《屍寂九龍》─ 無法治癒嘅病毒喺香港爆發四小時後， 一群生還者合作逃出生天: 殺戮月台

隨住廣播既結束，我地終於到左紅磡站，火車既門終於都打開，迎面而來既清新空氣比車廂內既惡臭好好多，於是大部份乘客都一齊跑左出去，遠離呢個恐怖既火車。而我同高大男仔同皮膚黑黑地既男仔亦好小心咁夾住西裝男出去，一離開左車廂夾到去月台既時候，我地行埋一邊比其他乘客離開左先。但西裝男同喪屍一樣，見到咁多人行黎行去佢就變得好激動，不斷張牙舞爪咁想撲去最近既人類到，務求咬到一個人去開餐！

「喂屌()呢條友好似越黎越大力喎，我就黎捉唔實啦！有冇人黎幫下我手！」

由於我都係一個瘦仔，面對突然間咁大力既喪屍我都唔夠力捉實佢，只係可以暫時拉住佢唔比佢走，但如果冇一個大力D既人鎖住佢，我相信佢好快就會掙扎開隻左手，到時其餘兩個男仔就大獲！

但係同一時間好多乘客已經衝左出去月台到，同時身邊亦有條友一邊跑一邊推撞緊出黎，係我專心一致出盡力扯實喪屍左手既時候‧‧‧

有人撞到我！





突如其來既衝撞，令本來出緊全力拉住喪屍既我失左平衡跌一跌，我岩岩黎得切想睥一睥邊撚個撞到我既時候，喪屍已經大力掙脫左我！ 左手自由既佢馬上舉起手插向鎖住佢頸既高大男仔手臂到！

「屌！好撚痛啊！！！」 見到高大男面容扭曲，皮膚黑D個男仔都即刻大叫，「頂撚住呀，咪放手呀仆街！搵人幫手啦！」

我一起返身就跑過去幫手，呢個時候有人一拳打向喪屍個頭到，一條紋左龍既手再叉向喪屍頸，

「放手！ 等我黎！」紋身佬大叫之後，兩個男仔見佢捉實左喪屍都放手行開，紋身男好似頭先咁，揸住喪屍個頭跑向車廂，再將個頭撞向車身，好快原本係西裝男既喪屍都好似上次恤衫男一樣，條頸歪左而死。

「依加架車廂入面既喪屍應該都死曬，」紋身男擰轉面同我地講，「但唔知車頭個邊仲會唔會有其他喪屍」





因為一行出車廂西裝男喪屍岩岩發難，所以我地都無留意到另一邊既情況，只係大約見到周圍D乘客都跑出黎月台到。聽完佢講之後我地一班人望一望車頭個邊，竟然發現除左呢兩個車廂，車頭個邊既月台完全係一片空地！

「屌，點解個邊無人既，好似只係我地呢邊有人行出黎？ 個邊無咩聲氣咁，會唔會D人已經賴左野？」皮膚黑黑地既男仔見到個邊冇人就屌左出聲。

 「如果係既話我地最好離開呢到先，一陣走多幾隻喪屍出黎我地走都走唔到，而且警察可能係上面，我地上去先啦」答佢既係頭先拎紙巾比人個個女士，佢企係高大男隔離，佢地兩個應該係識既。

高大男望一望女士，「但呢到發生咁大件事，我覺得我地應該等警察黎到先，依加呢到死左兩個人，我地要同警察互相證明我地係自衛殺人。」聽高大男既口吻，似乎佢反對我地就咁離開呢到。

「喪屍係到咁耐警察都冇到，你覺得佢地仲會黎？」紋身男冷笑一聲，明顯都反對留係到。 呢個時候女士行前一步同我地講「其實大家想點做係大家既自由，但我提議我地幾個人暫時一齊行動先，即使被警察拉左我地大家都可以幫大家，係咪？」





「你講得岩，咁不如大家講下自己咩名先啦，我叫呀傑，岩岩放工搭車返屋企。高佬你呢？」聽完個位女士講完之後，我覺得佢係比較聰明既一個，如果真係走難應該可以帶領我地，所以我建議大家互相介紹先，等我地可以名正言順一齊行動。

高大男睇落20幾歲尾，身型肥肥地又高既佢gel左個all back比比鳥頭，佢開始介紹自己，「我叫呀豪，呢個我女朋友，叫Coco，」佢一邊指向岩岩拎紙巾比人個個女士，Coco染左紅色頭髮，帶住一副圓型既粗框眼鏡，佢睇落都係就黎30歲左右。

紋身男接住講，「叫我呀權得啦」光頭既佢配上紋身同一身既肌肉，難怪佢已經可以打低左兩隻疑似喪屍既人，而 皮膚黑黑地既男仔，佢帶住透明既粗框眼鏡，見我地講完就話「我叫呀帆，我22歲，我做救生既，平時鍾意玩下運動咁。」呢個時候我心諗，既然佢做救生員，咁佢應該識基本急救，如果真係有事可以一陣可以搵佢幫手救人！

互相認識之後，我地就要決定跟住應該點做。其實諗深一層，我地都比岩岩發生既事嚇親，全車人都想馬上離開呢到，而且我地都當左依加係喪屍既世界。我地根本無心機同機會影低發生咩事再同其他人解釋呢到所發生既事，即使係有機會同警察解釋，我地又應該點講呢，喪屍根本要佢地相信係無乜可能既事！除非喪屍末日已經係全香港，甚之全世界發生左！

“轟隆隆—轟隆隆—轟隆隆—轟隆隆—轟隆隆---“

呢個時候月台入面突然傳黎轟轟聲，初頭我地都無為意，但後尾轟轟聲越黎越近！甚之連地下都有少少震動！

「唔通有隻tank沖緊過黎？」呀帆望住聲音源頭個邊講，佢講既tank應該係喪屍game L4D2入面個隻變種大喪屍，如果係真既話我地再留係到就好危險！

「屌乜撚野tank呀，月台點會有坦克車呀，靚仔你用下腦啦」有個企係附近既大叔搭嗲，不過聽得明呀帆講咩既我地自然成個身都實曬，我地應該要依加走！





「喂不如我地上去先再--」我岩岩開聲叫佢地一齊走先，離我地遠少少既乘客又有另一股騷動。

「喂，有冇人幫幫手呀，岩先個成身血個女人流好多鼻血呀，佢暈左呀！」

個邊有D人企埋中間D銀色櫈旁邊，而岩岩扶人個大叔跪係女人身邊，個女人就訓左係到，血不斷係鼻到流出黎。呀帆聽到之後都抬起腳跑過去幫手，
但呢個時候轟轟聲越黎越大聲，聲音係由月台另一邊既軌道傳黎！ 即係黎緊既唔係變種喪屍！而係呢個時候‧‧‧

呢個時候對面駛入左一架西鐵，

「列車現正駛進本站，乘客請勿超越黃線。列車現在駛進本站，請乘客不要超越黃線。 The train is approaching，please stand behind the yellow line--」