[惡搞無極限] 就係咁，我同幾個豬朋上左大陸獵金: １６９　證實身份？

到夜晚，我好辛苦先等到阿妹佢訓，因為佢係咁捉住我話要講好多野我知同問我好多野，本身我好驚要同佢傾通宵，但好彩佢都話累傾傾下自己訓左，我先有時間行去個三條友間房度。

我靜靜雞咁行到佢地房門前，然後拍一拍佢地度門。

但……點解無反應呢？

我再拍……等左陣都係無後應，所以我今次要大力Ｄ先得。

「啪！啪！啪！」今次終於有反應，我聽到腳步聲行近度問，然後話：「暗號係咩？」





「Ｐ你既Ｋ咩，我撚知你地定左咩暗號啊，頭先有無話我知，咁而家姐係點啊，唔駛傾啊。」火都黎。

「三長兩短啊。」佢回答我，我勁無奈咁敲左三長兩短，然後佢地就開門比我……咁樣你地定暗號黎把撚啊。

我望一望開門既阿輝，佢好鬼鼠咁叫我：「快Ｄ入黎。」

點解……點解我會有Ｄ咁既朋友……

行到入去，見到阿俊同阿倫坐左係張床上面，問我：「佢訓左？」





我點一點頭。

「咁你覺得我地而家應該繼續幫佢送左批貨，然後到佢屋企果陣再搵機會拎批金？」阿俊問。

「而家唯一既方法就只有咁。」我答。

「但如果，佢唔係你個妹，係哄我地入局的話，我地既處境可能會好危險。」阿倫話。

佢地既諗法我明白，但好似我先前同佢地講，而家本身我地已經危險，有咩好怕，但我望住佢地兩個，我知再講多幾次都係浪費時間，所以就話：「咁不如你地搵方法證明佢係唔係我阿妹，你地係未安心Ｄ？」





佢地兩個諗左諗，就答我：「咁樣當然，但係有咩方法？」

你地咁問，我鬼知咩？