我係迪士尼俾一班邪惡既卡通人物襲擊: ＃10

「呀！！！！！！！！！！」係電話裡頭傳黎一陣刺耳既尖叫聲。
 
「做咩事呀？喂！」我好似電影入面既主人翁咁，不停咁喂個電話。雖然我知咁做係無用，無補於事，但依家我真係好無助，唔知點做好。
 
如果今晚真係好大命咁走返出去，我都係一樣要返黎救返我妹。
 
唔通只有得我一個返去咩？俾老豆老母知道一定斬死我。
 
「呀朗佢！佢有危險呀。」佢正係講左呢一句野。
 




「呀朗佢點呀？你地點呀？！」我好緊張咁問。Yuki佢聽到呀朗呢個字，佢「下」左一聲，「我細佬佢點呀！？發生左咩事呀？」佢好用力咁捉住我隻手。
 
唔係捉既，佢係用力咁扭我隻手。
 
之後就係傳黎一陣既慘叫聲。
 
然後下一步就係收左線。
 
「點呀，點呀？咩事呀？」我估佢小小既腦袋已經受唔住咁既刺激。
 




一波未平一波又起，接而連三既衝擊，係呢半個鐘內發生。
 
「我都唔知呀…我都好擔心佢地，依家佢地好似有危險咁呀。」我神色凝重，真的不是開玩笑呀。
 
岩岩果班用普通話講野既人，唔洗問一定係中國人，係中國殺手先岩。
 
但係因咩事要殺我地呢？仲要咁殘忍？要血洗迪士尼？
 
鳴……呀……鳴鳴……
 




終於yuki忍唔住呢一種衝擊，失聲痛哭。
 
喊出黎係好事黎既，佢由小鎮大街已經壓抑到依家。
 
佢依家就算喊都唔敢大聲咁喊，驚有人發現到我地，只係敢係度細細聲咁抽泣。
 
我見到都覺得好可憐，佢已經係好堅強架啦，一直都強忍住自己既情緒。
 
直至頭先知道自己細佬出左事，所以就一次過大爆發。
 
但係佢喊既時候都不改佢美麗既容顏，由迷人變成楚楚動人，任何男人見到都會由憐生愛。
 
依家…佢需要既係一個依靠，一個可以俾到安全感佢既男人！
 
我甘願企出黎，做呢個男人！




 
於是我慢慢伸隻手搭住佢個膊頭，而yuki都慢慢靠過黎，「辛苦啦，無事無事。」我摸一摸佢個頭。
 
唔講仲好，一講喊得仲犀利添。
 
依家仔細睇返我地對鞋，已經係充滿曬血跡。突然間我個腦有d暈，感覺好似唔真實，好似發緊夢。
 
但呢一刻我又知到好真實，因為我依家心跳得好快，第一次咁近距離接觸女仔。
 
Yuki長長既秀麗就咁披左係我身上，仲散發淡淡既清花香味，我唔知點形容果隻香味，總之一聞落去就令人醒神，我就係咁樣俾人拉回現實。
 
我都唔知yuki佢喊左幾耐，當佢停左無再喊既時候，佢都好似無想起身既意欲。
 
我想偷睇下佢係咪瞓著左啦，但我又驚一郁佢就醒。
 




反正依家應該都係安全既，就由佢瞓一陣啦，我諗住一陣過後再叫醒佢，點知我自己都瞓埋一份。
 
呢半個鐘到，好似經歷過幾個世紀咁，由戰爭時間返黎現代。
 
我仲發左個夢，係夢入面，周圍都係白茫茫一片，係遠處，有個正方體既鐵籠。
 
係籠入面，我細妹坐左係地下，好似無左意識咁，於是我大叫，「呀妹！呀妹！」，都係無反應。
 
係夢入面，我係搖佢個籠，我發現一樣好奇怪既野，係個籠係無鎖既，完全封死曬咁。
 
無鎖，姐係無門啦，無門就無出入口，究竟佢係點入去既呢？
 
如果唔係我都想就咁樣救佢出黎先算，但係依家點好呢？
 
我無停落黎，不繼咁叫囂。




 
「呀妹～～～～！」「妹！！」
 
呢一把聲就不停咁係呢個空間入面回盪，呢把回音都幾勁下，一句野可以回成五六次，而聲量都無降低度，一陣徘徊係度。