港大七不思議食女事件: 9. 永遠

9.永遠
 
上回講到，對住韓妹允雅，竟然老貓燒鬚，犯咗溝女大忌。
 
「我行呢邊，遲啲見啦。」月色之下，允雅笑得特別甜。
 
行到去港大西閘，為咗瀟灑形象，我撥一撥頭髮，拎電話出嚟，開鎖又解鎖，最緊要嘅說話，竟開不了口。向佢道別，行落水街，正想搭車返屋企。
 
所謂溝女大忌，就係過於保守，塞晒十一個球員係禁區，擺出情感大巴陣。
 




允雅眉頭一皺，略帶失望，向右走，慢慢行去小巴站。
 
如今想起，唔問佢拎電話，因為我深明自己係浪子，再加上我同佢嘅戀情有注定有上限，止於佢返回韓國嘅一日。與其日後形同陌路，倒不如將回憶永遠停在半空，反正我記性好，會永遠記得呢一日。我假設佢鍾意過我兩小時四十三分十秒，甜甜蜜蜜，就心滿意足。
 
行向水街之時，我回頭，但見允雅怔怔咁望住我。小巴一到，佢就上車，離開月色曖昧嘅般咸道。
 
自始，我每日都去圖書館三樓溫書，測試自己同允雅嘅緣份。相識之後，滿腦子都係允雅，喺見唔到佢嘅日子，我限制自己一個鐘內，只能思念五分鐘，免得讀書分心。
 
幾日後，允雅終於出現，但身邊多咗個細眉細眼嘅大隻泡菜仔。我故作瀟灑，向允雅一揚眉，就繼續讀書，實則妒火中燒，堂堂浪子竟被番邦女子迷住。
 




我偷望過去，只見大隻泡菜仔先行離去，允雅離遠向我講幾句說話，我塞住耳筒，完全聽唔到。佢搖搖頭，行過嚟，除低我耳筒，大大方方咁話：「嗰個係我朋友呀，你呢排點呀？」
 
近年玄鐵劍法大進，囡囡自己埋身，我好似家犬一樣，早已喪失覓食嘅本能。兼受港大西化教育，自尊心極強，過咗十五六歲問人拎電話嘅年紀，所以我又戇鳩鳩，離別之時，冇問允雅拎電話。
                                                                                                
第二次見面後，允雅好似人間蒸發一樣，我能夠做嘅唔多，只能喺圖書館三樓無了期咁等落去，過住行屍走肉既生活。空虛寂寞之時，周不時想起Elaine同Wilson。
 
直到十一月某日，我喺圖書館溫完書，獨自喺 Subway 排隊買 Sub of The Day。 身為窮撚，已經將 Sub Of The Day 邊日打邊日瞭如指掌。我咬住半個飽，忽然見到一個高佻嘅身影 – 允雅喺我身前，著住高腰牛仔短褲咁樣行過。
 
我比保特還要快，故作鎮定，瀟灑地走到去大學書店門口同佢打招呼。
  




允雅一見到我，就一嘢攬實我。我感覺到有嘢頂住，好舒服。
 
「你去咗邊呀，咁耐唔見你嘅？」
 
「冇，我屋企人過咗身，返咗去韓國差唔多一個月，而家都冇咩事喇。」允雅撥一撥佢嘅頭髮，唏噓無比。
 
允雅突然間拍一拍我膊頭，問道：「上一次見你係幾時？」
 
「我已經唔記得喇，但係，我永遠會記得你。」
 
允雅望住我，用韓文講咗句說話，格格嬌笑。
 
我追問之下，原來就係「上一次見你係幾時」。
 
呢次我醒目，思念征服自尊心，問佢拎電話之後，同佢嘅感情一日千里，無所不談。每次約會，皆去戲院睇港產片。戲院之內，教曉佢好多廣東話。其時都略懂一兩句韓文，但如今差不多全然忘卻。




 
有一次溫書，允雅問我，畢業之後想做咩，我仲讀緊書，有排都未畢業，點知啫？所以我隨口講，要做下一個村上春樹。
 
「畢業之後，我想做小說家，成為下一個……」我想講「村上春樹」，但一時忘記村上嘅英文拼音，於是續道：「寫《挪威的森林》嗰個呢？」允雅先恍然大悟，用備忘紙係我嘅電腦上貼上「Murakami Haruki」(村上的羅馬字拼音)同埋「소설가」(韓文「小說家」)。
 
我望住「소설가」同埋「Murakami Haruki」，雖不知我會否成為才華洋溢嘅小說家，但允雅義無反顧咁支持我，卻令我好感動。呢次之後，我每日落堂，都急急趕去搵允雅，對佢嘅思念與日俱增。奇怪嘅係，對住真心喜歡嘅人，竟然完全表現唔到浪子嘅性格，連佢隻手都唔敢拖。
 
但問題係，拖到十二月頭，我地仲係曖昧嘅好朋友。有一日，佢允雅終於忍唔住，用中文Whatsapp我：「許港生。今晚夜晚十一點，文學院荷花池見。」
 
我一頭霧水，不知允雅所指，上網一搵，先記得許港生係玻璃之城男主角，當日第一次見佢，就帶佢去荷花池嘅畫面，又清清楚楚浮現係眼前。
 
好唔容易時間去到十一點，我特意打扮，穿單吊西裝褸赴約。等咗約莫五分鐘，著住白色冷衫嘅允雅終於嚟到。
 
「其實，我就返去韓國喇，你會唔會有嘢同我講……」
 




我無語，望住荷塘月色，彷似黎明怒轟舒淇一樣，一嘢轟落去。
 
大家打得火熱，允雅竟然話：「不如，你嚟我屋企過夜吖？」
 
我順理成章，上去佢嘅住處，一齊上網睇黎明嘅甜蜜蜜。睇睇吓戲，做咗愛做的事。
 
細節我真係唔想講，因為大學三年，我獨愛允雅一人，大家可以著番條褲。只可以講，佢比我任何上過嘅女，都仲要正。
 
時間過得好快，好快就到咗平安夜。我又喺佢屋企過夜，親手整咗個相架畀佢。相架內貼滿合照、戲飛、縮細咗嘅電影海報。成晚我地淨係攬住傾計，並冇搞嘢。
 
次日，我送佢去機場，搭飛機返泡菜國。一見到個閘口，佢已經喊到雙眼通紅。去到閘口，同佢相擁作別，佢拎住個相架，唔捨得擰轉頭行。
 
我強作鎮定，目送佢一袋二袋，高瘦背影，直至佢喺我眼中消失。
 
此並非純粹允雅離去，我更加覺得，係葬送我青春嘅墓誌銘。




 
你問我講點解我鍾意佢？身為長唔大嘅浪子，我可能天生傾倒於「玻璃之城」般冇結果嘅愛情。
                                                                         
早熟嘅我知道，我根本冇可能異地戀，如果唔係，我一早問咗佢拎電話。分別後嘅一頭半個月，我地仲日日 whatsapp；有一日，佢唔再應機，可能佢已經看清我地冇結果，或者係已經有咗第二個。
 
事到如今，我對佢唯一嘅羈絆，恐怕就係貼喺書桌嘅「소설가」同埋「Murakami Haruki」。我不知佢會否將相架棄如垃圾，但每次寫作乏力，只要見到兩張備忘紙，我都會覺得充滿力量，同佢嘅經歷，又喺心中重演一次。
 
但係無論點都好，再見到佢嘅時候，我都會同佢講：
 
「上一次見你係幾時？」
 
同埋，
 
「我會永遠記得你。」