【愛情】如地下情一樣嘅癮，係我對你嘅定義: 119
「少少啦～」宋楚妍用手勢表示，「我可以等你散會～」
「你唔怕悶嘅話，我又冇咩所謂呀～」黎昕淇笑道，喺斑馬線前停落嚟時伸手抱咗宋楚妍一下
「唔怕呀～咁我喺課室等你啦～」宋楚妍嘅手搭喺黎昕淇嘅手上，係作為密友先有嘅權利
「好呀。」黎昕淇笑住點一點頭，心入面諗緊陣間番到學校先再send message同陸修然講：「阿然應該唔會介意見少一日嘅～」
⋯
放學後等待學生會散會嘅時間裏，宋楚妍坐喺課室睇下手機做下功課，等時間過去
「哎～睇下食咩先～」宋楚妍拎起放喺手邊嘅手機嘅時候，見到黎昕淇喺冇幾耐前send咗message比佢
「可能到5點半左右，你睇定食咩啦」黎昕淇對宋楚妍道
「收到～」宋楚妍回覆後伏低喺枱上喺手機搵緊陣間食咩好
另一邊，喺學生會室嘅成員們似乎都有啲心不在焉，唔知道係唔係因為上完堂又有默書測驗，大家顯然地疲倦
「休息⋯10分鐘再番嚟啦⋯」陸修然喺一片沉默中緩緩開口，佢自己都有啲攰
陸修然嘅說話一講出口，幾本上大家都伏低喺枱休息又或者睇手機，睇嚟今日大家真係經歷咗太多小測默書
陸修然起身離開座位，經過黎昕淇嘅身後行出會室，喺陸修然行咗出去一陣之後，黎昕淇又行離會室
坐喺嗰個密閉空間入面太攰，連休息都要喺入面嘅話實在太唔似休息時間
黎昕淇行上樓梯到佢平時會停留嘅位置，上落樓梯中間嘅平台，佢平日開會休息嘅時間都中意企喺呢個位置休息，主要係換個地方睇手機
「哐—」紙包飲品跌落嚟，陸修然彎腰掀起膠板拎出嘢飲，然後經後梯打算番會室
拎喺手上嘅手機仍然停喺同黎昕淇嘅對話框，陸修然望住新嘅message，思考咗一陣先打字回覆
陸修然行到後梯踏上梯級，又要番去嗰個沉悶嘅地方
行到三樓嘅時候見到黎昕淇企咗喺轉角位，陸修然幾乎冇猶疑就行到黎昕淇嘅身旁停落嚟
「今日放學我約咗楚妍。」黎昕淇提醒道
「知道，有見到message。」陸修然微微點頭，「今日唔要我啦。」
「只有今日啦。」黎昕淇嘅目光停喺手機嘅螢幕上，輕飄飄嘅一句說話講出口
陸修然企喺黎昕淇身旁，手臂貼住手臂，陸修然悄然捉起黎昕淇垂低嘅手
「你要講比你嘅朋友知道未？」陸修然忽然問起
「唉⋯有暗示比佢知但佢好似聽唔明⋯」黎昕淇苦惱咁講道，將頭靠到陸修然嘅膊頭上，「係唔係要直接啲講佢知先可以？」
「咁睇嚟係。」陸修然無奈嘅笑容掛到臉上，「既然暗示咗咁多佢都冇明白，就要用直接嘅方法解決。」
「唉，拍個拖都好困難⋯」黎昕淇轉身攬住陸修然，將頭埋喺佢嘅頸中
「都唔係差好多個月啫，卸任嘅話。」陸修然道
「嗯⋯」黎昕淇微微點頭，鬆手同陸修然分開
喺學校樓梯間咁樣擁抱好似有啲太大膽？雖然話係放學之後嘅時間，通常都唔會有人喺呢度經過
不過有人比黎昕淇更大膽，一手拉住黎昕淇嘅手腕將佢拉到自己面前低頭就錫，什至喺佢嘅嫩唇上輕咬一口
「喂⋯！」黎昕淇都未反應得切已經比佢錫咗，反應過嚟嘅時候又冇想像中咁慌張，雖然唔多唔少有啲緊張，「呢度會有人經過⋯」
「你見到有人咩？」得逞嘅陸修然回頭朝下層望一眼，對黎昕淇笑笑：「以為你會大爆炸添。」
「你仲要咬我⋯！」黎昕淇拎起手機，利用手機嘅螢幕睇自己嘅唇，指尖輕撫着被咬嘅位置
比佢輕輕一咬，心都緊張到要跳出嚟
「你做咩望住我？期待我會嬲？」黎昕淇見陸修然嘅期待眼神
「你好少會唔嬲。」陸修然作死一樣道
「會長，如果係番學時間比人睇到，我都要變箭靶啦⋯！」黎昕淇迎合咁喺陸修然嘅手臂上用力摵咗一下，「不過宜家係放學後，又冇人就放過你啦～」
「因為今日放學之後唔會見。」陸修然抱住黎昕淇，聞到黎昕淇身上嘅氣味，心底嘅依戀感一湧而上
有時都分唔清到底係邊個更中意邊個，更依戀邊個⋯
「聽日放學再見嘛，我地平時成日都可以見到面。」黎昕淇嘅指尖勾住陸修然嘅校呔
「好啦，我知道啦。」陸修然頷首示意，微微低頭喺黎昕淇嘅額角蹭蹭，「要番去會室啦，開完會就可以番去休息啦⋯！」
「辛苦你啦會長～」黎昕淇鬆開手，先一步行上樓梯
⋯
散會之後，黎昕淇番到課室搵宋楚妍，宋楚妍啱啱收到佢嘅message嘅時候就已經執好嘢
「行得未呀？」黎昕淇企喺課室嘅門口
「嗯，行得啦。」宋楚妍嘅聲線聽起嚟有啲疲倦，拎起書包朝門口嘅方向行去
「做功課做到攰啦？」黎昕淇探頭望宋楚妍
「嗯，一半一半啦。」宋楚妍擠出笑容
「好啦～我地快啲去食嘢啦，補充下體力！」黎昕淇轉身行出去，「你睇好食咩未呀？」
「嗯⋯」宋楚妍跟喺黎昕淇身後
沿路上宋楚妍都好少講嘢，睇起嚟真係做功課做到冇晒精神，黎昕淇行喺佢身邊都冇特登搵話題
喺行離學校一段距離嘅位置之後，宋楚妍回頭望咗一眼，然後又望向睇緊手機嘅黎昕淇
「黎昕，我有嘢想問你。」宋楚妍深呼吸一口後緩緩開口
「嗯，問啦～」黎昕淇點點頭，收起手機望向宋楚妍，等待佢嘅發問
「你同會長，到底係咩關係？」宋楚妍直接了當咁問
黎昕淇瞬間瞳孔一縮，本來一直都想開口坦白，但到宋楚妍真係咁樣問佢嘅時候，佢又偏偏講唔出
IG Link: https://www.instagram.com/nd_cotttoncandy/?hl=zh-tw