【愛情】如地下情一樣嘅癮，係我對你嘅定義: 120
「係真係會長同文書？」宋楚妍喺黎昕淇開口回答前又追問一句
黎昕淇比宋楚妍咁樣追問，大腦完全反應唔切，佢只係望住宋楚妍
「今日我睇到，喺樓梯，你同會長。」宋楚妍冇講出實際內容，但係單憑呢幾個重點字，黎昕淇知道佢真係睇到，「難怪，你平時對會長嘅事完全冇興趣，幾耐啦？地下情⋯」
宋楚妍認真咁問，佢心入面有種被人呃咗好耐嘅感覺，眼前係佢最好嘅朋友，但一直都冇坦白比佢知：「你同會長，幾時開始？」
「一段時間。」黎昕淇如實回答，「我同佢嘅關係之前比較複雜，但只係開始咗一段時間。」
「嗯，然後呢？」宋楚妍淡然咁點一下頭後又問道
「然後⋯？」黎昕淇不解，目光一直停留喺宋楚妍臉上帶住失望嘅表情上，「我之前已經想搵機會同你講，但又覺得未有啱嘅時機⋯」
「所以一直都冇坦白話我知⋯？」宋楚妍輕皺起眉頭，正因為係好友所以先會覺得失望，「咁有冇其他人知⋯？」
宋楚妍嘅內心希望其實大家都未知，咁樣嘅話佢都算係第一個知道呢件事嘅人，但事實往往不如人意⋯
黎昕淇默默咁點頭，宋楚妍瞪大眼，比佢想像中更失望，從好友嘅眼中可以知道佢係最後一個先知道呢件事
「邊個⋯？有邊個知⋯？」宋楚妍抿唇後緩緩問道，佢已經比定心理準備自己
「就⋯唔係好多個，副會長、樂時同江清懿⋯」黎昕淇如實講比佢知
「連江清懿都知？我仲遲過佢知？」宋楚妍幾乎係嬲到笑出嚟，「佢點可以仲早過我知㗎⋯！你唔係話如果拍拖會第一個同我講㗎咩？」
「咁⋯」黎昕淇忽然無言以對，唔知要由邊一個位開始解釋，「係樂時知道先，佢地一齊住，會知都好正常，我本來都唔知樂時知道⋯」
「哦。」宋楚妍撇開臉，感覺不滿嘅感覺卡喺胸口，「算啦，今日唔去食嘢啦⋯」
宋楚妍覺得自己接住落嚟嘅時間似乎都冇辦法笑出嚟，佢亦唔想黎昕淇難做
「楚妍⋯」黎昕淇有啲著急
佢早就預咗宋楚妍會嬲，但到佢真係嬲嘅時候佢又手足無措
兩人搭車嘅時候都冇出聲講嘢，宋楚妍似乎仲未可以消化到呢件事，重點係在於黎昕淇拍拖冇同佢講？唔係
重點在於，黎昕淇答應咗會第一個同佢講，結果同佢講嘅時候已經一齊咗一段時間之餘，仲要有人比佢更早知
宋楚妍嘅目光停留喺手機螢幕上放空，就算佢知係自己小題大做，但都需要時間去消化⋯
⋯
星期六
喺最後嘅客人離開餐廳之後，職員都開始日常嘅清潔工作
「今日做咩悶悶不樂咁呀？」江清懿拎住掃把掃到黎昕淇嘅面前
「你仲好講，你都有份⋯」黎昕淇不悅咁抬眼望江清懿
「吓？我做錯啲咩惹到你啦？」江清懿滿頭問號，拎住掃把嘅手都愣一愣
「唉⋯楚妍發現咗啦⋯然後嬲咗啦⋯」黎昕淇無奈咁將手上嘅抹枱布扔到枱上，「因為你早過佢知⋯」
「咁樣都可以怪到落我度呀⋯？」江清懿無言以對，「唔好話係你之前想暪佢？咁你氹番佢未呀？」
「我氹得番佢嘅話我就唔係宜家呢個表情啦⋯！」黎昕淇對江清懿反咗個白眼，用力咁拎住抹枱布喺木台上抹
「張台冇錯，你唔好咁對佢⋯」江清懿望住本來已經唔算穩固嘅枱對黎昕淇道
收工後江清懿搭車番屋企，今日嘅忙碌已經令佢足夠疲倦
「快啲番屋企沖個涼瞓覺⋯」江清懿喺心裏道，默默仰起頭合起眼
江清懿推開屋企門嘅時候，客廳雖然著咗燈但一個人都冇，江清懿順手就將廳燈閂上
沖咗個涼乾乾淨淨之後，江清懿行到廚房，手喺黑暗中摸到廚櫃上嘅小燈，伸手打開開關之後，只有廚房傳嚟一份和暖嘅光
江清懿靠住喺洗手盆隔離嘅位置，一手拎住手機，一手拎住杯冰水，冰涼嘅感覺沿住喉嚨而下，成個日都覺得涼浸浸
「你番嚟啦？」一把帶住濃濃嘅睡意嘅聲音從門口傳嚟，嚇咗江清懿一停
「嚇死人⋯！你行路冇聲嘅？」江清懿望向門口，好彩佢捉實咗個玻璃杯，「瞓醒？」
「嗯⋯食完飯恰咗陣⋯」鍾樂時微微點頭，眼睛半睜開行入廚房
鍾樂時酙咗杯暖水，雙手捧住杯企喺江清懿隔離將水飲完，不經意咁抬眼望向江清懿
江清懿嘅頸上搭住毛巾，身上著住隨意嘅白T裇，或者因為沖完涼而有好聞嘅沐浴露香味
身上一樣嘅沐浴露香味令鍾樂時嘅臉頰不禁泛紅，喺身邊嘅距離可以聽到微弱嘅呼吸聲
或者因為身旁嘅人嘅目光太熾熱，江清懿朝目光嘅方向望去，同鍾樂時對上視線嘅時候，江清懿嘅眼眸中係柔和，同鍾樂時嘅熾熱唔一樣
「喂⋯！」江清懿喺鍾樂時伸手攬住佢嘅瞬間成個人都僵住喺原地，雙手懸空
鍾樂時靠喺佢嘅胸膛之上，聽到屬於江清懿嘅心跳聲，但呢個心跳聲只係因為佢突然嘅擁抱而有，而呢個心跳聲亦唔會屬於佢⋯
「我唔係你嘅攬枕⋯」江清懿無語一笑，刻意無視鍾樂時嘅心意
「但我中意攬你多啲⋯」鍾樂時好似往日撒嬌一樣搖搖頭，然後低聲咁講一句：「中意你多啲⋯」
江清懿聽到佢直接嘅表白更加手足無措，但佢冇得點，佢太清楚佢可以做同唔可以做嘅事
「我要拒絕你幾多次，你先會知道我地冇可能⋯？」江清懿輕輕一笑，溫柔嘅語氣傳入鍾樂時嘅耳中
「如果唔中意我、要拒絕我嘅話，唔好對我咁溫柔呀⋯！」鍾樂時嘅心更加割裂，佢明明知道唔可能，但係佢唔捨得放手
「我地係家人呀⋯」江清懿用最柔和嘅語氣講出最狠心嘅說話
「但我唔想淨係做你嘅家人，我更加想做你嘅女朋友⋯！」鍾樂時抬起頭，凝視住江清懿嘅雙眸直言
IG Link: https://www.instagram.com/nd_cotttoncandy/?hl=zh-tw