[惡搞無極限] 就係咁，我同幾個豬朋上左大陸獵金: １３５　有得食就好食

正當我仲覺得佢地係傻左之際，突然間有幾個大隻佬推左車仔入黎。係似果Ｄ五星級餐廳既食物車。

一陣歡呼聲，由我果三位兄弟傳出黎。

「唔知今日又有咩食呢？」阿輝望住係佢面前用個銀色蓋住既野，期待緊。

「大前日就龍蝦，再前日就羊架，今日係咩呢？」阿倫就話。

「唔理咩都好，總之一定係好野。」阿俊已經流晒口水咁望住佢眼前既野，又話：「兄弟們，開餐。」





阿俊一聲令下，佢地三個都隔住道鐵匣拎起個銀盤。

「今餐食牛排！正！」三個人同時大叫。

我唔係幾信佢地，都走左去睇睇係有咩食，一睇，又真係有一塊有我臉咁大既牛排，仲有薯菜，仲有餐湯面包。

食物質數好成咁！？

等等，跟據電影及一Ｄ電視劇，有咁好伙食既原因只有兩個，第一係Ｄ獄卒比人收買左，而第二就係食完呢餐就送去刑場……





但係，佢地三條友又食得好開心ＷＯ，而且聽佢地講話前果幾日都係大餐……唔通呢Ｄ食物有毒！？

人係一個困境既時侯，係最鐘意胡思亂想，因為佢對住咁多未知數，跟本都唔知下一步會係點。

更何況，我係一個最想平凡過生活既人，面對呢Ｄ事，真係真心講一句……你估我想架！

望到我既阿俊同阿倫，對住我講：「阿賢，你做咩唔食啊？」

「你地唔覺得伙食咁好有Ｄ怪咩？」我問。





而阿輝佢就答左我一個另我有動力食晒Ｄ排既答案：「唔理得咁多，有得食就好食，唔係都唔知接落黎仲有無機會食到。」

佢講得又岩，預期為下一步會係點而擔心，倒不如好好享用眼前既所有，而且，而家既我地都只可以咁做。