次自殺式著草掛。

返到房，行到枱面前，拎左張信字出黎，寫左係比邊個人後，內容遲遲都未諗到，因為，有太多事想同佢地講，唔知，佢地而家點呢？

我閉上眼慢慢咁諗每一個人，佢地對我既好，忍受，照顧，我今生真係太過幸福，拎起筆，寫住一封又一封既信，果ｄ交付既說話，果ｄ感謝既說話，以及果ｄ，好想教仔女既說話，希望，佢地以後睇到我寫既信果陣，唔會鬧我ｄ字咁難睇啦。





估唔到最後寫左咁多信，寫到手好酸，訓係床上面，好快就訓左，而另一日，係一個好嘈吵既早晨開始。