「手天使的愛情」幫人洩慾，竟愛上盲女。: 22；夢見俾屋企人發現我做手天使。

搞掂Edwin單野，我咪刷牙洗面，點知臨出門剃鬚個陣整到自己流血，d血把把聲咁流 好彩屋企有雲南白藥神速止血，如果唔係以我呢d柒到核爆既個性我應該會call白車。點知柒事一單接一單，出門個陣都會唔覺意click親仆街 頭就咁憾落墻度。

「屌，好撚痛呀！ 」

有幾何自殘會打孖上？我feel到今日一定有大事發生，黑仔到咁樣，我懷疑陣間返工都會遇到悍匪挾持巴士，或者行到公司樓下俾印巴籍恐怖分子開槍 掃射，定抑或係行行下俾舊隕石跌落砸死咗……咪以為我好樂觀呀，人總會有悲觀既時候，我越諗就越驚，越諗越唔敢入lift。都係告假一天啦，反正個個 Heidi好似返咗黎，應該唔缺人手掛。

「Tiffany，我今日唔舒服，想請假 」於是我即刻send個wechat過去，然後入返屋企煮營多食。

「咁你記得睇醫生啦 」冇幾耐，Tiffany覆我，短短幾個字，都俾人感覺到好warm。




食完早餐，有忽然好眼訓，於是走去繼續訓，點知，黑仔野係足不出戶都會遇到，我就發咗一個夢，好得人驚，仲要搞到我喊得好犀利。


……夢境總是無厘頭地一下子去到，我冇啦啦有記者訪問我做手天使既經歷，咁我就同佢講咗好多真情流露既說話，點知，過多幾日，我呢篇訪問竟然做咗A1頭條，連我個樣都冇打格仔，全香港都知道我係手天使，全香港都知道我林雅輝係手天使
……去踢波，Jason Jim Edwin都笑鳩我on9，行喺路上，好多人都對住我指指點點，連返到屋企，爹地媽咪都同我嘈起上黎。


媽咪：「咁多工你唔返，你走去做呢d工？你仲有冇廉恥咖？」



我：「點解要搬個廉恥出黎講？我為殘疾人服務有乜問題。」

爹地：「你即刻同我辭職，然後返黎五金鋪幫手 」

我：「我做手天使有乜野問題？我覺得好有意義wor，點解連你地都要睇我唔起！你地係我爹地媽咪黎咖。」.

媽咪：「我同你爹地就黎抬唔起頭啦，成個香港都識你啦，衰仔！」

我：「咁又點？我專注我份工作，我點解要理人地點睇我？ 」



媽咪：「我得你一粒仔，我唔準你返呢份工！」

我：「21世紀啦，你地既思想仲咁迂腐，台灣一早都有手天使啦！香港標榜自己係開放社會，開明社會，點解連手天使都接受唔到？」

爹地：「手乜野天使，幫人打飛機，咁核突！」

我：「冇廉恥，核突，原來係咁樣定義。」


爹地：「唔理你，你做乜都得，唯獨係呢份工唔得？」

我：「點解我搵到份咁有意義既工作，你地都要同社會大眾咁，一齊趕絕我？」

爹地：「冇趕絕你，我地俾緊機會你重新做人？」



我：「呵呵，重新做人，家陣我打家劫舍定殺人放火，定係強姦婦女呀？我做手天使，我有乜野錯？」

爹地：「總之你快d辭職。」

我：「殘疾人冇阿媽生既？一出街就要俾你地歧視？殘疾人都有性慾咖！佢地都需要人地幫需要人地關心咖！！！」

我：「你地永遠係咁偽善，講就一套，做就一套，站在仁義道德立場就話要尊重殘疾人，點知家下知道有手天使呢份職業，社會大眾非但攻擊我等手天使，仲要抨擊殘疾人冇廉恥。」

我：「乜健全既人唔會自慰既？唔會扑野咖？ 」

爹地：「講極你都唔明！」

我：「係呀，我唔明呀，你地全部人一夜之間當曬我地係過街老鼠，而我地僅僅係忠於自己份職業。社會大眾逼到Tiffany跳樓，仲日日留守我地公司門外指住我地鬧。」

爹地：「仲好提Tiffany？唔係佢你都唔會做手天使啦。仲有呀，你快d同個個盲妹分手呀。爹地媽咪乜野都可以俾曬你，但你唔可以同盲女再來往。」



我：「我要娶阿芹！」

媽咪：「唔準。唔準娶一個睇唔到野既女人！！！！」

我：「我話，我要娶阿芹呀！！！」

爹地：「唔準同d殘疾人來往。」

我：「我都係殘疾咖wor 。我右眼都睇唔到野咖wor！」

爹地：「你唔同，你唔使好似盲妹咁累人累物。」

我：「我會照顧阿芹！」



呢個時候，媽咪兜巴就咁打埋黎。

媽咪：「我唔要盲妹做新抱！以後你爹地媽咪仲使唔使做人？仲使唔使見人？乜架都俾你丟曬。」

我：「呢d人係我同阿芹之間既野，唔需要你地同意！我地真心相愛，我地要結婚。」



爹地：「咁你以後唔好叫我地爹地媽咪啦，你搬走啦。」


我：「好。」


突然，夢醒了。眼角都仲有眼水，當我意識到係夢，但仲喊得更加犀利