[惡搞無極限] 就係咁，我同幾個豬朋上左大陸獵金: １６０　基因問題

我呆左，阿俊呆左，阿倫呆左，阿輝呆左，現場我諗除左阿妹外，其它人都呆晒。佢地三個回神後，望一望我，再望一望時興隆，又望一望我，又再望一望時興隆，呢個動作來回做左幾次。

而阿妹呢個時侯先發現自己講左出黎，用一臉做錯事既樣望住我，「……對唔住啊，阿哥。」

算啦，對唔住有咩用，同埋其實話佢地知都無所謂，所以我就笑左笑答佢：「唔緊要啦。」

「你地係……兩兄妹？」阿俊問。

「我識你咁耐都唔知你有個妹架ＷＯ。」阿倫講。





而阿輝就仲係不停咁望下我，又望下阿妹話：「你地唔似兩兄妹ＷＯ，一Ｄ都唔似。」

「係囉係囉。」阿倫附和：「一個咁樣衰，一個就咁正。」留意，佢話樣衰果陣係望住我。

「咁呢Ｄ係關基因問題。」阿俊無啦啦好正經咁講……喂！我同阿妹都係同一個阿爸生！你咁講姐係話我阿媽姐。

我用左好幾個小時話左頭先發生左幾分鐘既野比佢地知道，佢地先勉強相信我既說話，而阿妹就好靜咁坐左係我身邊，同頭先一開始認識既時興隆完全唔似。

「咁姐係……」阿俊拉左我埋一邊，然後另外果兩條友仔都跟左過黎，「……而家你佢道批金既下落？」





「係。」我點頭，「係佢屋企。」

果三條友好開心咁叫左一聲，然後話：「估唔到咁快就搵到批金，我仲以為要好幾日。」

「但我地都要送完批貸先再去阿妹度，所以最好係送貨期間安安全全。」我話，然後我地四個同時望向阿妹……其實我阿妹咁喪，安全呢件事可能就難過搵批金。