「手天使的愛情」幫人洩慾，竟愛上盲女。: 51；試探爹地媽咪既口風。

同爹地媽咪一邊食飯，一邊睇新聞，我突發靈感，想試探下爹地媽咪既反應

我：「如果我第時搵到個老婆，要我照顧返佢，你地會唔會支持我？ 」

爹地：「梗係搵個老婆照顧返你啦，你咁懶 」

媽咪：「最緊要好生養，生返幾個孫俾我抱 」

我： 「窮人先生BB咖嘛，我地有錢人，梗係領養同助養啦 」



媽咪果然聽後就面露不悅，用筷子掃走我正準備夾既雞肉。

媽咪： 「唔好食雞啦，食菜啦 」

爹地： 「我地得你一粒仔，你唔生返幾件，我地點同長輩交待 。」

我： 「咁就簡單啦，你地今晚屙返件細佬出黎，傳宗接代既責任就落喺佢身上 」

媽咪： 「你試下唔生BB呀拿 」



我： 「講下啫 」

爹地： 「又激媽咪 」

我： 「不如我講件好消息俾你地聽啦 下星期我就出第一份糧啦 不如去M記擺返幾圍賀賀佢？」

爹地： 「跟我地返大陸玩下。」

媽咪： 「係lor，你做咩咁唔鐘意返大陸。」



我： 「我香港人，做乜要返大陸 大陸有既野，香港冇呀？ 我地大埔咁靚，日日行一轉都爽啦，」

爹地： 「又唔跟我地返鄉下。」

我： 「都話窮人先搭火車，我咁有錢，梗係搭飛機，鬼叫冇飛機搭，山卡啦黎 」

我： 「我食飽啦，兩位慢慢食 」

媽咪： 「唔駛洗碗呀？」

我： 「太子爺要做野咖？妹仔你俾心機喇 」

媽咪： 「洗碗呀大懶人 」

我： 「不知道，為什麼，不知道，為什麼，喜歡你，說不出口……」



一邊唱歌，一邊快步行入房間，關門，上鎖，打FIFA


男人有車一日唔鏈唔返幾手就會身痕，我有PS4一日唔砌唔返幾鋪就會囉囉攣。我最鐘意用愛隊列斯聯大炒紅魔鬼10球以上再瘋狂飛鏟曼聯球員，以泄我心頭之 恨，如果FIFA係可以好似拳王咁打交，我諗我每日都會打柒曼聯球員。當然，什麼車路士阿仙奴利物浦等等傳統隊伍，我都成日SM佢地。我對列斯聯既感情從 我屋企波衫就睇到出，大大話話十幾件列斯聯波衫，夏天甚至著住出街著出返工，而我會特登買曼聯波衫，套喺枕頭掛喺墻上，見一次打一次 有d曼聯波衫會俾我當抹地布用，有時候打飛機唔記得拎紙巾又費事開門出去，就曼聯波衫拎抹精液。有一次心血來潮，仲拎曼聯波衫入廁所抆屎

而我間房，貼滿列斯聯既海報，阿倫史密夫，基維爾，維杜卡，夏迪，加利基利，活基治，保耶……仲有千禧年歐聯出戰拉素既大合照 N年前托英國表姐幫我買好多列斯聯既精品添，入到我房間，就好似入到列斯聯主題室咁，仲有好多剪報同雜誌


當我打緊FIFA個陣，永芹打電話俾我

永芹：「雅輝，做緊咩呀？」

我：「你俾我一分鐘既時間，等我整埋d收尾先。」



80分鐘炒到曼聯8：0，點都要炒夠10球先，一個長傳塞到禁區，Lewis Cook扭過一個就ban埋去，Goal 再黎Alex Mowatt半場左扭右扭扭傳俾Mirco Antenucci射入。搞掂，每日任務就係炒鳩曼聯10球

我：「永芹，今日有冇掛住我？ 」

永芹：「有呀，但係你唔打電話俾我既？」

我：「其實係咁既，因為今日都幾忙下，雖然冇打俾你。拿唔緊要啦，不如聽日晚上約出黎散步啦 我又整d野俾你食呀# 」

永芹：「有咩食咖？」

我：「呵呵，精彩lor，成個廣福道邊個最有才華？我。成個廣福道邊個最有power？我。我整個d番茄炒蛋，菜心牛肉，孖蛋粥 世界級好味。」

永芹：「孖蛋粥係咩黎？」

我：「鹹蛋加皮蛋煲粥，食完返唔到轉頭# 」




永芹：「哈哈，但孖蛋粥個名聽落怪怪地。」

我：「雙丸粥又得，鴛鴦粥又得，黑白粥又得，黑白半頭時粥，黑白忌太明粥。」

永芹：「最後個兩個名咁似詩句既？」

我：「叻女。黑白呢兩個字可以吟詩咖。例如：黑白雙擊迸红光，例如：只緣黑白太分明，例如一盤黑白互交羅……」

永芹：「詩句可唔可以唱出黎？」

我：「山歌形式勉強唱到既 」

永芹：「你唱啦，我要聽。」



我：「air……靚女靚女我愛你air，好愛你air。」

永芹：「哈哈，要詩句呀。」.

我：「Google緊，等等。」

我：「air……一盘黑白互交羅air。互交羅air，只緣黑白太分明air，太分明air。黑白縱橫幾局棋air，縱橫黑白戲拈棋air 」

永芹：「好聽呀，捉緊棋」