《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 血路 下
我急步衝入去， 但好快喪屍已經黎到！
我同海晴快速推埋鐵閘鎖上， 喪屍岩岩就撞上黎。 佢哋不斷衝擊白色嘅鐵閘， 街尾的喪屍見狀也衝了過去拍著鐵閘， 道鐵閘一時之間被喪屍包圍， 無數喪屍雙手伸入鐵閘空隙， 不斷張開口想將我哋吞食！
「吼啊啊啊啊啊啊啊啊啊啊啊───────！！ ！！」
一入到鐵閘， 我幾乎係被喪屍推跌入黎， 所以我依加坐喺地下， 緊張咁望住鐵閘， 白色嘅鐵閘極奇堅固， 我諗人類喪屍係無可能爆到入黎。
我慢慢爬起身， 海晴見狀馬上過咗黎扶我， 我同佢講， 「我哋入去先， 睇下會唔會有其他路去到警署。」
佢扶咗我起身， 我哋急步離遠鐵閘， 仔細打量身處嘅地方， 我發現我哋處於一個兩邊都係鐵閘嘅地方。
「無路行...」
「你… 你隻腳有無事呀？」 海晴望向我仍然腫起嘅小腿， 小腿上仲有清晰可見嘅血跡， 其實好痛， 真係好痛。 每一秒隻腳都傳黎一陣一陣嘅痛楚， 就好似打樁咁一下一下痛到入心。
「無咩事， 我仲可以行。」 但係， 我都唔知點解我會答佢我無事。 可能我想喺女仔面前扮勁呈下強掛。 不過我知道， 海晴無可能鍾意我。 喺經過咗薩利亞個件事之後， 佢對我已經再無以前咁敞開心窗。 若果之前一開始識嘅時候只係普通嘅陌生人， 喺M記個陣我哋就應該成為咗朋友。
而跟住佢發現到我唔想救其他人嘅時候， 我已經喺佢心中係一個被厭惡嘅人。
依加佢會再關心我， 我其實好開心。 我好希望佢會當咩事都無發生過， 但我知道無可能。 佢會問我有無事， 純粹係因為頭先棚竹跌落黎嘅時候， 我諗都無諗就用我身體去保護佢。 佢會關心我， 係因為佢有人性， 佢係一個好好嘅女仔。
其實， 我根本唔了解海晴。 我救佢都只係因為我想佢留意我， 我根本好自私。
「對唔住…」 我對海晴道歉。
「為咩講對唔住？」 我坐喺地下訓喺牆邊， 而海晴就企咗起身望緊警署嘅鐵閘。 佢依然背向我， 無回頭。
「我唔應該拋低佢哋， 我唔應該見到有人都唔幫… 對唔住….」
「係架… 呢個情形你絕對要覺得你對唔住佢哋。」
「你可唔可以原諒我？」 我抬頭望向海晴面孔， 希望從中讀取到佢呢一刻嘅想法， 希望見到佢嘅微笑。 陽光直射過黎， 我見唔到海晴嘅表情。
佢並無回答。
「你爬唔爬到上去？ 」 我問海晴。
「算啦我哋睇下另一邊有無機會出去， 爬上去應該無可能。」 佢未答之前我再講。
我聲線透露出絕望， 此時面如死灰， 只可以無力攤喺牆邊。 我哋嘅左手邊係一道石屎牆， 牆上面就係公屋樓層， 而右邊， 就係警署！ 但要爬上警署根本無可能！ 道閘至少有三米高， 甚至四米。 底下個兩米係石屎牆， 上面係鐵閘同防止人爬上去嘅鐵線網。 我哋唯一嘅路只可能係另一邊嘅鐵閘。
另一邊嘅鐵閘應該係通往公屋入面， 放眼望去只係見到有啲樹蔭， 應該係一個比小朋友玩嘅公園。 公屋個邊嘅鐵閘似乎有一陣陣踏踏聲， 但我無時間再深究。
「踏踏踏踏踏踏踏──」
「吼嗷嗷吼嗷嗷嗷嗷──！！」
「嘭！！」
我哋身後， 一個狗頭猛然撞向鐵閘！
「吼嗷吼嗷嗷吼嗷嗷！！」
大獲！ 差啲忘記咗後面仲有一隻喪屍犬追緊我哋！ 喪屍喺追到獵物之前都唔會罷休！ 呢個喺我哋自己得出嘅結論我竟然忘記咗！
依加我行路一拐一拐， 左腳不時傳黎陣陣痛楚， 如非必要我都想繼續坐係到。 但係右手邊嘅鐵閘方向， 遠方慢慢浮現出喪屍狗嘅身影。 我心中頓時泛起一陣焦急， 喪屍犬嘅恐怖我好清楚， 我哋見到佢只有死路一條！
運氣， 永遠唔係我呢邊。
「海晴你試下爬上去！」 海晴馬上回應我一聲， 就跑到我身邊。 我屈膝跪下， 用雙腳組成一個階級， 海晴馬上企喺我雙腳上， 我發力試圖頂佢上去。
「唔得呀！ 太高啦！」 海晴跳返落地， 急忙向我講。
「你企上我膊頭再試下！」
我再跪喺海晴面前， 佢雙腳慢慢踏上我雙腿， 再慢慢企上我膊頭。 我感覺到身體傳黎極沉重嘅壓力。 我雙手捉實海晴小腿， 然後全身立即企直， 整個人背部壓向牆壁。 海晴驚叫一聲， 我感覺到海晴開始往上爬， 肩膀上傳黎海晴嘅體重壓力。 我用力企起身後不停轉頭望向鐵閘， 但海晴成條褲擋住我視線， 我只能聽到身邊傳黎嘅撞擊聲。
「澎！ 澎！ 蓬！ 」
「碰碰！ 砰！」
沉重而有力嘅撞擊聲有規律地傳過黎， 旁邊仲混雜喪屍嘅吼叫聲！
「呃吼啊啊啊啊啊啊啊啊啊啊啊──！！！！」
「都係唔得呀！」
「你跳上去嘅話夠唔夠高？」
「仲差好多呀！」 海晴焦急回應我。
「我試跳你再試下跳睇下掂唔掂到！」 我望向另一邊嘅鐵閘， 個邊有幾個喪屍身影同跑步聲， 我哋已經兩面受敵！
我轉頭望去鐵閘個邊， 隻喪屍狗全速撞向喺鐵閘前嘅喪屍群入面！ 佢不停擠不停擠不停迫入黎， 中途不斷推開其他感染者， 終於佢迫到個頭入去鐵閘空隙之間！
佢血紅雙眼好似流緊血咁， 不斷發癲咁開合開合個口， 血水流到一地都係， 啲牙甚至發出極響亮嘅碰撞聲！
「吼嗷──！ 吼吼嗷嗷嗷！！」
喪屍狗迫唔到入黎， 佢竟然退後， 助跑幾下再全速用身體撞向鐵閘！
隻癲狗好快撞到流血甚至有條骨喺出面， 但無阻佢想食我哋嘅決心！ 佢只係一心想咬死我哋！ 佢並無痛苦或退縮嘅表情， 撞出去後再全速跑撞向鐵閘！
「痴線！」
我心急之下本能咁罵一句！
好快個鐵閘開始彎咗入黎！ 隻狗身上面嘅毛都突出咗一條白滲滲嘅骨… 血不斷湧出黎。
個閘被佢撞到向內彎咗， 形成一個小小足夠被人通過嘅入口！ 好快鐵閘被撞出一個凹位！
喪屍狗興奮怒吼一聲， 馬上提腿向我哋跑黎！
「無辦法！ 掉頭走！ 海晴你去開後面道閘， 小心喪屍！」
我哋依加正身陷險境， 閘口嘅喪屍猶如餓狼般全速衝過黎， 想要撲低我， 我急忙喺褲袋拎出刀， 跑過去為海晴擋住佢哋， 為佢爭取時間。 呢一刻我感覺佢哋力量同速度比起喺商埸見過嘅喪屍更大更快， 而我則處於油盡燈枯嘅階段。 除了大部份喪屍全無懼怕受傷咁衝過黎之外， 更多係因為某啲喪屍身型比我更高更大， 只有我一個人如同螳臂擋車， 頂唔到好耐。
迎頭衝黎嘅第一隻喪屍喺一個大嬸， 佢著住普通嘅便服， 張開雙手向我撲黎。 由於呢條都算係一條巷， 我同衝入黎嘅喪屍都有一段距離， 所以有足夠時間比我睇準喪屍嘅行動。 大嬸喪屍只係直直咁向我跑黎， 我心中默默計劃佢一衝到黎我前面我就向左閃避， 再用刀插佢條頸， 而無意識嘅喪屍應該係唔會反應到嘅。
好快喪屍就跑到黎我身前， 大嬸喪屍身後仲迎黎兩隻嘅喪屍， 但我無時間睇真， 大嬸喪屍雙手向我伸黎， 吼叫一聲就想捉住我！ 我一見到佢埋到身， 馬上如計劃般向左閃避， 岩岩好避得開。 喺佢撲空嘅一刻我立即舉刀向佢條頸插入去， 再用左手幫助用力將刀界得更深。
當我擋咗第一隻喪屍嘅攻勢， 勉強斬斷咗佢個頭。 第二隻喪屍就已經離我唔到一米， 佢搕大個口向我衝黎， 我只能夠勉強側身避開佢嘅咬勢， 但佢嘅雙手捉住咗我件衫， 情急之下我舉腳一下踢向佢心口， 用盡全力想踢開佢。 好在佢只係捉到我件衫尾少少， 所以好快就踢得開佢。
佢身後再有喪屍頂上， 喺我右邊伸出五指想抓住我， 我轉個頭已經反應不及， 被佢捉住手臂， 佢一捉實我就有一股巨力喺佢身上傳黎， 一邊將我推低一邊張口向我塊面伸黎。 毫無準備之下我背脊猛然落地， 腰間立即有一陣陣拉緊嘅痛楚。
我貶完眼之後呢個喪屍棚牙已經喺我面前， 我只可以用刀頂住佢棚牙， 但呢個身穿健身中心衫嘅男喪屍好明顯力量比我大， 我被佢壓到全身散曬。 好在我跌低個陣件衫遮住我身體， 所以感覺只係擦損少少， 比起左腳嘅傷黎講無咁痛， 但再落去一定會被喪屍群咬死！
「呀！」突然眼前喪屍被推開， 係海晴用地拖棍幫我！ 我馬上爬起身， 另一隻少女喪屍又去到我面前， 凶狠咁捉實我左臂張口就想咬！ 我馬上用右手推開佢額頭， 再用腳同手踢低佢將佢摔低， 然後再用腳踢向佢， 馬上借力拉埋海晴向後倒退！
「開到閘未呀！」 我邊拉住佢隻手向後走， 一邊回頭望向鐵閘。 但鐵閘仍然係緊緊鎖上。
「鎖咗呀！ 開唔到呀！ 喺另一邊鎖咗！」
喪屍再度來襲， 腦海一片空白只能不停向前方空氣快速揮刀， 但喪屍唔會驚， 佢哋依然來勢洶洶跑黎， 我繼續亂咁揮刀， 只能希望可以斬得死喪屍。 海晴用棍勉強頂住帶頭嘅一隻喪屍， 我哋連退幾步， 轉眼間已經退到鐵閘。
「頂！！ 海晴你爬上我膊頭！ 爬過呢度閘！」
「個邊都有喪屍呀！」 我望向閘另一邊， 公屋嘅公園遠處有幾個喪屍身影跑緊過黎！
「無得簡！ 快！」 我雙手捉實鐵閘， 再曲起隻腳好似兩層樓梯咁， 海晴馬上企喺我身上， 我再用力將佢推上去。
「啪啪 ！！」
「吼啊啊啊啊啊啊！！」
鐵閘另一邊衝黎兩隻喪屍！ 突如其來嘅出現我全無預料！ 一個師奶喪屍張口就咬向我捉實鐵閘嘅手！
「啊啊啊！！！」
手指有血噴出黎！ 手指好痛痛到我意識差啲崩潰！ 身體頓時一震， 劇痛從受傷嘅部位好似觸電一樣蔓延到全身， 握刀嘅左手馬上鬆開！ 我慘叫一聲， 望住喪屍一口咬落黎後， 我馬上左手用刀瘋狂插佢個口 ！ 但喪屍完全唔怕痛完全唔鬆口！
我不斷用力甩開佢然後用刀斬佢條頸， 終於佢慢慢訓低， 我馬上宿手， 但我右手無名指同尾指已經有深到見骨嘅傷口， 骨頭好似完全碎裂！ 右手已經完全用唔到力， 手指就好似無力咁掛係我隻右手到， 不斷傳黎劇痛， 我頭亦開始實到一舊咁， 頭開始好暈。
我唔敢用手按向右手傷口， 此刻我只係想疼痛快啲走， 望住血不繼流出黎， 我絕命大聲撕吼， 彷彿就能夠舒緩我痛楚。 喪屍此刻亦同時吼叫， 叫聲幾乎將要震破我嘅耳膜。 周圍嘅吼叫聲令我神志更加混亂， 恐懼同痛楚令我腦海一片空白。
「呀！」 海晴岩岩企咗上鐵閘上面， 但另一邊有喪屍所以佢無跳落去！ 而我呢邊嘅喪屍已經離我唔到兩米！
在絕望間我聽到鐵閘另一邊嘅公屋發出咔擦一聲， 上面傳黎海晴驚喜嘅叫聲，
「有警察黎幫手啦！！」