《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 不懂
見狀我都起身想去個廁所， 海晴都跟住我起身， 「我都想去一去洗手間。」
「喂你去廁所唔舉手問嘅妹妹仔， 一陣呀sir唔比你去呀！」 軒少突然叫道。
「噗…… 係囉陳sir喺個邊你仲唔問佢」 我都忍唔住加把口。
軒少一幅恥笑嘅樣子帶住嘲弄嘅聲音傳過黎， 海晴一聽到就回頭望一望軒少， 之後聽完就低頭… 雙手緊握拳頭…
「唔… 唔好衝動！ 我哋去柯尿啦！ 係軒少戇鳩姐！ 唔好同佢嘈！」
我拉一拉海晴白滑嘅手臂， 佢成身震一震， 之後抬頭狠瞪住我，罵我一聲， 「你好煩呀！」
之後轉身走去樓層另一邊， 軒少見狀就揮揮手， 示意我快啲追上去哄返佢。
我馬上轉頭跟上海晴嘅步伐， 佢每一步都行得好大步， 完全唔似佢之前嘅作風， 睇黎佢真係嬲…
「喂唔好嬲啦，」 前往廁所昏暗嘅通道中， 我快步跟上去海晴身後， 拉一拉佢手臂， 點知佢大力fing開我， 繼續加快速度頭也不回向前行， 頭上嘅馬尾都fing得更快。
「喂… 你真係嬲呀？」
「無嬲。」
「咁點解你唔同咗嘅？」
「我話咗我無嬲。」
「但係你...」
「你有做過激嬲我嘅野咩？」
「呃… 有…」
「你做咗啲咩？」 佢依然頭都不回。
「Sor… Sorry呀… 我… 我唔應該笑你…」 我摸摸後頸， 係我緊張時嘅小動作。
「你sorry做咩呀？ 柒嘅係我又唔係你。」
「我… 我唔應該笑你… 我只係諗住同軒少拉埋啲先附和佢… 我無諗過你真係嬲…」
海晴轉過身， 佢鼓起臉孔， 雙眼視線卻放喺地下。
「我唔知道你會唔鍾意…」 我捉實佢雙臂， 希望可以安慰佢。
「唔係…」 佢雙手放喺身旁， 卻不住抖震。
「根本唔係咁！ 唔係咁樣架…！」 海晴突然抬頭， 雙眼紅腫咁推開我。
我被佢嘅舉動嚇呆咗， 我估唔到個玩笑竟然會咁嚴重…
我講野唔叻， 更莫講話哄女仔， 我只係諗到道歉， 「Sorry呀…」
「你根本就唔明！」
「唔好再講sorry呀！」 海晴講完呢句之後… 就跑咗去廁所。
我… 唔明啲乜？
海晴係咁諗架咩？ 直到佢離去， 我都未曾發現佢嘅想法， 或者我一直只係自以為自己明白佢點諗， 又或者我根本無試過去諗。
可能… 其實唔只係佢一個。
================ ============== ================
好快， 離集合時間已經不遠。
我摸摸褲袋， 終於記起一直感到嘅違和感喺咩。 係我個把刀。
無咗刀仔， 我如何能夠擊殺喪屍呢？ 單憑枝滅火筒根本無辦法有效殺喪屍， 最多只能夠擊退佢。 一諗到呢度， 我馬上跑返去琴晚間房個到， 希望仲搵得返把刀， 同時亦希望佢哋唔會收起我把刀。
我快步跑回房間， 幸運地我喺書桌上面搵得返Madam比我嘅刀仔， 我將佢收好， 以備不時之需。
收好刀之後， 我打開門行出房間， 正好與陳晉視線交疊。
「準備好未？」 估唔到佢主動向我搭話， 我回望四周， 海晴仍然未出黎， 權哥同軒少則喺另一邊研究武器。
「都叫準備好啦…」
但係… 一陣我應該點面對佢呢…
「係咪有咩事？」 我警惕地抬起眼晴， 唔通佢岩岩見到我同海晴嘅事？
「我只係覺得你神情比剛才凝重， 一陣要做嘅野好危險， 少少分心可能會死。」
估唔到嘅係， 陳晉竟然會如此細心， 更想不到嘅係， 佢竟然會關心我。
我雙眼望住陳晉， 彷彿望多一剎就能夠看穿佢一樣。 此刻嘅佢同剛才為虎作倀嘅黑警判若兩人， 佢到底點解會關心我， 點解佢有一種違和呢。 此刻嘅我希望， 陳晉會向我傾吐內心， 向我述說佢心入面嘅苦結， 然後由我帶佢重生。
「陳sir… 點解你要選擇做黑警？」
佢無面向我說話， 我同陳晉就咁背靠牆壁， 望向窗口， 看著無數嘅黑白間痕。
「比起諗點解我會咁做， 你應該有更重要嘅事要做。」
我轉頭望向佢。
「你應該好好咁珍惜呢一刻身邊嘅人。」
「雖然你可能會憎我， 但係我哋依加係同一隊人， 係彼此嘅同伴。 你係呢到嘅原因都好簡單， 就係上頭嘅命令， 就只係因為人手唔夠， 無其他原因。 但係， 我哋點都成為咗一team人， 呢一刻我哋就會互相幫助。 就算你比喪屍包圍， 我都會出手救你。」
「因為呢一刻我哋喺同伴。」
「然而， 你同個個女仔嘅關係， 就只能由你自己去解決。」
因為曾經發生過剛才嘅事情， 所以我現在才會變成咁樣。 我開始覺得， 人類並無想像中那麼簡單、 那麼單純。 同時開始覺得自己無可能就此看透海晴嘅心思。 我無法輕易地斷言自己了解海晴。 我唯一能夠做嘅， 就是傾吐自己嘅想法與過去。
我都唔知道應該點樣做， 雖然將自己企喺人哋角度諗， 將彼此連接起黎好似好容易， 但係我怕做起黎會失敗。
但係海晴都有權利去知道同了解我， 咁樣先能夠令大家互相了解， 既然我唔明白佢嘅心思， 不如就由我將我嘅想法講出黎，
「我會。」
「個女仔仲未出黎， 你去搵佢， 之後我哋出發。」
我嗯一聲回應佢， 之後就快步跑去洗手間方向。