[惡搞無極限] 就係咁，我同幾個豬朋上左大陸獵金: ８ 打邊爐（２）
到指定既時間，我地四個坐係約左既大排檔，我同另外兩位兄弟你眼望我眼，而我女朋友就好開心咁睇緊個餐牌上面有咩野食。
我果兩位兄弟再睇一睇四周圍，向我表示左個「唔撚係啊」既表情，然後再打個眼色，叫我問阿欣：「不如我地去另一間好唔好啊？」
阿欣聽到後，好天真咁望住我，「點解啊，呢度唔好咩？」我ＦＥＥＬ到，天真背後隱藏住既，係殺氣。
我額頭開始流冷汗，「唔係，妳睇下呢度熱鬧到呢……」我無奈咁笑住望一望四圍。
仆你個街，而家個格局，根本就係有兩個字頭坐左起度，仲要好明顯咁分晒兩邊坐，講數既先兆咁款，而我地呢枱，就開正係佢地兩班人中間。
兩位兄弟聽到我既回答後，啤撚住我。
係係係……我收到……「咁不如，我地轉個位……」
我都未問好唔好，阿欣已經啤返轉頭，隻手用力咁搭住我膀頭講：「我就係想坐呢度，得唔得啊。」
「得……」我又好無奈咁笑住講。