[惡搞無極限] 就係咁，我同幾個豬朋上左大陸獵金: １２５　交收

我地真係無諗過會有一個女人既名叫做時興隆，而且係個靚女黎，我地四個望到眼都凸晒，而我個腦就不停咁諗好多野。

點解？點解阿爺叫我搵既人係個女人？

點解？點解呢個人仲要目測係細過我？

果陣我聽個名，都以為係某個江湖大哥既名，可能係我阿爸既好兄弟，又或者係仇。但而家，眼前果女仔就係時興隆……咁究竟佢同我阿爸有咩關係呢？照果陣我咁細，計返上黎呢個女仔果陣一定細過我……廢話……

咁唔通！阿爸佢係個戀童！？





就係我諗到呢到之際，有舊野飛左埋黎直擊我個頭。

原來係時興隆，佢將本回鄉證掟返比我，然後話：「最多表情果個人，你同我過黎。」

我手指指咁指住自己，「我？」

「係啊。」時興隆又話。

而唔知點解，我果三位兄弟都用一個好妒忌既眼光望住我，而且配上勁粗既粗口。





我拎住批貨慢慢走近時興隆，而當就行到之際，佢旁邊既人就話，「呢個距離夠拿，將批貨拎比我地。」

我將批貨交左比佢地，而時興隆就目不轉睛咁望住我……