我係迪士尼俾一班邪惡既卡通人物襲擊: ＃7

如果唔係佢地郁一郁嚇親我，我都以為佢地死左。

可能佢地痛到無曬知覺啦，我唔清楚，但我清楚既係。

Yuki佢唔出聲真係好恐怖！

我跟住佢後面，佢對於旁邊既人或物都無動於衷，起碼我都有不停睇下附近既人，睇下發生咩事，佢係完全無。

係呢一刻，我覺得yuki仲恐怖過米奇老鼠刺客。
 




我跟住yuki行入架火車度，沿路有人用無助既眼神望住我地。
 
Yuki佢視若無睹，直行直過，當佢地唔存在。
 
我唔敢話佢冷血，見死不救，因為就係數分鐘前，佢先因為眼前既情況而激動，呢d我都睇在眼內。
 
佢唔係見死不救既人，但依家呢個情況，我地又幫得幾多？
 
要真係幫到佢地，唯有搵到人救到我地先。如果連行動到既人都唔搵逃生既方法，只會一齊死係度，悲劇只會一而再，再而三咁係同一個地方上演。
 




係呢個情況，我唔敢同yuki講野，我驚我會挑起佢既情緒，一陣會做d咩野就無人知。
 
我地行到火車入面，火車既情況都唔係好得好多，我地諗到既野，人地都一樣諗到，呢個係其他人想逃生既地方。
 
但越多人想係一個地方逃生，果個地方出事既機會就會越大。
 
係車廂入面仍然有人受傷，其實同出面既環境差唔多。
 
仆街！究竟有幾多隻米奇老鼠架？如果仲有其他咁點算？
 




可能仲有高飛，米妮，又或者係唐老鴨呢？
 
其實我到依家都想像唔到唐老鴨殺人既樣，佢俾人殺就有份。
 
雖然我都估唔到米奇老鼠會殺人，完全摧毀左我童年既幻想，但佢把曾志偉既死人聲我就真係幾討厭下。
 
Yuki直接行到去火車既窗邊，去睇下個大門口，之後就無郁過。
 
我係佢後面，仲未睇到令人絕望既情境。
 
其實估都估到，有咩可能會放生俾我地走先得架？
 
我都已經做得最壞打算，但與此同時，都會抱住一線既希望，可以離得開呢個邪惡既樂園。
 
呢一種都係我做人既態度，做得最壞既打算，但抱住樂觀既心。




 
我慢慢行埋去睇，就咁企係佢隔離，佢目不轉睛咁望住下面。
 
係呢一刻對我黎講，真係見到咩我都會覺得唔出奇。
 
我見到一班迪士尼卡通人物企曬門口果邊。
 
佢地一字型咁排係門口果邊，手執各種武器。
 
佢地分別係，米妮（我無認錯既話），唐老鴨，黛絲鴨，高飛同埋布魯托。
 
當然仲有隻老鼠米奇啦。
 
我見到高飛拎緊既係一把長槍，木造既棍，槍頭係用鐵造既。
 




唐老鴨拎住既係一把斧頭，真係斬撚死人架。
 
黛絲鴨手執一條長長既鞭子，但依家俾佢卷埋左，但打落黎一定好痛囉，諗下都覺得變態。
 
布魯托就托住一把大關刀，你有無見過拜神既關羽？就係類似果一種既。
 
好似門神咁，企曬係度，而佢地前面，係一班想逃走既人。
 
我有d想知如果有人想入黎既話會點？一樣格殺勿論？呢樣我就唔清楚。
 
但下一秒發生左一樣極之恐怖既事。
 
高飛同其他野好似係度講緊野，講緊既途中，向我地既方向指過黎。

我諗都唔諗，第一時間就係拉住yuki蹲左落黎先。




 
我大驚，真係嚇親，我係感覺到我背後都寒埋。