【愛情】如地下情一樣嘅癮，係我對你嘅定義: 108
對佢而言，黎昕淇係佢嘅唯一，因為佢對黎昕淇所做嘅，從來都唔會對其他人做
一開始或者連佢自己都覺得只係因為黎昕淇同佢認識嘅時間最長最耐，所以比其他人更親近係正常
但慢慢就會開始發現，嗰種對朋友唔應該出現嘅情緒同感覺，發現佢係唯一一個可以令佢遷就、彎腰嘅人
佢係屬於佢嘅「唯一」
黎昕淇定睛凝視住陸修然嘅雙眸，說話可以係哄騙人嘅謊言，但眼睛唔會成為謊言，因為對一個人嘅感情多少都會喺雙眸中反映
「知道。」黎昕淇乖巧咁點一下頭，攬住陸修然嘅雙手默默咁將佢攬得更牢固
佢嘅依偎代表住佢嘅安心同信任，就算佢唔講得咁清楚，佢都係可以察覺到佢賦予佢嘅獨特性
只係黎昕淇都會忍唔住覺得自己好似壞人，明明已經係可以公開嘅關係，係選擇繼續隱瞞⋯
⋯
某日朝早
兩人慣性咁喺到咗地鐵站嘅時候分開行，陸修然行喺前面，先一步企到月台嘅幕門前，一切都同平時一樣
喺列車駛到前，陸修然一直耷低頭睇手機，靠耳仔去聽廣播知道列車到未
忽然之間有一個身影喺陸修然嘅餘光出現，餘光中可以見到隔離嘅人著住同學校嘅校裙，下意識向反方向行咗一小步後先抬眼望
「你喺呢個位嘅⋯？」陸修然嘅愕然明顯咁掛喺臉上
「嗯。」黎昕淇微微點一下頭，冇比太多反應就低頭睇手機
陸修然愕然嘅眼神中夾雜住半分困惑，目光一直停留喺黎昕淇身上
傳言從來唔需要被證實，只要兩個人行埋一齊，唔理係有心定冇意，約好定偶然，只要大家想，傳言都可以講到九成真
按照陸修然嘅了解，心入面唔想公開嘅人，係黎昕淇，佢本人一向都冇所謂，由之前開始佢已經咁樣講
「番到去比人傳東傳西，就唔關我事。」陸修然低聲道
「本來大家講嘅，全部都係事實。」黎昕淇只係平靜咁回答咗一句
聽到佢咁樣講，陸修然有啲懷疑，黎昕淇前幾日一直提起公唔公開嘅問題
「所以係真係想公開啦⋯？」陸修然喺心裏猜測道，「但唔係話都可以等到卸任⋯？不過，平時番學偶然咁撞到，都係有可能嘅。」
列車駛入月台，車門打開，乘客出入有序，本來空咗啲嘅車廂又再重新擠擁起嚟
黎昕淇行到對住車門嘅扶手前伸手握住扶手，回頭嘅時候見到陸修然就喺佢身後
陸修然嘅左手提起捉住近車頂嘅扶手，朝兩邊望一眼後，垂低嘅右手悄然向前伸，指尖輕碰到黎昕淇嘅手背
黎昕淇嘅手反射動作一樣輕輕一握，視線朝垂低嘅手瞄一眼後，陸修然偷偷將黎昕淇嘅手包裹喺手心
「噗噗⋯噗噗⋯」心跳嘅聲音強烈到黎昕淇自己都可以聽到聲音喺體內一直迴盪
到底係因為邊一樣而覺得緊張⋯？
黎昕淇垂低頭，感覺因為緊張，連手心都有啲出緊汗
如果喺呢個時候有人見到，算唔算係間接承認傳聞講嘅嘢？
列車駛到嘅時候，車門喺提示聲響下打開，陸修然迅速將手鬆開
但因為車廂內擠逼，陸修然下意識有啲擔心，回頭望咗一眼，落車後行到牆前有意等埋黎昕淇先行
「咁樣一齊番學有冇問題⋯？」黎昕淇帶住擔心低聲問道
「番同一間學校，偶然會撞到都好正常。」陸修然朝黎昕淇嗰邊微微側頭道，「光明正大就唔會有人懷疑。」
兩人並肩行喺路上，保持住少許嘅距離但又唔會離得太遠，心入面莫名覺得緊張，黎昕淇一直耷低頭用睇手機嚟緩解自己嘅緊張
宋楚妍攬住冷衫行喺離兩人有一段短距離嘅位置，對於黎昕淇嘅背影，宋楚妍再熟悉不過
宋楚妍拎起手機，快速咁打字send一個message比黎昕淇：「你同邊個一齊番學呀～」
本來睇緊手機嘅黎昕淇自然喺第一時間睇到message，黎昕淇即刻擰轉頭望，陸修然嘅餘光留意到黎昕淇嘅舉動，跟住佢一齊擰轉頭望
黎昕淇探頭，見到宋楚妍朝佢露出一個意味深長嘅微笑，黎昕淇收回視線回覆：「番學撞到都唔出奇嘅」
「搵邊個？」陸修然嘅目光落喺黎昕淇嘅手機螢幕上
「楚妍喺後面，見到我同你一齊。」黎昕淇毫不避諱咁將手機直接遞比陸修然睇，手機嘅畫面仍然停留喺佢同宋楚妍嘅對話
「你洗唔洗去搵佢？」陸修然只係平靜咁問咗一句，但聽起嚟卻係試探一樣嘅提問
「唔洗⋯」黎昕淇搖搖頭，用略帶固撒嬌意味嘅語氣又開口道：「咁難得先可以一齊番學嘛⋯」
「嗯，你啱。」陸修然嘅笑容都止唔住，佢都唔太肯定佢係因為黎昕淇罕有嘅撒嬌定因為佢講嘅嘢面忍唔住露出笑容
一番到課室，宋楚妍喺放低書包之後即刻小跑到locker前面，主要係因為黎昕淇喺locker前面，佢當然係要嚟打探一下新情報
「你好從實招來！」宋楚妍壓低聲線，從黎昕淇嘅身後探頭，「你今日做咩同會長一齊番學？」
「點解？」黎昕淇假裝思考，然後微微側着頭，「番同一間學校會見到面好正常呀～」
「係咪呀～」宋楚妍即刻懷疑起嚟，「日久生情啦？」
「邊個知？」黎昕淇輕輕一笑，朝宋楚妍聳肩，呢個微笑嘅含意包含咗黎昕淇想公開同時想隱藏嘅心意
日久生情唔係因為日子耐咗、察覺到佢嘅好而心動；而係喺望到第一眼嘅時候，佢身上嘅荷爾蒙已經先一步刻喺你嘅心入面
「黎昕淇！」宋楚妍目瞪口呆咁望住黎昕淇一個「你估下」嘅表情，「你變咗啦！」
黎昕淇只係對宋楚妍微微一笑，佢自己嘅心意其實一直都好清楚，但只係對住陸修然嘅時候講唔出口
要對一個自己識咗好多年嘅人變得坦率，睇起嚟好似好簡單，但其實要真係開口講出平時唔會講嘅說話並唔簡單
IG Link: https://www.instagram.com/nd_cotttoncandy/?hl=zh-tw