【愛情】如地下情一樣嘅癮，係我對你嘅定義: 107
望住眼前人，忽然間好想攬一下抱一下嘅想法喺腦海中一閃而過
「叮—」𨋢停定後𨋢門緩緩打開，陸修然先一步邁步行入去，企喺左邊
「多唔多功課？」陸修然有啲慵懶咁靠住身後嘅扶手
「唔算，今日都冇點派功課，都係得琴日嗰啲。」黎昕淇企喺陸修然隔離，抬起頭望咗佢一眼
黎昕淇抬頭望一眼樓層，然後又望向陸修然，遲疑咗一秒後行到陸修然嘅面前，雙手懷抱住佢嘅腰，臉頰靠喺佢嘅鎖骨
「嗯？」陸修然微微側頭，將手上嘅手機放入褲袋，伸手撩過黎昕淇嘅髮絲
「你想唔想公開？」黎昕淇直白咁問
「我？」陸修然嘅眉頭一皺，露出有啲疑惑嘅笑容，「做咩突然咁問？」
「就係⋯突然想問下你會唔會想公開⋯」黎昕淇抬起頭，語氣都變得溫軟起嚟
「唔⋯我可以等到卸任之後先公開。」陸修然稍作思考後回答
「你可以等咁耐？」黎昕淇有啲懷疑
「你係唔信我嘅⋯忍耐力？」陸修然望住質疑佢嘅黎昕淇，露出無奈嘅笑容
「少少啦。」黎昕淇認真咁點一下頭，「你可以忍耐到咁耐，可以等到卸任？有啲意外。」
「但係你唔想公開嘛。」陸修然亦以一個認真嘅點頭回應黎昕淇
「你咁樣講嘅話，顯得我有啲自私⋯」黎昕淇嘅語氣中夾雜咗少少嘅不悅
「冇，我尊重你嘅想法，既然唔想咪唔公開住，」陸修然笑道，然後露出得意洋洋嘅表情，「反正，人我已經拎到。」
黎昕淇發現佢嘅會長喺佢面前總係好容易露出得意洋洋嘅表情，平日穩重嘅佢喺佢面前會好似買到糖嘅小朋友一樣
「可能冇拎到呢～」黎昕淇罕有咁帶住尾音講嘢
「黎昕淇，比多次機會你講過。」陸修然嘅眸色一沉，壓低聲線講道
「呀？唔知你講咩，到啦。」黎昕淇迴避開問題，喺𨋢門打開嘅時候即刻行出去
陸修然跟喺身後行出去，繞過黎昕淇行到前面開門；黎昕淇跟喺佢身後行入屋，自動將書包放到陸修然嘅睡房中，順手抽出枱邊嘅叉電線幫手機叉電
「一嚟就搶我嘅叉電線⋯」陸修然坐低喺電腦枱前面打開電腦
黎昕淇起身，將陸修然嘅櫈由向住書枱嘅方向轉出嚟，一言不發就側身坐低喺陸修然嘅雙腿上，陸修然不禁愣住
「你今日做咩？」陸修然不禁問出佢心中嘅疑惑，雙手托住黎昕淇防止佢跌落去，「同平時嘅你好唔一樣。」
「覺得自己好似壞人⋯」黎昕淇側身環抱住陸修然嘅頸
「何以見得？」陸修然問道
「好似將大家嘅會長呃到手之後又唔公開嘅壞人⋯」黎昕淇低聲道，「逼大家嘅會長地下情嘅壞人⋯」
「地下情⋯我地本來都係呢種關係⋯」陸修然聽到黎昕淇嘅心聲忍唔住覺得好笑，同時又覺得黎昕淇呢種想法好可愛
「我以為你會想公開比大家知⋯」黎昕淇嘅指尖喺陸修然嘅頸上輕輕掃過
「你決定，你唔想就唔公開。」陸修然微微低頭，輕合上眼，「我嘅決定都係取決於你想唔想。」
「好啦，既然你話可以等到卸任後，咁就等到卸任啦。」黎昕淇抬起頭，喺陸修然嘅頸上輕吻一下，「我對你有足夠嘅⋯信任。」
「聽起嚟好似我冇完全得到你嘅信任⋯」陸修然伸手輕輕拍咗黎昕淇嘅額頭一下，「不過對於你嘅提問有啲意外，睇嚟緊張嘅係你。」
「緊張？我點解要緊張？」黎昕淇抬起頭，明亮嘅雙眼朝陸修然投向目光，「唔緊張。」
「對自己咁有信心呀？」陸修然嘅嘴角上揚嘅弧度剛好，有自信嘅係佢本人
「你嘅意思係，你其實係一個花心嘅人？」黎昕淇咬緊牙，指尖沿住喉核往下滑，直至到達校呔嘅領結，「睇嚟係你將我呃到手就花心啦？」
「我？我都⋯」陸修然嘴角上揚挑起眉，欲言又止嘅時候黎昕淇用眼神質問，「係多啲人仰慕啫。」
「會長宜家自己講出嚟都唔會面紅啦。」黎昕淇輕笑一聲
「等你有啲危機感。」陸修然將黎昕淇往自己嘅方向抱近啲，「唔好咁自信，覺得我非你不可，雖然事實上真係非你不可。」
黎昕淇聽住腿前日面不改容咁講情話，嘴角自動上揚至可以露出甜意嘅笑容，心底都好似沾滿蜜糖一樣甜膩膩，眼神都多咗兩分甜意
「唉～自己講完都唔面紅～」黎昕淇帶住甜甜嘅笑容嘆氣，「會長成日周圍撩女仔撩到咁熟手呀？喂！陸修然！」
陸修然唔等黎昕淇講完就直接將佢抱起，行前一步略帶點粗魯咁將黎昕淇扔到床上，黎昕淇嘅笑容都要止唔住，陸修然一臉認真咁凝視黎昕淇搖搖頭
「我對你太好啦？都開始有不切實際嘅幻想啦？」陸修然將自己嘅校呔向下扯鬆少許，擺出高高在上嘅姿態企喺黎昕淇嘅面前
「我點敢。」黎昕淇跪起身，一手拉住陸修然嘅校呔，對方瞬間彎腰
陸修然收起佢高高在上嘅姿態膽氣場，伸手攬住黎昕淇嘅腰，眼中只有溫柔
「唔好諗咁多唔存在嘅可能，除咗你，我邊個都唔想要。」陸修然輕聲嘆氣，臉頰貼喺黎昕淇嘅額角
隱晦嘅情話有種令人沉醉其中嘅力量，但直白嘅情話更容易令人露出心動嘅笑容
「你受歡迎真係唔係冇道理⋯」黎昕淇嘅聲線甜而柔，輕力咁喺佢嘅手臂上搣咗一下
「但我從來唔會同其他人講呢啲說話。」陸修然道，明裏暗裏都表達緊佢嘅「唯一」
IG Link: https://www.instagram.com/nd_cotttoncandy/?hl=zh-tw