[惡搞無極限] 就係咁，我同幾個豬朋上左大陸獵金: ２２９　不能說的秘密

裝完香比阿爸後，方瀡行到舅父旁邊問佢：「其實你頭先話唔想阿賢阿媽再問有關阿福死既事，呢一點我唔係好明。」

無錯，其實當舅父咁講時，我都一直諗緊點解要咁做，但不過係呢個時刻我唔想問住，無諗到方瀡佢會問。

舅父望住方瀡，無講任何野，可能，佢諗緊要點答，不過，唔駛等舅父開口，果位老前輩就出聲：「世姪，有時多一事不如小一事，知少一件事可能係對件事既幫助。」

方瀡聽到老前輩咁講後，只係笑一笑話：「老前輩都咁講，咁我就唔問啦。」但唔知點解，佢呢一句係望住舅父講。

舅父見到方瀡咁樣望住佢，只好是但講左句打圓場，「不如我地行開一陣，佢地兩個咁多年無見阿爸，一定有好多野講。」佢講完呢句後就行左開去。





而方瀡同老前輩都跟住行開，行開時方瀡對我地笑左笑，呢一笑，帶一Ｄ得意，更帶一Ｄ神秘。

佢地行開左之後，我同阿欣就行去安慰仲喊緊既阿妹，而阿妹就哽咽咁話：「阿哥，我想將媽媽都移過黎陪阿爸好唔好啊？」

雖然阿妹口中既阿媽唔係我親生既阿媽，不過我都明白阿妹點解想咁做，所以就點一點頭答佢：「好，睇下妳想幾事移，阿哥幫妳。」

我地三個人係阿爸既相前逗留左一陣，腦中不停浮現阿爸以前同我相處既日子，諗返起，原來我細過果陣都好任性，不過有邊個細路仔唔係咁。

而回憶浮然期間，當每次有阿媽既回憶，我都會多左一個問題諗，就係舅父點解要唔比阿媽知阿爸係邊，方瀡講既野唔係無道理，阿媽點都係阿爸最親既親人，點解唔比得佢知，唔通當中有Ｄ事唔可以比其他人知，就連我係佢個仔，都唔知得？