港大七不思議食女事件: 52. 再見
52. 再見
上回講到，從愛情逃離，再追趕愛情。
當我從阿予身邊掙扎，除低頸巾，拔腿就跑嘅一刻，我就知道，我根本唔係從愛情逃離。
我嘅愛情，好似劃火柴一樣，來得快去得快。來得快尚好，只怕係愛情從來無存在過。
當日於北角初試雲雨，我已經講過：「射出嘅唔係精液，係一篤濃濃嘅感情」，我對阿予嘅感情，就好似快活谷賽馬，完結於派彩剎那。射完感情，淨低嘅，就係屌西，並非屌感情。
泛黃嘅感情，由玄鐵劍激射而出，附於紙巾，成為垃圾，拎去堆填，彷似林黛玉葬花，諷刺地被阿予親手埋於垃圾桶。巧合嘅係，紅樓夢入面，賈寶玉同林黛玉縱兩情相悅，但卻無法長廂廝守。阿予比黛玉可憐，畢竟黛玉曾與賈寶玉相愛，但賈子狠心推開阿予，追趕牧子嘅時候，清楚了解自己對阿予嘅感情，係美麗誤會，係色慾與財富嘅加工品。
阿予抱頭痛哭，於我身後，一時叫阿毅，一時叫Marvin，聲音隨住腳步，漸漸遠去。我唔敢回望，因為我怕我一停低，就心軟，永遠失去牧子。對上一次喺華富冰室，我問阿予拎電話，佢成部電話遞畀我，羞辱我，我轉身就走，冇擰過返轉頭。估唔到今次喺同樣地點，做同樣嘅事，竟然會令我痛徹心扉，不回頭，咬著牙，一直跑，一直跑，一直跑。
濕瀝的情感跳進海裡去，打碎了水中的月亮……
濕瀝的情感跳進海裡去，打碎了水中的月亮……
濕瀝的情感跳進海裡去，打碎了水中的月亮……
所謂情感，都只不過係謊言。我並唔知道謊言跳進海裡，能否打碎月亮，但我肯定謊言可打碎阿予嘅心。當日為溝阿予，隨口講句王菲「郵差」嘅歌詞「你是千堆雪，我是長街」，早已命中注定我地會分手，因為，歌詞嘅下一句，就係「怕日出一到彼此瓦解」。
我比尹志平更不堪。呢位眼睛像新月，騷得入骨嘅女侍者，喺我背後哭斷腸。我膽小如鼠，只懂逃離，追趕自己嘅愛情，掉低阿予喺傷心嘅華富邨，從佢嘅生命中悄悄退場。阿予唔鍾意人同佢講再見，但我連同佢道別嘅機會都冇。
我以為我會同阿予分手嘅一日，為失去北角私樓而哀傷，但當我跑得越嚟越快，我就知道，原來城市花園大宅，喺偉大嘅愛情面前，係咁一文不值。隨住我遠去，阿予聲盡，好似王爾德《夜鶯與玫瑰》裡嘅夜鶯，用自己嘅性命，為男孩換來一枝玫瑰。
----然後死去，化為塵土，無人理會。
牧子短髮於風中跌蕩，跑得好快，跑過灣仔百佳，跑過Raymond阿爺間屋樓下，跑過油麻地，跑過港澳碼頭，跑過白鴿巢，跑過港大。我逆風而跑，不理途人奇異目光，追趕快失去嘅愛情。
牧子一直跑，跑到華富巴士站，登上一架往港大嘅巴士，我好似「畢業生」入面嘅德斯汀荷夫曼一樣，喺故事嘅結尾，跑呀跑，跑呀呃，勉強追到牧子，拉住佢隻手，坐喺車嘅最後排，因為我唔想牧子好似野狼同Wilson一樣，因為我嘅錯而永遠消失。
「我地分手啦。我同你講過，你再呃我，我會永遠離開你。」牧子「分手」二字，決絕無比，一嘢轟落嚟。
「唔好啦，我冇鍾意過佢。」
「你冇？你攬到佢咁實？錫得咁開心？你唔好玩我啦邦少，一次又係咁，兩次又係咁。我唔想再同你一齊喇陳納邦，分手啦。」係我令到牧子由小鳥變成嗜血嘅禿鷹，我冇怪佢嘅冷淡之餘，仲感到十分內疚。
「唔怕話你知，我契哥成日追我，有錢又有錢過你，叻又叻過你，你讀咩呀？比較文學呀？哲學呀？住邊呀？公屋咋。契哥英國返嚟，做JP Morgan，你睇吓你！我以為你最愛我，但你最愛嘅，始終係你自己。」牧子從第三人稱欣賞小弟「一嘢轟落去」，大受刺激，如瘋似癲。
「仲有你為我，做過啲咩？尋日郁啲又發脾鬧我，搞到我嬲嬲地落吧。我落酒吧識左個港大讀Law嘅男仔，佢幾識氹我，第二朝作咗篇文送畀我。
「求其喺蘭桂芳搵個男人，寫嘢仲叻過你，你用埋啲口語寫小說，根本唔入流，工又唔搵，總知我好憎你呀！垃圾！呃我！我唔會再畀你呃架喇，呃完一次又一次！」牧子將佢契哥捧上天，連尋日識嘅仔，都同我比較，將我當係地底泥。
「好啦，分手啦，我地以後都唔好見。」講錢都算，但係講起我引以為傲嘅寫作，我真係唔忍得。我曾經以為我好愛牧子，但係佢忽然變得好陌生。
空氣死寂，車上乘客都望住我，睇我係幾咁不堪，幾咁折墮。
「你呢個畀女人寵壞嘅少爺，你同我一齊咁耐，為我做過啲乜？你成日話自己寫嘢叻，你有無冇為我寫過半隻字？你話『不如我地重頭嚟過』，就係等你一腳踏兩船？契哥成日問我不如做佢女朋友，尋日條仔又溝我，我而家就諗同邊個一齊。再見喇Marvin。」牧子錫咗我額頭一啖，巴士尚未到港大，我尚未向佢解釋阿予係我財主，冇阿予，佢就冇錢交租嘅事實，牧子就無情咁落咗車，離開咗呢個欺騙佢兩次嘅浪子。
佢嘅短髮，永遠消失喺我世界入面。
永遠。
如果阿予係夜鶯，我一定係故事入面嘅男仔，將從阿予得嚟嘅錢財，向牧子賑濟，但係牧子一個轉頭，就投向貴族男子懷抱，「誰都知道私樓比補習學費貴重得多」，我欺騙兩女，牧子轉投契哥懷抱，原來我地嘅愛情都係由謊話拼湊而成，就好似當日喺白鴿巢，將我老豆嘅經歷，作咗個賈梅士《葡國魂》嘅故仔，錫一啖額頭就永遠喺埋一齊，咁戇鳩，讀者看倌，你唔係信呀嘛？
呢個故事，沒有終結，其中結局，由你填補。我一直希望，牧子神女出身，性格剛烈，對我一番說話嘅傷害，係故意令我徹底忘記佢。我記性好，要記得嘅，我永遠記得，所以呢個結局寫完就算。牧子永遠係嗰個為我學「The Scientist」，買半邊燒鵝畀我老母食嘅好女仔，就好似小魚仙電影一樣，同王子喺埋一齊，而唔係好似童話入面講咁樣，悲哀地死去。
巴士到咗港大，我漫無目的喺港大校園遊蕩，幫襯Subway嘅賓妹，我今次冇買廿一蚊嘅Sub of The Day，反而買咗最貴嘅Steak and Cheese，我坐喺荷花池隔離嘅石塊之上，咬一啖包，淡而無味。
電話忽然一震，原來係牧子send whatsapp嚟：「呢個尋日喺酒吧識嘅港大男仔，將我同佢尋日發生過嘅事，改做故仔，紀念我地相識，先唔講人地叻過你啲咩百佳砌阿嬸故，起碼佢會氹我，你做過啲咩？唉，唔講，再見喇Marvin，再見，然後再見。」
我再拉落去，見到一篇名為《酒吧中》嘅短文，筆名「卡仔」，我向來唔引用別人說話，但為求故事完整，不得不轉載如下：
「卡仔每逢周末都會來這間酒吧，揮霍正倒數的青春。他雖是港大法律系學生，惟飽食終日，無所用心，在大學裡的幾年，酒喝了很多，書卻讀得很少。
酒吧內，卡仔穿著花俏的恤衫，點了一杯冧酒，坐在一隅打量著酒客。
驀地，一位妙齡女郎步入了酒吧，逕往吧檯坐下。她身材姣好，略施脂粉，身穿一襲黑色全身短裙，一雙大眼睛閃爍著光芒，蓄爽朗的短髮，正是卡仔喜歡的類型。
卡仔的雙眼盯著她不放，黑衣女郎對著卡仔一笑，笑得極媚。
卡仔趨往吧檯，向女郎問道：『你自己一個嗎？我的名字是卡仔。』
女郎嫣然一笑，說：『我的名字叫牧子。』
『你好面善，我好像在別處見過你。』
『是嗎，我才第一次來這間酒吧。』
『Insomnia，我喜歡這間酒吧的名字。因此我經常來。』
『你經常失眠嗎？』
卡仔淡然搖搖頭，再點了一杯酒。和牧子言談甚歡。
卡仔伸手去摟牧子，牧子像蛇一樣向卡仔靠攏，活像無骨。放眼德己立街，蘭桂芳遊人如鯽，酒不醉人人自醉，卡仔今軟玉在懷，更是意亂情迷。
『你靠得這樣近，不怕吃虧於我嗎？』卡仔酒過三巡，顯得有點輕佻。
牧子格格一笑，道：『那麼，請你立刻放開手吧，你我只不過只認識了半句鐘。』然後她作勢掙開卡仔，卡仔自然摟得更緊了。牧子的手摟著卡仔的頸脖，卡仔想也不想就吻了下去。
『你的樣子看起來很年輕，我看你大概還在唸書吧？』牧子微笑，臉上濺起了一雙梨渦。
『我在港大唸法律，行將畢業了。』
『這麼巧，我也在港大唸書。』
『你哪一個系？』
『太空系，你不會看不起我吧？』
卡仔呷了一口酒，不自覺地笑了。
夜深，德己立街除了酒之醇香，只餘下牧子的陣陣香氣點綴冷夜。
卡仔招呼了一輛的士，送牧子回家。
『坦白告訴我，你有沒有女朋友？』
『有，我們在一起不知是五年、六年還是七年了。』在這當口，卡仔活像誠實好孩子。
牧子淡然一笑，給了卡仔一個最甜蜜的吻，和一個假的電話號碼，轉身便走。
從此以後卡仔再也沒有見過牧子，她究竟有沒有在港大太空系畢業，抑或已升上了香港大學，卡仔不知道，也無從猜度。
卡仔去Insomnia也去得更頻繁，酒也喝得越兇了。至於那短髮的牧子，只於德己立街的凌晨在卡仔之生命掠過一瞬，以後就再也不曾到來。」
閱畢，只覺「卡仔」之名極為耳熟，不知在哪裡聽過。我輕輕講句：「而我不知卡仔是誰，垃撚圾。」妒意驟生，奮力將無味道嘅Subway掉落荷花池，扔死JP Morgan嘅契哥與讀法律嘅卡仔，引來幾個港大囡囡嘅異樣目光，彷彿精神病會傳染。
我呆坐冷冰冰嘅孫中山銅像腳邊，哼起當日牧子唱畀我聽嘅明知故犯：「一切原是註定，因我跟你都任性.......」
我冇流過半滴眼淚，因為細佬同我講過：「逆轉裁判入面，有一句話，哥，你要永遠記住：『真正的男人……只有在一切都結束的時候，才會流淚。』」
幾星期後，我寫完小說，寫咗個童話式嘅結局畀阿邦同埋阿杼，兌現咗對阿予嘅唯一承諾，但係我再冇面目去見呢個女仔，我只係浪子，唔係踏七色彩雲拯救佢嘅行者，我永遠有負於阿予，亦都唔會忘記呢隻冰室夜鶯。
至於佢老母，我每一次睇虐待菲傭嘅新聞，都好怕係羅太被人拉：佢係好媽媽，亦都放我一馬，冇報警屈我姦佢個女，我遙望英皇道，衷心祝願呢位美婦人安好，無須同阿予講再見。
後來，我為咗證明俾牧子睇，我寫嘢叻過佢「求其喺蘭桂芳搵」嘅卡仔，我以牧子改嘅筆名「賈子」，寫下咗呢個荒謬而又充滿謊言嘅小說，名為《港大七不思議食女事件》。巧合嘅係，只須將「賈子」兩字稍加修飾，就變成「賣字」，他朝若有一日出書賣字，本書與牧子嘅愛情，俱為廉價嘅商品，喺呢個社會，口袋有錢，就可一買一賣，買我啦，屌我啦。
但係我唔會嬲牧子，因為我根本冇資格。我只記得我同佢一切嘅好，我冇資格去要求復合，我同佢嘅感情，喺第一次分手之後，已經係有賺；白鴿巢澳葡秋午，我永遠記得。
我是浪子，別泊岸。一日，經過Paul Smith，將原本用嚟畀牧子交租嘅錢，一嘢轟落去Sales姐姐到，買咗對深藍鞋帶嘅黑皮鞋，再穿上媽媽燙嘅G2000西裝，Gel個周慕雲頭，打條靚呔，披上Zara買嘅孖襟黑色大褸，於中環某甲級寫字樓嘅大機構，準備見工。
「Oh you’re Marvin，it’s your turn now.」中年HR姐姐百般嬌媚，咀角一粒痣真箇銷魂。
「Nice to meet you. I’m Marvin from HKU.」我撥一撥頭髮，細細打量連身裙前方嘅拉鏈。
就咁睇，呢條中女……有啲姣。
(全文完)