[惡搞無極限] 就係咁，我同幾個豬朋上左大陸獵金: ２３０　有幾好玩啊？

拜完阿爸，舅父佢地就返後，而佢問我：「係地一陣會去邊？」

其實我對呢度都唔熟，成日都係跟住你地行黎行去，你咁問我點知答你咩好，我望一望方瀡，而佢就話：「無啊，要去既地方都去完，我地諗住返去。」

舅父聽到方瀡既說話後，懷疑左一下，但佢話：「咁我就唔阻你地返去拿，我同老前輩仲有地方要去，我地走先。」佢走之前望左方瀡一眼。

而方瀡還以一個微笑。

當我地望住佢地行遠，方瀡就同我地講：「想唔想，玩一個遊戲？」





「玩遊戲？好啊！」一聽到有野玩，阿欣開心到成個人彈起。

「無啦啦，玩咩遊戲？」我問。

而方瀡就講：「你地唔覺得阿舅父佢好似有野瞞住你地咩？你地阿爸死左咁耐，要今日先可以比你地知，又係點解呢？仲有，點解已經唔比你地知咁多年，今日又無啦啦比你地知，呢個又係一個問題。」方瀡一路講，一路難掩佢既開心同興奮，「睇黎你阿爸既死背後，一定有不可告人既故事，難道，你地唔想知咩？」

我望住異常興奮既方瀡問：「……就算想知既話，又點解要玩遊戲？」

方瀡望住愈行愈遠既舅父講：「跟蹤遊戲，係好好玩架。」





大鑊，呢一句一定令到阿欣……「有幾好玩啊？」真係……阿欣已經開晒制……

「要幾好玩，又幾好玩。」方瀡呢一句後，就展開左大陸公安ＶＳ香港警察既跟蹤比賽。