港大七不思議食女事件: 15. 勾引

15.勾引
 
上回講到，我幫住貝沙灣嘅Alexander補補吓習，佢老母突然返咗嚟。
 
佢老母一開門，我望一望佢，我再望一望明眸皓齒嘅Alexander，先至明白，究竟咩嘢叫做「龍生龍、鳳生鳳」。Alexander老母著住白色豹紋連身摟屌裙，應大則大、應細則細，五官精緻，一睇就知係美人胚子。唯一可惜就係，佢比佢廳入面掛住嘅相中人年紀稍大，青春氣息已經同佢了無瓜葛。
 
自古美人如名將，不許人間見白頭。女人一過咗三十歲，就好似大時代入面嘅股市一場，跌到不得了。以三十尾四十頭嘅中女嚟講，Alexander老母都盡晒力，畀晒你，係超班馬，我都唔苛求啲咩。
                         
我望住佢喺玄關除鞋，心裡禁不住概嘆：的而且確，係Alexander老母呢種女人，先有條件嫁入嚟貝沙灣無敵海景大宅。女人生得靚，同中咗投胎六合彩冇分別。當然，識唔識領獎，嫁個好人家，又係造化。
 




「你就係Marvin啦？Alexander有冇曳呀？佢唔專心，你幫我鬧佢得架喇。」Alexander老母比我想像中熱情，完全唔似喺電話到咁冷漠，仲主動同我握手。佢手指又長又幼，一睇就知係唔駛做嘅闊太。
 
「我不知幾專心做功課，係你一入門口，Marvin哥哥就係咁望住你，搞到佢唔專心咋嘛。」受西方先進教育嘅Alexander，睇嚟比受填鴨式教育嘅港孩更加睇透人情世故，勇於表達心中所想，哪怕對象係佢老母，更勝過上被Tutor問問題會頭望地下嘅港大生。
 
我屌你老母咩......
 
「係啦，你叫我Jackie得喇，唔好叫我楊太。Alexander，唔好再亂講嘢。」楊太，呀唔係，Jackie有啲尷尬，一個箭步返房閂埋門。
 
就係咁，我就開始咗幫Jackie個仔 --- Alexander補習。我一星期上去Alexander屋企兩次，Alexander話頭醒尾，有時根本唔駛我去教，佢都自己識晒啲功課，我似係湊仔，陪佢吹水、打機，多過教書，簡直當咗佢係我半個細佬。至於佢老母，頭一個月，我都同佢緣慳一面。
 




「喂，山大，你阿媽去咗邊，做咩成日唔見佢嘅？」我忍唔住，試探山大，即係Alexander嘅口風。
 
「佢同咗撚樣去馬爾代夫玩呀，你冇Follow佢IG咩？」山大老氣橫秋，表現出超越同齡小朋友嘅成熟。
 
我首先呆一呆，然後同山大講：「邊個乜樣？?仔唔好講粗口，咩IG？」
 
「Instagram呀，我媽咪成日upload相上Instagram架。呢排佢同撚樣去咗馬爾代夫，日日UP相洗版啦。」山大語帶不屑。
 
對於二千後嘅對所有名稱一律簡化，我同山大彷彿隔住一條華富村同貝沙灣嘅鴻溝。
 




「咁個乜樣呢？」儘管係浪子，但我都有原則，就係永不於學生面前講粗口。
 
「撚樣，咪即係楊生囉，我老豆呀，不過我阿媽永遠都唔係楊太咋嘛。」山大抬頭望住露台嘅無敵海景，長嘆咗一聲。
 
山大都畢竟係小孩心性，好快就拎出佢嘅Iphone，掃兩掃，開咗佢老母Jackie嘅Instagram畀我睇。
 
Jackie個Instagram，貴價食物相佔多數，另加一望無際嘅陽光海灘相；當然唔少得嘅，就係佢老母嘅性感自拍照，加晒effect呢樣嗰樣，佢老母即刻後生十年。
 
「咦，唔見你老豆嘅？」
 
「佢都唔係佢老婆，梗係唔會upload相上IG啦，問……」呢一刻，早慧嘅山大先係我人生導師。
 
跟住山大順手開埋佢老豆Instagram我睇，好熟口面，好似係壹周刊名人版見過，係一個算係幾有魅力嘅中年男子；但係有趣嘅係，山大並無Follow佢老豆，睇嚟山大對Jackie無名無分，十分不滿。
 
又過咗一個星期，我又準時去山大屋企幫佢補習。同平時唔同嘅係，今次開門嘅，竟然係久違嘅山大老母。Jackie身穿睡袍，更見明豔動人。




 
「Marvin，唔好意思呀，Alexander去咗踢波，可能遲少少返，工人姐姐去咗接佢架喇，不如你坐喺到等吓佢吖。」佢拎咗杯水畀我飲，偌大貝沙灣豪宅，就淨得我同佢。
 
我偷望佢睡袍下若隱若現嘅上圍，突然間，佢行埋嚟一手掃我雄壯嘅背肌，喺我身邊講：「係呢，Marvin，我有啲事，想你幫吓我……」
 
我聞到佢名牌香水味，覺得呢一刻，佢勾引緊我。