我係迪士尼俾一班邪惡既卡通人物襲擊: ＃1

「喂！咁你聽日係咪去架？」李詩欣係我耳口大嗌。
 
「唔好糟住！打緊機打緊機！」我仲差少少就殺到果條茂利。
 
「屌！」佢正係留低左一隻字就關埋左我度門。
 
依家既我無時間去理呢個妹，成日都走入黎嘈住我打機。
 
呢一場我唔輸得架，輸左就會俾埋蛋散屌架啦，鬼叫我頭先死左4次咩……
 




好！搞掂，最尾都係輸左。
 
已經屌緊我架啦，熄左部電腦，放低部手機去隔離房去搵我妹先。
 
我叫李強，我個妹李詩欣，我地差成2年。
 
我今年中六，我個妹中四姐。
 
但佢已經係拍左好幾次拖，佢天生就MK格架啦，成日露黎露去。
 




我講緊佢出街著衫，係屋企就包都實一實。
 
我懷疑佢打電話既時候係咪裝左變聲器，一講電話把聲就高曬八度咁，尖到呢…日日聽都覺得好刺耳。
 
最頂唔順係，一收左線，就用佢粗聲粗氣既聲線同我講，「哥，幫我拎罐可樂入黎呀！」
 
「自己無手呀？定係無腳呀？」我唔會縱容港女，更唔想俾件港女流出市外危害香港巴打既生命安全。
 
所以佢成日會串鳩我，「哥，你咁樣唔得架，小小野都做唔到，邊會有女仔鐘意你呀？！」
 




 
無錯！佢就拍左幾次拖，而我，只係一個未拍過拖既宅男，正係識打機…
 
我一入到佢間房，「點呀李詩欣，你岩岩問我咩呀？」唔知點解呢，同自己d兄弟姊妹相處呢，越大個就越唔會叫咩呀妹家姐呀哥細佬呀咁樣。
 
反而係直接叫全名，好似當叫fd咁，日日都有個fd 住係我屋企。
 
「問你聽日去唔去迪士尼呀！問左你好多次啦。」佢口齒不清咁講。
 
因為佢敷緊面膜，所以只可以係度um…um..um…咁講野。
 
「去黎做咩姐？去咪正係係度影下相咁，又無野好玩。」我訓係佢張床度，望住佢成間房都係米奇老鼠。
 
佢鐘意哈姆太郎我都無咁嬲，偏偏走去鐘意隻人唔似人，老鼠唔似老鼠既野。
 




起碼哈姆太郎真係一隻倉鼠黎架嘛。
 
「我寧願去海洋公園抵屌d。」我係床上面繼續玩我既手機。
 
「話你無少女心就無少女心。」佢嘆左口氣，「我睇在你係我呀哥份上，幫你叫埋呀朗個家姐黎，等你地兩個睇下可唔可以擦出火花。」
 
呀朗係佢既唔知第幾任男朋友，姐係佢地想拍拖之餘，等我地去玩下咁囉。
 
「咩姐，你呀哥我又唔係咁缺…」自己講出口都覺得無說服力。
 
「下？」佢好大聲咁下左出黎，「唔知邊個前幾排生日，我問佢想要咩，佢答我要囡呢？」佢個樣好得戚咁望住我。
 
方死唔知係講緊我咩？咁你都問到我缺咩囉，咪直接同你講囉…
 
女人真係記仇。




 
「睇下聽日有無落雨先啦。」因為呢幾日都好似落狗屎咁落。
 
天文台又報導話呢幾日都會落水。
 
「那！我當你應承左架啦，你唔好曬左你個妹既一番好意呀。」佢好認真咁講。
 
「其實你同yuki都幾襯呀，人地又幾靚女，你又唔差。」
 
哇，好神奇呀，我個妹第一次咁讚佢呀哥，平時都係串開我宅男。
 
「人地好女仔黎架，未拍過拖，又純純地咁，你溝到人要好好珍惜呀。」佢語重心長咁講。
 
我都要溝到先得架…
 




「好啦，你早d訓啦，聽日仲要早起身呀。」
 
於是我就去乖乖地去訓教。
 
不過我唔知，聽日有一場大風暴等緊我…

去到第二日，個天係無咩點落雨，但都係陰陰地天。
 
已經搞到我無咩興致想去迪士尼玩，有邊個想陰天既時候去主題樂園玩先得架？
 
咁我地兩兄妹同佢地兩姊弟就約左係中環度等。
 
我同詩欣就住係荃灣線，而佢地住係港島線。
 
我地就揀係中環集合。




 
如果唔係要同佢地集合一齊去，我地可以係荔景直接去迪士尼。
 
如願咁見到佢地啦。
 
「哥，同你介紹返，呢個係yuki。」佢指一指yuki，然後用不一樣既眼神望一望我，好似係同我講『加油』。
 
Yuki的確如李詩欣咁講，清清純純，白白滑滑，得得意意咁。
 
完全是我的菜！
 
「仲有，呢個係我男朋友，呀朗。」佢發曬姣咁去翹住佢男朋友。
 
佢男朋友係幾型既，高高地，有少少肉地，著得又型型地咁。
 
我無咩野輸俾佢姐……
 
「呢個係我呀哥，李強。」佢介紹返我。
 
「好啦，再唔去遲入去就無野玩啦。」呀朗拖住詩欣隻手。
 
於是我地一行人去搭車入去，一路上呢一對情侶就係度纏綿細語咁。
 
留低我同yuki係度尷尷尬尬咁，唔知點好。
 
一路上都只係傾下d簡單野，查下家宅呀之類既，但好彩yuki份人夠nice姐。
 
一去到迪士尼，已經係人跡稀少架啦，因為前幾日落大雨，今日個地下又未乾，個天又陰陰地，又有邊個想黎呀？
 
如果唔係應承左呀妹，我都未必會黎。
 
不過好彩佢無介紹錯，我決定要溝到呢條女！