《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 閉門
Nutrients? 呢枝野唔通係一枝營養素？
原諒我除咗nutrients之外… 前面埋英文字都唔係好明點解…
既然係營養素… 莫非我仲有運氣， 呢枝野正好可以解決我目前嘅身體狀況？
但係我知道， 唔係嘅機會率仲高。
我內心頓時彈起一個諗法。 腦中同時響起一把聲音。
嘿， 要做大事， 要成名， 要出位， 要報仇， 人就要夠心狠手辣！ 所有得罪我嘅人， 都只得一個下埸！ 就係死！
我未曾與生命賭博過， 所以我感到害怕吧？ 我咁膽少有咩用！？ 我想一世被人睇少咩？ 個個潘sir永遠少看我！ 佢永遠都喺我頭上啊！
內心嘅想法正正踩中我唔想觸及嘅地雷， 引爆我積藏多年嘅痛火！
我掩頭大叫， 「你同我收聲呀！！ 胡… 死差佬！！…」
無錯… 要成為最強嘅高手， 得到保護別人嘅力量， 首要條件就係要咩都夠膽做。
連食枝管咁簡單嘅事都猶豫， 咁仲點可以妄想繼續可以報仇？
我一手拿起營養素， 從手臂到手指一直在顫動著， 取下蓋子嘅動作都做得十分艱難， 連試了幾下先成功。 我將管口送到嘴邊， 用力一擠， 灰白色嘅營養素如同牙膏一樣滑進嘴裡， 再被艱難地吞嚥下去。
恭喜你！ 你已經踏出重生、 脫胎換骨的第一步了！
當我吞下一口嘅時候， 內心大吼出呢一句。
心中痛怒慢慢消逝， 我嘅思維都慢慢變得清晰。
雖然可能只係一枝普通嘅藥物， 可能並唔會治療我身上所有嘅傷同喪屍病毒。 但吞下呢一口卻令我內心更加強大， 心更盡手更狠。
我開始慢慢思考。
某人留低特製嘅營養素同水， 莫非喺政府留低既？
但係唔知係唔係特登， 政府醫院提供嘅營養素苦澀乾硬兼而有之， 口感就好似係嚼緊木屑一樣。
在經歷了極端疲勞後， 人嘅食慾本來就不佳， 再食咗呢種明顯係為了妨礙人類味覺而調配出來嘅營養素， 一口吞落去就有想嘔嘅感覺。 此外， 呢一類嘅合成營養素需要大量嘅水黎中和， 一口食落去唔馬上飲水嘅話， 即刻就會口乾舌唇燥， 好似喺沙漠中長途跋涉數日數夜般， 但係若果你多飲幾啖水既話， 個胃就會有被填滿嘅感覺， 飽得令人非常之唔舒服。
「枝野你架咩？」 聲音由門口傳黎， 我望向門口， 只見軒少正好點起煙。
「唔係…」 我呆然望向軒少， 一時之間心虛唔知點答。
「咁錢呢？」 下？ 佢想點？ 唔知佢想點我只好見一步答一步。
「無帶。」 我身上嘅銀包早已經跌咗， 依加身上基本上係咩都無。
「無錢夠膽亂掂野？」 佢究竟係咪傻咗？
「畀個面， 得唔得？」 我思考咗幾秒， 決定開始同軒少拉近距離， 先用靠近古惑仔多啲嘅語氣同佢溝通， 話曬佢曾經救過我， 應該對我唔反感。
「面？ 你兩手空空就想叫我放過你？ 我比面你我就真係無面！」 軒少抬起頭， 燈光下我只見到佢左眼喺冷冷瞪住我。 軒少舉起枝煙指住我， 質問道，
「細路， 你係到做乜你又係邊位？」 想起黎我都未同軒少正式介紹過自己…
簡單同軒少介紹咗自己之後， 佢就一言不發繼續食煙。
我將思維再次放喺營養素。
茶水間入面放嘅一管營養素實際上喺幾餐份量， 只係吞食咗三分一， 我就感覺飽滿。 經過今日恐怖嘅經歷後， 我哋大多數人爬入房後， 第一件事就係先倒頭大睡。 少數人堅持住食咗少少杯麵， 都沉沉睡去。 所以疲憊感亦係阻礙我哋補充體力嘅一大障礙。
咦……？ 突然間我感覺到全身好似比火燒咁！
「嘩！ 好熱呀！ 好熱呀呀呀！！！！！！」
「嘎… 嘎… 嘎… 你… 比我… 食嘅係咩？？ 令我好辛苦…」 我半挨喺台， 劇烈嘅痛苦令我無辦法完完整整講野！
「呢種藥， 會將你身上原本嘅器官， 全部瓦解。」
「咩… 咩話！？ 咁我咪… 豈不是…」
「嘿嘿， 係， 你條命已經無咗啦。」
「豈有此理， 你夠膽呃我！！？」
佢竟然想毒死我！ 我就算死都要搵你陪葬！
「你唔殺我！ 係想玩我笑我係咪？？ 我同你死過！！？」 我強忍痛楚， 想起身衝去軒少到， 點知突然…
「細路， 唔好人講你就信， 自己感受下用腦諗下先好無？」
身上嘅痛楚好似唔見曬…！
「咦？ 身… 身上嘅痛楚…」
「枝野並唔係毒藥。 驚人嘅養份同麻醉痛楚先係枝野真正用處！」
「麻醉痛楚！？ 好勁！…」
「呢枝究竟係咩黎？ 你點樣得返黎？」 我企直望向軒少， 一連串問出我心底嘅疑問。
「你無需要知道。」 佢低頭繼續食煙。
我用咗五分鐘先將所有嘅營養素都吞了下去。 精心調配嘅養分以驚人嘅速度被傳送到全身各處， 有效嘅藥物成分則第一時間輸送到了各處受損的肌肉上。 而入面嘅麻醉成份亦令我感受到嘅痛楚大大降低。
呢枝營養素感覺唔係一般嘅食物同藥物能夠相提並論。 呢種特製營養素均衡、 全面、 含熱量極高， 裡面應該仲含有唔少緩解疲勞、 減低肌肉損傷嘅激素藥物。 因為食落去十幾分鍾後， 我感覺身體嘅痛楚好似消失咗一樣， 令我懷疑入面會唔會有麻醉藥。
不知是否幻覺， 我感覺一條條肌肉纖維喺吸收完養份和藥物後， 紛紛一齊蠕動起來， 以我感覺到嘅可見速度係到變粗加韌， 以應對即將到來無比辛苦嘅新考驗。
「喂， 軒少， 」 佢聽到我叫佢後抬一抬頭， 金色嘅瀏海掩住一隻眼睛， 默默凝視住我。
既然軒少有意幫手， 我都直接表態。
「依加潘sir同呀豪佢哋兩班人同氣連枝， 扮晒老友咁， 仲有權哥都唔buy你個套， 你一個打三瓣， 點計都無著數， 不過只要你同我結盟， 我敢膽保佢哋一定唔敢再搞我哋！」
軒少呼一口煙， 漫不經心道， 「個條潘震聰喺差館個朵都唔細， 出咗名唔係好人。 佢係高級督察， 呢個人你惹唔起架喎。」
無論點講， 潘sir都係一個警察， 警察乃係掌管秩序嘅重要人物， 社會中所有有關紀律， 上至暴亂， 下至民事糾紛， 總之所有有關社會秩序嘅問題， 通通都要交由警察管理。
特首若需要動用紀律部隊解決問題， 都必須要得到警務署署長嘅同意， 可見其地位喺社會中係何其重要。
若果得罪潘sir， 難保我哋到達港島嘅時候會受到咩對待。 雖知道警察入面仲心存正義嘅人實在係太少， 經過剛才嘅事， 我都唔會再盲目相信會有人為我出頭。
不過…
「高級督察又點？ 我最討厭就係呢種恃強凌弱， 蠻不講理嘅惡人！ 我哋有道理嚮手就邊個都唔駛驚！」 我打橫揮一揮手， 就似像眼前嘅阻我嘅野一一踢走一樣！
縱然知道此舉係九死一生、 以卵擊石， 我都不作考慮、 決不後退。
因為再退， 就係懸崖！
我絕對唔係個種見死不救、 貪生怕死嘅人！ 與其一直苟且偷生， 不如一刻活得轟轟烈烈！
若果要我我拋低自己啲朋友唔理， 我以後仲有咩資格去愛人…
縱然活著， 亦愧對別人， 愧對自己。
所以我決定走上呢條不回歸路。
我諗起一句說話，
活， 就要活得不愧不作！
死， 也要死得無悔無憾！
軒少再呼一口煙， 緩緩道。 「轉數唔差， 都算有啲用。 雖然唔打得， 不過叫肯為條女企出黎， 都叫夠義氣。 依加黎講算唔錯， 真係可惜…」
「可惜咩？」 我答。
「可惜之前你入錯隊， 跟錯大佬！」 佢指嘅應該喺我之前會議企喺警察個邊， 無企喺佢個邊。
「其實岩同錯， 只係睇觀點與角度姐。」
茶水間被一個個煙圈瀧罩住， 微微發黃嘅燭光輕輕搖曳， 令我不甘慢慢離神。
「咕嘟── 咕嘟──」
水慢慢滾起， 水蒸氣慢慢將我哋視線掩蓋， 一時間耳邊就好似只有水聲一樣。
我望住眼前嘅gas爐， 拎起旁邊嘅公仔麵， 打開放落去。
隔離咁岩仲有魚蛋， 我見到都放埋落去。
我哋默默望住公仔麵將滾水按低， 再睇住麵慢慢軟下黎。 四周依然漆黑一邊， 除咗我哋呢一張台外。
我望一望牆上嘅時鐘， 依加已經係凌晨一點半。
軒少默然一陣， 繼續講， 「聽啊權講， 你唔單止忠心團隊， 對朋友兄弟仲好講義氣， 岩岩見到你咁， 真係幾夠義氣。 不過女呢家野年終咁多， 你咁幫佢， 值唔值得？」 軒少抬起頭， 目光射向天花板。
「值唔值我就見仁見智啦， 不過……」 我低頭拎起快子， 夾起麵條。
「如果唔係佢， 我今日都無機會同軒少傾到計啦。」
軒少嘴角勾起一陣微乎其微嘅笑容。
第一次同軒少單對單講野只係幾句廢話， 但係， 接下黎嘅對話令我徹底領教到軒少果然唔簡單。
「畀你同我傾到計又點， 你一句唔該都無就偷咗我枝野， 就唔驚我──溶咗你？」
「呢個時候咩地方都無錢拎啦下話， 你叫我邊到搵錢比你？ 你應該都唔需要錢， 就當我欠你一個人情啦。」 我心入面諗， 既然軒少一開始無阻止我拎佢枝營養素， 咁佢即係有心比我食用， 而我亦都諗唔到佢想由我身上得到啲乜。
「夠雷！ 既然你肯認頭， 咁我就收咗你呢個人情啦。」
「哦...」
「哈哈哈哈哈…」
「你都幾叻仔， 夠薑咁同講黑社會講野， 好嘢。」 軒少半企喺我隔離， 但視線始終無放喺我到， 只係呆望天花。
「你真係黑社會黎架？」 我問完後， 軒少轉過頭， 正面凝視我。
第一次同古惑仔傾計， 比佢咁望法我當堂想避開視線。
「朋友易得， 知己難求， 難得我同你傾到兩咀， 當我畀個見面禮你又好， 益下你又好啦。」
「唔趕時間就食埋枝煙先走。」 軒少遞起煙盒比我，
「煙仔…… 唔合我胃口喎……」
唔好睇軒少一幅游手好閒嘅樣， 其實佢內心好有心計， 應該細細個就出黎打滾江湖， 閱歷豐富， 一睇就知埋佢身嘅人係人係鬼， 佢依加肯同我吹水， 應該係覺得我對佢有用。
「呢隻煙出面好難搵架， 要適逄其會先至食得出味道， 你唔識欣賞就真係走寶。」
「咁呀…… 好啦……」
軒少遞個煙盒比我， 我拎起其中一枝煙， 放入口中。
「咔躂──」
之後軒少拎個打火機出黎， 手掌護住火光， 為我點火。
「記著， 你以後要絕對聽我講， 並照我指示做事， 唔好亂黎。 因為只有我能帶比你能力報仇， 令你將過往睇少你嘅人打低， 出咗內心呢口怨氣。」
咁即係認軒少做大佬啦... 不過... 軒少睇落都叫有情有義， 而且我...
無從選擇。
我已經唔想再被人睇少。
「好。」 我回應道。
我感受到火光傳黎嘅熱力， 煙點著後， 我吸一口煙， 再緩緩呼出。
我並唔係無食過煙， 早係岩岩入行做野個陣， 同事就問過我食唔食。
當時貪得意， 食過一次， 無咩感覺， 只係覺得喉嚨好唔舒服。
我哋兩個就好似識咗好耐嘅兄弟咁， 突然間令我覺得好有古惑仔feel。
之後軒少就走咗， 走前再度叮囑我唔好輕舉妄動， 返去陪海晴休息下先， 等個差佬再搵我哋行動個陣先再諗點做。
不久後， 我再次回到海晴所在嘅房間。
我剛躺下， 心中雜亂嘅思潮再度湧起。
岩岩如果唔係陳晉插手， 潘sir到底會對我做啲乜？
陳晉， 到底係咩人？