[惡搞無極限] 就係咁，我同幾個豬朋上左大陸獵金: ６６　折返ＧＡＹ　吧

我究竟做錯左Ｄ咩，定係我今年犯太歲，我只係一個想平平凡凡過生活既後生仔，點解我而家又要比人追…… 

我跟住阿俊係度跑，跑去邊度我唔知，我諗我前面呢位阿俊都係一樣。 

後面追住我地果班人，一路追住我地，路爆住粗，佢講果Ｄ係咩粗口我聽得唔係好清楚，我只係聽到當中夾雜住好多閪閪聲。 

「阿俊你知唔知我地要跑去邊架？」就快跑到無氣既我，終於開口問。 

「唔知，但係我知道，如果唔跑，我地實仆街。」 





「不如我地跑返去間吧先啦。」 

「點解？」 

「咁而家我地知道既地方就只有果間吧嘛。」 

阿俊沉默左一陣，「無計啦，你記唔記得路？」 

「記得少少啦。」 





「咁你帶路，我跟住。」 

其實我都只係建議跑返去間吧度，無諗咁多野，只希望去到個大叔果度會幫到Ｄ手，記得佢講過既說話當中，有一句係，「呢度邊會有人敢偷我勞斯萊斯野？」 

我諗，佢點都有Ｄ　實力掛，況且我舅父交帶左佢要睇住我，我而家搞成咁，個大叔唔會唔幫掛。