[惡搞無極限] 就係咁，我同幾個豬朋上左大陸獵金: １９１　就去呢度啦

阿妹唔知係邊度拎左張地圖出黎，然後拍住一個地方話：「去呢度啦，距離我地呢個市唔太近又唔太遠，而且我係果邊識人，搵地方落腳又方便，你地意思點？」

「好啊！」阿欣有得玩，就算話去月球都好架啦。

而另外Ｄ人都無問題，我更加無問題啦，因為大陸既野，阿妹熟過我地好多。

「咁幾時出發？」阿俊問。

「其實聽早我地就可以開車去。」阿妹答佢。





「咁我地今日就休息下，聽早就起程。」阿俊話：「不過，碇司令果度……」

「唔駛膽心，只要我地送好貨，佢唔會多理我地做Ｄ咩。」阿妹答完後就同阿欣講：「阿嫂今日就留係度訓啦，我地兩個可以一齊訓。」佢行左個阿欣度，撓住佢隻手話。

「好啊！」阿欣咩都話好……

女人就係咁，相熟既時間可以短成咁。

「咁我地就係廳到休息啦。」我講完之後，所有男既都出左晒廳度。





呢一晚，房入面好糟，係阿欣同阿妹傾計既笑聲，而我地四個男既，都係廳度吹左陣水就訓。而當訓到咁上下，有個人拍醒我。

「……邊個啊？」我張開眼望一望。

「我啊，阿哥。」原來係阿妹。

「咩事啊？」我問。

「其實呢？我地聽日去果個地方，我仲有個目的。」阿妹話。





「咩野目的？」我問。

「我想搵方叔叔。」阿妹若有所思咁講。

「方叔叔？妳係話阿爸識得果個朋友？影全家福果個人？」我問。

「嗯。」阿妹點左點頭。